قوشقارباي قورىمىنىڭ جادىگەرلەرى

اقمولا وبلىستىق ارحەولوگيالىق ەكسپەديتسياسى زەرەندى اۋدانىنىڭ كەڭوتكەل اۋىلىنا جاقىن ورنالاسقان جەردە كەزەكتى جۇمىسىن باستادى. ءوڭىر تورىندەگى قوشقارباي قونىسى ەرەكشە تاريحي-مادەني ايماق بولىپ سانالادى. مۇندا 150-دەن اسا ارحەولوگيالىق نىسان بار. وسىندا تابىلعان قۇندى جادىگەرلەر ءارتۇرلى كەزەڭدەگى, قولا داۋىرىنەن ورتا عاسىرعا دەيىنگى تاريحتى سيپاتتايدى. تاريحي-مادەني مۇرانى قورعاۋ جانە پايدالانۋ ورتالىعىنىڭ ماماندارى جادىگەرلەر سانىنىڭ كوپتىگىن ءوڭىر تابيعاتىنىڭ ادامدار ءۇشىن ءومىر سۇرۋگە قولايلىلىعىمەن تۇسىندىرەدى. وزەن-سۋدىڭ مولدىعى, مال جايىلىمىنىڭ كەڭدىگى مەن تابيعي-كليماتتىق جاعدايدىڭ دۇرىستىعى ءومىر كوشىنىڭ ارتىقشىلىعىن قامتاماسىز ەتكەنى انىق. مۇندا توقىما, قىش ىدىستار مەن اشەكەي بۇيىمدار جاساۋ, مال شارۋاشىلىعى ايرىقشا دامىعان. مىسالى, بيىلعى ون كۇندىك جۇمىس كۇنىندە عانا قوشقارباي قورىمىنان ادام سۇيەگىنىڭ قاڭقاسى, قولا بۇيىمدار, ءتۇرلى اشەكەيلەر مەن القالار تابىلىپ وتىر. سونداي-اق, ۇلكەن ولجا رەتىندە الاكول جانە اندرونوۆ كەزەڭىنە جاتاتىن ءتورت ىدىستى ايتۋعا بولادى. ورتالىق ديرەكتورى تالعات ىبىراەۆ­تىڭ ايتۋىنشا, ەرتە داۋىردەگى ادامدار قايتىس بولعاننان كەيىنگى ءومىردىڭ بار­لىعىنا سەنگەن. سوندىقتان, جەرلەۋ ءراسىمى قۇرباندىق شالۋمەن قاتار جۇرگىزىلگەن. ياعني, مارقۇمدار اشەكەي, تۇرمىستىق زاتتار, ىدىس-اياقتارمەن بىرگە كومىلگەن. بۇگىنگى جادىگەرلەر وسى پايىمداۋدى راستاي تۇسەدى. جالپى, قوشقارباي قورىمىنداعى 6 ارحەولوگيالىق نىساننان 38 ارتەفاك, 30 قولا بۇيىم مەن 8 قىش ىدىس انىقتالىپ, مادەني-تاريحي يگىلىگىمىزگە جاراتىلۋدا. ال, ءۇش مۇرا بويىنشا قايتا قالپىنا كەلتىرۋ جۇمىستارى جۇرگىزىلدى. ەكسپەديتسيا جۇمىسىنا ش.ءۋاليحانوۆ اتىنداعى كوكشەتاۋ مەملەكەتتىك ۋني­ۆەر­سيتەتى مەن ا.مىرزاحمەتوۆ اتىن­داعى ۋني­ۆەرسيتەتتىڭ ستۋدەنتتەرى مەن كراسنىي يار اۋىلىنىڭ №2 مەكتەبى مەن «اۋلەت» سىنىپ­تان تىس جۇمىس ورتا­لى­عىنىڭ وقۋ­شىلارى, ياكۋتيالىق ماماندار قاتىسۋدا. باقبەرگەن امالبەك, «ەگەمەن قازاقستان». اقمولا وبلىسى, زەرەندى اۋدانى. سۋرەتتە: قازبا جۇمىسى بارى­سىن­داعى تابىلعان قىش ىدىستار.