“سوفيا-2010” فەستيۆالى

قازاق ستۋدەنتتەرى ءۇشىن تابىستى ءوتتى جۋىردا بولگاريانىڭ سوفيا قالاسىندا وتكەن “سوفيا-2010” ءىىى حالىقارالىق فولكلورلىق فەستيۆالىنە ەلىمىزدىڭ س.سەيفۋللين اتىنداعى قازاق اگروتەحنيكالىق ۋنيۆەرسيتەتىنىڭ “فاراب” ءان-بي تەاترى قاتىسىپ قايتتى. الىس ساپارعا شىعىپ, قازاقتىڭ اتىن اسقاقتاتىپ قايتقان استانالىق “فاراب” ستۋدياسىنىڭ ونەرپازدارى ءوز ونەرلەرىمەن وزگەلەردى ءتانتتى ەتىپ قايتقاندارىنا ءبىز دە ريزا بولدىق. گازەت رەداكتسياسىنا بۇل قۋا­نىش­تى حابار جەتە سالىسىمەن, ءسۇيىنشى حاباردى ءوز اۋىزدارىنان ەستيىك, “سوفيا-2010” حالىق­ارالىق فەستيۆالىنىڭ قالاي وتكەن­دىگىن بىلەيىك, وعان ونەرپازدارىمىز قانداي دايىندىقپەن باردى ەكەن دەگەن قىزىعۋشىلىقپەن “فاراب” ءان-بي تەاترىنىڭ كوركەمدىك جەتەكشىسىنە تەلەفون سوعىپ, ءمان-جايدى تولىق بىلۋگە تىرىستىق. ءان-بي تەاترىنىڭ كوركەمدىك جەتەكشىسى مەيىرجان الياكباروۆ­تىڭ ايتۋىنا قاراعاندا, اتالمىش حالىقارالىق فولكلورلىق فەس­تيۆالگە ماكەدونيا, چەرنو­گوريا, سەربيا, ليتۆا, ۋكراينا, گرەكيا, گرۋزيا, بولگاريا, ءۇندىستان  مەملەكەتتەرىنەن كەلگەن 500-دەن استام ادام قاتىسىپتى. الەمدىك ونەر سالاسىندا از عانا ۋاقىت ىشىندە ەرەكشە تانىمالدىلىققا يە بولعان, ءتورت كۇنگە جالعاسقان بۇل فەستيۆالدىڭ بارلىق كونتسەرتتىك باعدارلامالارى سوفيا قالاسىنىڭ ەڭ تانىمال دەلىنەتىن اشىق الاڭدارىندا وتكىزىلگەن كورىنەدى. وسىدان ءبىر جىل بۇرىن جوعارى­دا اتالعان اگروتەحنيكالىق ۋني-ۆەرسيتەت بولگارياداعى “پرەدتەچي” قوعامدىق بىرلەستىگىمەن ءبىلىم جانە عىلىم سالاسىندا كەلىسىم-شارتقا وتىرعان بولاتىن. وسى كەلىسىم- شارتتىڭ اياسىندا قازاقستان “سوفيا-2010” حالىقارالىق فولكلور فەستيۆالىنە قاتىسۋعا ارنايى شاقىرىلىپتى. قازاقستاندىق دەلەگاتسيانى س.سەيفۋللين اتىنداعى اگروتەحني-كالىق ۋنيۆەرسيتەتتىڭ حالىقارالىق جانە ىنتىماقتاستىق ءبولىمىنىڭ باستىعى سارا قىتايبەكوۆا باستاپ بارىپتى. 12 ادامنان تۇراتىن “فاراب” ءان-بي تەاترىنىڭ ونەر­پازدارى ءتورت كۇن بويى  “جور-عاتاي”, “سارى بيداي”, “بيپىل” جانە ت.ب. قازاقتىڭ حالىق اندەرىن شىرقاپ, قۇرمانعازىنىڭ “اداي”, “بالبىراۋىن”, ن.تىلەنديەۆتىڭ “اققۋ”, “القيسسا” كۇيلەرىن شارىقتاتا ورىنداپ, بي ەلەمەنت­تەرىنەن تۇراتىن حالقىمىزدىڭ سالت-داستۇرلەرى مەن ۇلتتىق ويىندارىنان ساحنالىق كورىنىس سومداپ شىقسا, ەڭ سوڭىندا حالىق ءبيى “قارا جورعانى” كوپشىلىكتىڭ نازارىنا ۇسىنعان ەكەن. س.