فۋتبول. ەۋروپا ليگاسىنىڭ ىرىكتەۋ كەزەڭى باستالدى

استانا. 3 شىلدە. كەشە فۋتبولدان ۋەفا ەۋروپا ليگاسىنا ىرىكتەۋ كەزەڭىنىڭ ءبىرىنشى ويىندارى وينالدى. بۇل سىندا ەل نامىسىن ءۇش بىردەي كوماندامىز قورعاۋدا. ولار: «اقتوبە», «ورداباسى» جانە «قايرات». العاشقى ەكەۋى كەزدەسۋلەرىن ءوز الاڭدارىندا وتكىزسە, «قايرات» سەربياعا قوناققا باردى. بۇل تۋرالى egemen.kz حابارلادى. «ورداباسى» (شىمكەنت, قازاقستان) – «بەيتار» (يەرۋساليم, يزرايل) 0:0 شىمكەنتتە «ورداباسى» يزرايلدەن كەلگەن «بەيتار» كومانداسىن قابىلدادى. قاراعاندىنىڭ «شاحتەرىن» جاتتىقتىرعان كەزىندە نەگىزىنەن قورعانىسقا دەن قوياتىن مامان ۆيكتور كۋمىكوۆ بۇل جولى «ورداباسى» ويىنشىلارىن شابۋىلعا جىبەردى. ونىڭ بۇل ءتاسىلى ءوز جەمىسىن بەرىپ, شىمكەنتتىكتەر ءبىرىنشى تايمدا بىرنەشە وتكىر شابۋىلدار ۇيىمداستىردى. بۇل رەتتە «ورداباسى» ساپىنداعى وزبەكستاندىق لەگيونەر الەكساندر گەينريحتىڭ ويىن ورنەگىن ەرەكشە ايتىپ وتكەن ءجون. ەكىنشى تايمدا دا الاڭ يەلەرىنىڭ باسىمدىعى بايقالدى. دەگەنمەن, تورەشىنىڭ ىسقىرىعى ەستىلگەنگە دەيىن ەسەپ اشىلعان جوق. ماتچ بارىسىندا شىمكەنتتىكتەر 14 رەت قاقپاعا سوققى جاساسا, قارسىلاستار 6 مارتە نىساناعا دوپ باعىتتاپ كوردى. «اقتوبە» (اقتوبە, قازاقستان) – «نىممە كاليۋ» (تاللين, ەستونيا) 0:1 (0:0) گول: اتسۋ پۋرە 72. كەلەسى ويىن اقتوبەدە وينالدى. جەرگىلىكتى «اقتوبە» ەستونيادان كەلگەن «نىممە كاليۋ» كومانداسىمەن كۇش سىناستى. بارلىق ستاتيستيكالىق كورسەتكىشتەر بويىنشا اقتوبەلىكتەر باسىم بولعانىمەن, ويىن ناتيجەسى قوناقتاردىڭ پايداسىنا 1:0 بولىپ تىركەلدى. قارىمتا شابۋىلداردىڭ بىرىندە ەستوندار قورعاۋشىلارىمىزدىڭ قاتەلىگىن ۇتىمدى پايدالانىپ كەتتى. 72-مينۋتتا سوعىلعان سول گول ويىن تاعدىرىن شەشتى. «تسرۆەنا زۆەزدا» (بەلگراد, سەربيا) – «قايرات» (الماتى, قازاقستان) 0:2 (0:1) گولدار: جەرار گوۋ 45, ەرمەك قۋانتاەۆ 64. ال «قايرات» سەربيادا سول ەلدىڭ داڭقتى كومانداسى «تسرۆەنا زۆەزداعا» قارسى الاڭعا شىقتى. ويىن بىردەن قوناقتاردىڭ شابۋىلىمەن باستالدى. ماتچتىڭ 2-مينۋتىندا قاقپاشىمەن بەتپە-بەت كەلگەن «قايرات» شابۋىلشىسى جەرار گوۋدى قورعاۋشى ساۆو پاۆيچەۆيچ رۇقسات ەتىلمەگەن ادىسپەن توقتاتتى. ناتيجەسىندە تورەشى بىردەن قىزىل قاعاز كورسەتىپ, ونى الاڭنان قۋدى. بۇل جايت «تسرۆەنا زۆەزدانىڭ» ويىن جوسپارىنا ايتارلىقتاي وزگەرىس اكەلدى. ال «قايرات» ويىنشىلارى باسىمدىقتى ءوز قولدارىنا الىپ, ماتچ سوڭىنا دەيىن ءبىرىنشى نومىرمەن وينادى. ناتيجەسىندە الماتىلىقتار ءار تايمدا ءبىر گولدان سوعىپ, 2:0 ەسەبىمەن جەڭىسكە جەتتى. ايتا كەتەيىك, قارسىلاستار 9 شىلدەدە قارىمتا ويىندارىن وتكىزەدى. ول كەزدە ەرەجەگە سايكەس «قايرات» ءوز الاڭىندا ويناسا, «اقتوبە» مەن «ورداباسى» قوناققا بارادى. ەلامان قوڭىر. دەرەك: egemen.kz. سۋرەت: sports.kz.