ەلباسى ورالداعى رەسمي ءىس-شارالار سارايىندا بولدى

استانا. 2 ءساۋىر. ەلباسى باتىس قازاقستان وبلىسىنا ساپارى بارىسىندا رەسمي ءىس-شارالار سارايىندا بولدى. ول جەردە پرەزيدەنت باتىس قازاقستان وبلىسىنداعى ەتنو-مادەني بىرلەستىكتەر, شىعارماشىل زيالى قاۋىم وكىلدەرىمەن جانە اۋعان سوعىسى جاۋىنگەرلەرىمەن اڭگىمەلەستى. بۇل تۋرالى اقوردانىڭ ءباسپاسوز قىزمەتىنە سۇيەنىپ egemen.kz حابارلادى. مەملەكەت باسشىسى قازاقستان حالقى اسسامبلەياسى قىزمەتىنىڭ ماڭىزدىلىعىنا توقتالدى. «ءبىر-بىرىمىزگە دەگەن قۇرمەت, تولەرانتتىلىق بولعاندا عانا ەلدىڭ ورنىقتى دامۋى ساقتالادى. مەن قازاقستان حالىقتىڭ بىرلىگىنىڭ ارقاسىندا عانا ىلگەرىلەپ كەلە جاتقانىن ۇنەمى ايتىپ كەلەمىن. ۇلى وتان سوعىسىنداعى جەڭىستىڭ 70 جىلدىعى تاياپ قالدى. ءبىزدىڭ باقىتىمىز – جەڭىمپاز اكەلەردىڭ بالالارى بولعاندىعىمىز. بىزگە ارداگەرلەرىمىزدى قادىرلەپ, جاستاردى تاريحقا قۇرمەتپەن قاراۋ تۇرعىسىنان تاربيەلەۋ قاجەت. سونداي-اق, ءبىز بيىل باسقا دا ماڭىزدى داتالاردى اتاپ وتەتىن بولامىز», – دەدى نۇرسۇلتان نازارباەۆ. بارلىق ەتنوستاردىڭ اتىنان سويلەۋشىلەر مەملەكەت باسشىسىنا تاتۋلىق پەن كەلىسىمگە, كاسىپكەرلىكپەن اينالىسۋعا مول مۇمكىندىكتەر مەن جاعدايلار جاساۋعا, حالىقتىڭ ءال-اۋقاتىن ارتتىرۋعا باعىتتالعان ساياسات ءۇشىن العىس ايتتى. ەلامان قوڭىر. دەرەك, سۋرەت: egemen.kz.