ەلباسى ورالداعى ترانسفورماتور زاۋىتىندا بولدى

استانا. 2 ءساۋىر. ەلباسى باتىس قازاقستان وبلىسىنا ساپارى بارىسىندا «ورال ترانسفورماتور زاۋىتى» جاۋاپكەرشىلىگى شەكتەۋلى سەرىكتەستىگىندە بولدى. مەملەكەت باسشىسى ول جەردە قۋاتتى ترانسفورماتورلار جاساۋ ۇدەرىسىمەن تانىسىپ, زاۋىتتىڭ دايىن ونىمدەرىن كوردى. بۇل تۋرالى اقوردانىڭ ءباسپاسوز قىزمەتىنە سۇيەنىپ egemen.kz حابارلادى. سونداي-اق, نۇرسۇلتان نازارباەۆ ەڭبەك ۇجىمىمەن اڭگىمەلەستى. قازاقستان پرەزيدەنتى مەملەكەت كورسەتكەن قولداۋدىڭ ارقاسىندا كاسىپورىن قالپىنا كەلتىرىلگەنىن جانە بۇگىندە ودان ءارى دامۋعا دايىن ەكەنىن ايتتى. كاسىپورىننىڭ قازىر ءوز ونىمدەرىن ەۋرازيالىق ەكونوميكالىق وداق ەلدەرىنە ەكسپورتتاۋعا بارلىق مۇمكىندىگى بار. زاۋىت جۇمىسشىلارى يندۋستريالىق ساياساتتىڭ ءىس جۇزىنە اسىپ جاتقانى تۋرالى ايتىپ, مەملەكەت حالىقتىڭ ءال-اۋقاتىن ارتتىرۋعا, ەلدەگى تۇراقتىلىقتى قامتاماسىز ەتۋگە كۇش-جىگەر جۇمساپ وتىرعانى ءۇشىن العىس ايتتى. يتاليانىڭ, شۆەيتساريانىڭ جانە نەمىستىڭ زاماناۋي تەحنيكالارىمەن جابدىقتالعان زاۋىتتىڭ جوبالىق قۋاتى جىلىنا 10 مىڭ ترانسفورماتور شىعارۋعا ەسەپتەلگەن. مۇناي-گاز سالاسىنىڭ كومپانيالارى, ەنەرگەتيكالىق كەشەن مەن تەمىرجول كولىگى كاسىپورىندارى وسى ءونىمنىڭ نەگىزگى تۇتىنۋشىلارى بولىپ سانالادى. ەلامان قوڭىر. دەرەك: egemen.kz. سۋرەت: infoportal.kz.