پاۆلودار. 3 شىلدە. تەلەكوپىر بارىسىندا «قازاۆتوجول ۇك» اق باسقارما توراعاسىنىڭ ورىنباسارى ۇلان ءالىپوۆ ەلىمىزدەگى قۇرىلىسى جۇرگىزىلىپ جاتقان ىرى جوبالاردىڭ ءبىرى – پاۆلودار-سەمەي اراسىنداعى جالپى ۇزىندىعى 1 018 شاقىرىم قۇرايتىن جول «ورتالىق-شىعىس» ءدالىزى بولىپ سانالاتىنىن ايتتى. بۇل تۋرالى egemen.kz ءتىلشىسى حابارلادى.
قازىر جۇمىستار ارالىعى 500 شاقىرىم بولاتىن 16 ۋچاسكەدە ءجۇرىپ جاتىر. ونىڭ ىشىندە 100 شاقىرىمى بيىلعى جىلى پايدالانۋعا بەرىلەدى. ءدالىزدىڭ قۇرىلىسى جۇرگىزىلىپ جاتقان نىسانداردىڭ ءبىرى ەرتىس وزەنى ارقىلى وتەتىن كوپىر وتكەلىن جۇمىستار وندىرىستىك كەستەگە سايكەس جۇرگىزىلۋدە.
كەلەسى جىلى استانانىڭ جولى «پاۆلودار-سەمەي» اۆتوجولىمەن وسى كوپىر ارقىلى جالعاسادى. وبلىس اكىمى قانات بوزىمباەۆتىڭ ايتۋىنشا, وبلىستا يندۋستريالاندىرۋ باعدارلاماسىنىڭ ءبىرىنشى بەسجىلدىعىندا 274 ملرد تەڭگەگە 68 جوبا ىسكە قوسىلسا, 5 جارىم مىڭ جۇمىس ورىندارى اشىلدى.
جالپى, قازىر وبلىستا مۇناي, حيميا, مەتاللۋرگيا, تەمىرجول, ماشينا جاساۋ جانە ونەركاسىپتىڭ باسقا سالالارىنا قاتىستى 60 اسا ءونىم تۇرلەرى شىعارىلا باستادى. بۇگىنگى كۇنى جوبالاردىڭ نەگىزگى بولىگى ياعني, 53 جوبا وندىرىستىك قۋاتتىڭ جوسپارلى كورسەتكىشتەرىنە جەتتى. ونەركاسىپتىك ءوندىرىستىڭ جالپى كولەمىندەگى وسى جوبالاردىڭ ۇلەسى 11 پايىزدى قۇراپ وتىر (589 ملرد. تەڭگە). سونىمەن قاتار 7 جوبا جالپى قۇنى 500 ملرد. تەڭگەگە ءونىمدى ەكسپورتقا شىعاردى. وسىنىڭ بارلىعى ءوڭىردىڭ ينۆەستيتسيالىق بەلسەندىلىگىنە اسەر ەتتى. جىل سايىن ينۆەستيتسيالار كولەمى ورتاشا ەسەپپەن العاندا 20-25پايىزعا ارتۋدا. وتكەن جىلى 348 ملرد تەڭگەگە جەتتى. كۇنى كەشە عانا وبلىس ورتالىعىندا № 3 جىلۋ ەلەكتر ورتالىعىندا ەنەرگەتيكالىق قۋاتتىلىعى 255 مۆت-تى قۇرايتىن جاڭا ترۋبينا ىسكە قوسىلدى. جاڭا ترۋبينانى ورناتۋ قالانىڭ جىلۋ مەن ەلەكتر ەنەرگياسىنا دەگەن قاجەتتىلىگىن تولىق قامتاماسىز ەتۋگە مۇمكىندىك بەرەدى.
فاريدا بىقاي.
دەرەك: egemen.kz
سۋرەت: ۆالەري بۋگاەۆ.
