شىعىسقازاقستاندىق اۆتووندىرۋشىلەر كورەيالىق قارجى توبىمەن كەلىسىم جاسادى

وسكەمەن. 3 شىلدە. وڭتۇستىككورەيالىق Shinhan Finance پەن «بيپەك اۆتو – ازيا اۆتو» حولدينگى ءوزارا ىنتىماقتاستىق تۋرالى كەلىسىم جاسادى. بۇل تۋرالى egemen.kz حابارلادى. وسىعان بايلانىستى «شينحان فينانس» جشس مەن «بيپەك اۆتو قازاقستان» جشس اراسىندا مەموراندۋمعا قول قويىلدى. تاراپتار ساتىپ الۋشىلاردى جاڭا اۆتوكولىكتەرمەن, ساتىپ الۋدىڭ ءتيىمدى شارتتارىمەن قامتاماسىز ەتەتىن اۆتونەسيەلەندىرۋدىڭ بىرلەسكەن باعدارلاماسىن ازىرلەمەك. ازيالىق جەتەكشى قارجىلىق توپتاردىڭ اۋقىمدى رەسۋرستارىنا يە نەسيەلىك ۇيىم مەن قازاقستاننىڭ ءىرى اۆتوحولدينگىنىڭ سەرىكتەستىگى وتاندىق ساتىپ الۋشىلارعا اۆتونەسيەلەندىرۋدىڭ بارىنشا قولايلى مۇمكىندىكتەرىن قامتاماسىز ەتۋگە باعىتتالادى دەپ كۇتىلۋدە. Shinhan Financial Group – كورەيا رەسپۋبليكاسىنىڭ ءىرى قارجى حولدينگى. توپتىڭ قۇرامىندا جۇمىس اتقاراتىن 12 كومپانيا كورپوراتيۆتىك نەسيەلەندىرۋ, ينۆەستبانكينگ, اكتيۆتەردى باسقارۋ, بروكەرلىك جانە ساقتاندىرۋ سەرۆيسىن قوسا العاندا, قارجى قىزمەتتەرىنىڭ تولىق سپەكترىن ۇسىنادى. «جىل باسىنان بەرى بىزدەن كولىك ساتىپ العان 23 155 قازاقستاندىقتىڭ 60 پايىزى بانك قارىزىن پايدالاندى. وتاندىق تۇتىنۋشىلاردىڭ باسىم بولىگى جاڭا اۆتوكولىكتى نەسيەگە ساتىپ الۋدا. سوندىقتان, 2014 جىلى بايقالعان اۆتونەسيەلەندىرۋ شارتتارىنىڭ قاتاڭداۋى رەسپۋبليكانىڭ اۆتوكولىك نارىعىنداعى باسىم فاكتورلاردىڭ ءبىرى بولىپ قالادى. ەلىمىزدەگى تۇتىنۋشىلىق نەسيەسىنىڭ قارقىنى قىسقارۋى جالعاسۋدا, ال قىزمەت كورسەتۋدىڭ ورتاشا مولشەرلەمەسى 20 پايىزدان ارتىق. Shinhan Finance سياقتى قارجى ينستيتۋتىنىڭ قازاقستان نارىعىنا شىعۋى وسىنداي كۇردەلى كەزەڭدە نارىقتىڭ تۇراقتانۋىنا كومەگىن تيگىزەدى. ەڭ باستىسى, كاسىپورىننىڭ ونداعان مىڭ تۇتىنۋشىلارى ءۇشىن جاڭا اۆتوكولىك ساتىپ الۋدى ءتيىمدى ەتەدى جانە جەڭىلدەتەدى», – دەدى «بيپەك اۆتو» فيليالدارىن دامىتۋ دەپارتامەنتىنىڭ ديرەكتورى ايدار مەڭدىباەۆ. دۋمان اناش. دەرەك, سۋرەت: egemen.kz.