تاراز. 3 شىلدە. جۇمىس ناۋقانىنىڭ العاشقى كۇندەرى جامبىل وبلىسىندا 12 مىڭنان استام گەكتار القاپتىڭ ەگىنى ورىلىپ, ماساقتى داقىلدىڭ تۇسىمدىلىگى 8,1 تسەنتنەردى قۇرادى. بۇل تۋرالى egemen.kz ءتىلشىسى حابارلادى.
وبلىس شارۋالارىنىڭ باستى مىندەتى -- ەل ىرىسىن ىسىراپسىز جيناپ الۋ بولىپ تۇر. وبلىستىق اۋىل شارۋاشىلىعى باسقارماسى باسشىسىنىڭ مىندەتىن اتقارۋشى بەيبىتبەك جايلىباەۆتىڭ ايتۋىنا قاراعاندا, بيىل وبلىستا اۋىل شارۋاشىلىعى داقىلدارىنىڭ ەگىس القاپتارى 557 000 گەكتاردى قۇراپ, وتكەن جىلدىڭ جوسپارىمەن سالىستىرعاندا 12 400 گەكتارعا ۇلعايعان. وبلىس بويىنشا 237 500 گەكتار ماساقتى ءداندى داقىلدار وراققا تۇسەدى دەپ جوسپارلانىپ وتىر. ونىڭ 103 900 گەكتارى كۇزدىك بيداي بولسا, 132 900 گەكتارى جازدىق ماساقتى داقىلدار.
«ەڭبەك ەتپەسەڭ, ەلگە وكپەلەمە, ەگىن ەكپەسەڭ, جەرگە وكپەلەمە» دەگەن, بۇگىندە جامبىلدا التىن ءداننىڭ ارقاسىندا داۋلەتىن اسىرىپ, اسىعى الشىسىنان ءتۇسىپ وتىرعان شارۋاشىلىقتار جەتەرلىك. بيىل وسى وڭىردەگى جامبىل اۋدانىندا 6 مىڭ گەكتار كۇزدىك بيداي ورىلادى. بەرەكەلى تىرلىكتەرىنىڭ ارقاسىندا تابىستارىن ەسەلەپ جۇرگەن وسى اۋدانداعى «پيونەر», «قىزىل ديقان», «ەرەكە», «امانگەلدى» شارۋاشىلىقتارىنىڭ ديقاندارى ناۋقاندى باستاپ تا كەتتى. جامبىل وبلىسىنىڭ اكىمى كارىم كوكىرەكباەۆ اللانىڭ بەرگەن ريزىعىن توكپەي-شاشپاي جيناپ الۋ ءۇشىن ءار اۋداننان وسى ناۋقانعا جاۋاپتى كوميسسيا قۇرۋدى تاپسىردى.
قالاي ايتساق تا, بيىلعى جىل نەسىبەسىن جەردەن تەرگەن اۋىل ادامدارىنا مول بەرەكەسىن سىيلاپ-اق تۇر. لايىم, قامبامىز دانگە, دالامىز انگە تولا بەرسىن!
ورالحان ءداۋىت.
دەرەك, سۋرەت: egemen.kz.
