تاسباقالار مەيرامحاناعا جەتە المادى

سارىاعاش شەكارا وتريادىنا قا­راستى «قاپلانبەك» باقىلاۋ-وتكىزۋ بەكەتىندە ءوز­بەكستان ازاماتى مىنگەن «Daewoo Matiz» كولى­گىنىڭ جۇك سالعىشىنان 1955 دانا تاسباقا تابىلعان. ءۇش قاپشىق پەن ءبىر قوراپقا سالىنعان تاسبا­قالار تىرباڭداماس ءۇشىن سكوتچپەن جەلىمدەپ تاستالىپتى. شەكارا قىزمەتى «وڭتۇستىك» وڭىرلىك ءبولىمىنىڭ اعا وفيتسەرى سىرىم ورمانوۆ: «قازاقستان رەسپۋبليكاسى قىلمىستىق كو­دەكسىنىڭ 234-بابى 1- بولىگى, ياعني ەكونوميكالىق كونتراباندا دە­رەگىمەن قىلمىستىق ءىس قوزعالدى» – دەيدى. تاسباقا – كەيبىر مەملەكەتتەردە ۇلتتىق اسقا بالانادى, بىرەۋلەر ءۇشىن جەڭسىك اس. اسىرەسە, كۇنىنە سان مىڭداعان شەتەلدىك قوناقتار ساپىرىلىسىپ كەلىپ جاتاتىن ءماس­كەۋ مەيرامحانالارى داستارقان مازىرىندەگى قىمبات تاعام بولىپ سانالادى. كۇدىكتى قىتاي مەيرامحانالارىنا دا وتكىزبەك بولعان. قاسكۇنەمنەن قاشىپ تا قۇ­تىلا المايتىن تاس­باقالار ءبىرىنشى رەت شەكارا بۇزىپ جاتقان جوق. وسىدان ەكى-ءۇش جىل بۇرىن ولاردى ماسكەۋ باعىتىنا قاتى­نايتىن پويىزدىڭ جۇك سالعىشىندا بۋىلىپ-قات­تالىپ كەتىپ بارا جاتقان جەرىنەن قا­زاقستان شەكاراشىلارى مەن كەدەنشىلەرى وزبەك ازاماتىنان تاركىلەگەن ەدى. ءسويتىپ, ارىس قالا­سىنداعى اڭ-قۇستى قورعاۋ اي­ماعىنا جىبەرىلگەن. قۇمشاۋىت دالانىڭ سانىنە اينالىپ, كوزگە ءجيى شالىنار ەدى. تەگىن ولجا كورگەن بىرەۋلەر تەرىپ الىپ كەتتى مە, قازىر كوزگە تۇسە قويمايدى. باقتيار تايجان, «ەگەمەن قازاقستان». وڭتۇستىك قازاقستان وبلىسى.