سەيفۋللين اتىنداعى قازاق اگروتەحنيكالىق ۋنيۆەرسيتەتىنىڭ جانە اتا-انالار تاراپىنان قارجىلىق قولداۋ كورگەن “فاراب” ءان-بي تەاترى باسقا مەملەكەتتەردەن بارعان ونەرپازدارعا قاراعاندا الدەقايدا كوپ ىقىلاس پەن قۇرمەتكە بولەنگەن كورىنەدى. بۇلاي دەيتىنىمىز, فەستيۆالدىڭ  سوڭىندا, ۇيىمداستىرۋشىلار ەڭ پارمەندى كونتسەرتتىك ءنومىردى قازاق ەلىنەن كەلگەن ونەرپازدارعا قايتا ۇسى­نىپتى. ياعني, فەستيۆالدىڭ جابىلۋ سالتاناتىندا قازاقستاننان بارعان ونەر يەلەرى قايتادان ورتاعا شىعىپ, “قارا جورعا” ءبيىن بيلەپتى. ءبىر ايتا كەتەتىن ءجايت, “قارا جورعا” ءبيىن فەستيۆالگە قاتىسقان باسقا مەملەكەتتەردىڭ ونەرپازدارى دا, سول فەستيۆالدى ۇيىمداستىرعان جەرگىلىكتى تۇرعىندار دا بىرگە بيلەگەن كورىنەدى. ساپار بارىسىندا قازاقستاندىق ونەرپازدار سالالاس پلوۆديۆ اگرارلىق ۋنيۆەرسيتەتىندە بولىپ, وقۋ ورنىنىڭ ۇجىمىمەن دە ەتەنە تانىسىپ قايتىپتى. “فاراب” تەاترىنىڭ كوركەمدىك جەتەكشىسىنىڭ سوزىنە قاراعاندا, ءار حالىق بي ونەرىن وزگە حالىققا ۇيرەتۋ مەن تانىتۋ ماقساتىندا ءار كۇن سايىن قوسىمشا شەبەرلىك ساباقتارى وتكىزىلىپ تۇرعان بولسا, وندا قازاق حالقىنىڭ “قارا جورعا” ۇلتتىق ءبيىن ءبارى دە ىنتامەن ۇيرەنگەن كورىنەدى. باسقا مەملە­كەتتەردەن 40-50 شاقتى ونەرپازدار بارعان فەستيۆالگە قازاقستاننان 12 ادام عانا قاتىسىپتى. الايدا ونەر يەلەرى سانى جاعىنان از بولعانى-مەن, شىعارماشىلىق سىنعا كەلگەندە وزگەلەردەن اسىپ تۇسپەسە, كەم تۇسپەگەندەرى اقيقات. قاتىسۋ-شىلاردىڭ ەرەكشە ىقى­لا­سىنا بولەنگەن ەلوردالىق “فاراب” ءان-بي تەاترى 2010 جىلدىڭ اياعىندا وسى بولگاريادا وتەتىن ەسترادا اندەرىن ورىنداۋشىلاردىڭ “داس­كاۆەري” حالىقارالىق بايقاۋىنا, 2011 جىلى بولگاريا­نىڭ ۆارنا قالاسىندا وتەتىن حالىقارالىق فولكلورلىق بايقاۋعا قاتىسۋعا شاقىرتۋ الىپتى. “جولعا شىقپاس بۇرىن, بول­گاريادا دا قازاق باۋىرلارىمىز تۇراتىندىعىن ەستىگەن بولاتىنبىز. ءسويتىپ, قورجىنىمىزعا قۇرت, باۋىرساق, جەنت سەكىلدى ۇلتتىق تاعامدارىمىزدى سالىپ العان بولاتىنبىز. سوفياعا بارعاننان كەيىن سول جەردەگى قانداس باۋىر­لارىمىز الدىمىزدان شىعىپ, ءبىزدى قۇشاق جايا قارسى الدى. ارينە, جات جۇرتتا جۇرگەن ءوز باۋىرىڭدى كورگەندە ەرىكسىز تولقيدى ەكەنسىڭ. ءبىزدى كورىپ ولار دا مارقايىپ قالدى,” – دەدى ءوز سوزىندە تەاتردىڭ كوركەمدىك جەتەكشىسى مەيىرجان الياكباروۆ. اراي ۇيرەنىشبەكقىزى.