استانا.13 ناۋرىز. بۇگىن «نۇر وتان» پارتياسىنىڭ ورتالىق اپپاراتىندا قازاقستان رەسپۋبليكاسىنىڭ پرەزيدەنتتىگىنە كانديدات ن.نازارباەۆتىڭ رەسپۋبليكالىق قوعامدىق شتابى العاشقى وتىرىسىن وتكىزدى. ول شتابتى مۇحتار قۇل-مۇحاممەد باسقارادى دەپ شەشتى. بۇل تۋرالى «قازاقپارات» حابارلادى.
«مەملەكەت باسشىسىنىڭ رەسپۋبليكالىق شتابىن باسقارۋ ماعان تاپسىرىلدى», - دەدى مۇحتار قۇل-مۇحاممەد.
ەسكە سالا كەتەيىك, وسىدان ءبىراز كۇن بۇرىن مەملەكەت باسشىسىنىڭ وكىمىمەن مۇحتار ابرار ۇلى قۇل-مۇحاممەد قازاقستان رەسپۋبليكاسى پرەزيدەنتىنىڭ كەڭەسشىسى قىزمەتىنەن بوساتىلعان ەدى. ول «نۇر وتان» پارتياسىنىڭ XVI سەزىندە كەزەكتەن تىس پرەزيدەنت سايلاۋىنا كانديدات رەتىندە ەلباسى نۇرسۇلتان نازارباەۆتىڭ كانديداتۋراسىن ۇسىنۋ تۋرالى ءبىراۋىزدان شەشىم قابىلدانعانىن ايتا كەلىپ, وندا ەلباسىنىڭ بارشاعا بىردەي وسى زامانعى مەملەكەت, بەس ينستيتۋتسيونالدى رەفورما اتتى بىرەگەي باعدارلاماسىن ارناعانىن ايتتى. بۇل باعدارلامادا ەلباسى كاسىبي ءارى اۆتونوميالى مەملەكەتتىك اپپارات قالىپتاستىرۋ, زاڭنىڭ ۇستەمدىگىن قامتاماسىز ەتۋ, يندۋستريالاندىرۋ جانە ارتاراپتاندىرۋعا نەگىزدەلگەن ەكونوميكالىق ءوسىم, بولاشاعى ءبىرتۇتاس ۇلت, ترانسپارەنتتى جانە ەسەپ بەرۋشى مەملەكەت سياقتى ەل دامۋىنىڭ باسىم باعىتتارىن ايقىنداپ بەردى. «نۇر وتان» پارتياسىنىڭ وسى شەشىمىنە ەلىمىزدىڭ جەتەكشى ساياسي پارتياسى, اتاپ ايتساق, «اق جول» پارتياسى, «پاتريوتتار پارتياسى», «اۋىل», «بىرلىك» پارتياسى قوسىلدى.
«جالپى حالىقتىق پىكىرلەرگە بايلانىستى بۇگىن قازاقستان رەسپۋبليكاسىنىڭ پرەزيدەنتتىگىنە كانديدات ن.نازارباەۆتىڭ رەسپۋبليكالىق قوعامدىق شتابى قۇرىلدى. شتابتى باسقارۋدى ەلباسى ماعان تاپسىردى. وسى رەتتە ەلباسىنا ءوز اتىمنان العىسىمدى ايتا وتىرىپ, شتاب جۇمىسىن بارىنشا جوعارى دەڭگەيدە اتقارىپ شىعۋ ءۇشىن بار كۇش-جىگەرىمىزدى, تاجىريبەمىزدi جۇمسايمىن دەپ ءسوز بەرەمىز», - دەدى مۇحتار قۇل-مۇحاممەد.
شتاب قۇرامىنا جوعارىدا ايتقان ساياسي پارتيالاردىڭ جەتەكشىلەرى, بەلگىلi مەملەكەت جانە قوعام قايراتكەرلەرى, عالىمدار مەن شىعارماشىلىق ادامدار, كاسىپكەرلەر مەن جۋرناليستەر, سپورتشىلار كىرەدى.
«ءبىز پرەزيدەنتتىككە كانديدات ن.نازارباەۆقا جان-جاقتى قولداۋ كورسەتۋمەن, ونىڭ سايلاۋالدى تۇعىرناماسىن ءتۇسىندىرۋ جونىندەگى ۇگىت-ناسيحات جۇمىستارىن جۇرگىزۋمەن جانە سەنىمدى وكىلدەردىڭ جۇمىسىن ۇيلەستىرۋمەن اينالىساتىن بولامىز. سايلاۋالدى ناۋقان اياسىندا ءبىز قازاقستاننىڭ بارلىق وڭىرىنە بارىپ, سايلاۋشىلارمەن كەزدەسەمىز. ءبىزدىڭ ماقساتىمىز - ءار ەلدى مەكەنگە بارىپ, ەڭبەك ۇجىمدارىمەن كەزدەسۋ. وسىنشاما اۋقىمدى جانە جۇيەلى جۇمىستى قامتاماسىز ەتۋ ءۇشىن بۇگىنگى تاڭدا ءبىزدىڭ كانديداتىمىزدى قولداۋ جونىندە وبلىستىق, قالالىق, اۋداندىق شتابتار قۇرىلۋدا. وسىنداي ۇستانىمدار ارقىلى ءبىز سايلاۋالدى الدى ناۋقاندى مەيلىنشە جوعارى دەڭگەيدە وتكىزەتىندىگىمىزگە نىق سەنىمدىمىز», - دەدى مۇحتار قۇل-مۇحاممەد.
ساكەن مايلىباي.
دەرەك, سۋرەت: قازاقپارات.
