كونديتەرلەر بايقاۋى

كەشە قالا كۇنى مەرەكەسىنە وراي ەلوردادا ءداستۇرلى «كونديتەرلەر فەستيۆالى» ءوتتى.  ءتاتتى تورتتى كىم جاقسى كورمەيدى دەيسىز؟ كونگرەسس-حولل سارايىنا جينالعان قالا تۇرعىندارى مەن قوناقتارىنا  14-تەن استام كونديتەرلىك ءونىم شىعاراتىن كاسىپورىن ءوز ونىمدەرىن ۇسىندى. جوبا  ماقساتى − كونديتەرلىك كاسىبي شەبەرلىكتى شىڭداي وتىرىپ, اسپازداردىڭ ءتاتتى تاعامدار دايىنداۋداعى قارىم-قابىلەتى مەن  مۇمكىندىكتەرىن كوپشىلىككە كەڭىنەن تانىستىرۋ, دارىپتەۋ. ال, ۇيىمداستىرۋشىلاردىڭ پىكىرىنشە, فەستيۆال قوعام­دىق تاماقتانۋ سالاسىندا مامانداردىڭ كاسىبي دەڭگەيىن ارتتىرۋعا سەپ بولماق. تورتتار − ءتاتتى پيروگتار ءتۇرى.  يتاليادا شىعارىلعان. يتاليا تىلىندە كونديتەر دەگەنىمىز −  تورت دايىنداۋشى − تورتايو دەپ اتالادى. تورتتار −  ءارتۇرلى پىشىندە دايىندالاتىن ءونىم. ءاربىر تورتتىڭ باستى ينگرەديەنتى − كرەم. سول كرەمنەن سان الۋان بەينەدەگى, ءتىپتى, ادام ساناسىنا سىيمايتىن ءتاتتىنىڭ نەبىر اتاسى جاسالادى. جاسىراتىنى جوق, كەيدە ادامنىڭ ۇشقىر قيالى مەن التىن ۋاقىتىن جۇمساعان ۇلكەن ەڭبەگىن ءبىر دەمدە تامسانا جەپ قويۋعا ءداتىڭ بارماي تۇ­رادى. كەيدە, ونىسىن كادەسىي – ەسكەرتكىشكە بالاپ, كەسۋگە باتىلىڭ جەتپەي جاتاتىن ساتتەر كوپ. «كونديتەرلەر فەستيۆالى» اياسىندا استانانىڭ اسەمدىگىن ايشىقتاعان, سوسىن ەلوردا سيمۆولى – قار بارىسى, «جايلاۋ» كورىنىستەرىن پاش ەتەتىن تورتتار كوپشىلىك نازارىن انادايدان وزىنە اۋدارادى.  بۇل جولى دا تاتتىدەن باس تارتپايتىن جۇرتشىلىق ولار­عا ءوز تاڭداۋلارىن جاساپ جاتتى. سونداي-اق, مەرەكەلىك شارا شەڭبەرىندە ارنايى مامانداردان كوميسسيا  قۇرىلىپ, ولار دا اسپاز ەڭبەگىنە وڭ باعا بەردى. بايقاۋ قورىتىندىسىنا سايكەس «ۇزدىك مەرەكەلىك تورت» اتا­لىمىن «اپرەل-2030» جشس, «ءتاتتى تۋىندى» اتالىمىن «ماد­لەن» جشس, ­سون­داي-اق, «ءتات­تىلەر پاتشاسى» اتا­لى­مى بويىنشا «Lucky café» كاسىپ­ورنى جەڭىمپاز اتانىپ, ­ارقاي­سى­سى پلازمالىق تەلەديدار يەلەندى. بايقاۋعا قاتىسقان باسقا دا ۇمىتكەرلەرگە باعالى سىيلىق­­تار تارتۋ ەتىلدى. مەرەكەلىك شارا سوڭى كونتسەرتتىك باعدارلاماعا ۇلاستى. راۋشان تاۋىرحانقىزى, جۋرناليست. سۋرەتتى تۇسىرگەن ەرلان وماروۆ.