سەمەيدەگى گەماتولوگيا ورتالىعىنىڭ قۇرىلىسىنا 1,2 ملرد تەڭگە ءبولىندى

وسكەمەن. 21 مامىر. KAZ Minerals توبى سەمەي قالاسىنداعى رەسپۋبليكالىق گەماتولوگيا ورتالىعىنىڭ قۇرىلىسىنا 1,2 ملرد تەڭگە بولەدى. بۇل تۋرالى شىعىس قازاقستان وبلىسىنىڭ اقپاراتتىق ورتالىعىنا سىلتەمە جاساپ egemen.kz ءتىلشىسى حابارلادى. دەمەۋشىلىك كومەك كورسەتۋ تۋرالى مەموراندۋمعا وبلىس اكىمى دانيال احمەتوۆ پەن KAZ Minerals توبىنىڭ باسقارما توراعاسى ولەگ نوۆاچۋك قول قويدى. اتالعان ورتالىق قان جۇيەسى اۋرۋلارىنا دياگنوستيكا جاساۋدا جانە ەمدەۋدە (ونىڭ ىشىندە سۇيەك كەمىگىن ترانسپلانتاتسيالاۋ) جوعارى تەحنولوگيالى ادىستەردى قولدانۋ ارقىلى حالىققا قول جەتىمدى ءارى ساپالى قىزمەت كورسەتۋگە مۇمكىندىك بەرەدى. جوسپار بويىنشا بۇل ورتالىق ەلىمىزدەگى ونكوگەماتولوگيالىق پروفيل, گەموستازدىڭ بۇزىلۋى, انەميا جانە تاعى باسقا اۋرۋلارعا شالدىققان قان جانە ليمفو جۇيەسى دەرتتەرى بار ناۋقاستارعا مەديتسينالىق كومەك كورسەتەتىن بىرەگەي كلينيكالىق كەشەن بولماق. جوبادا ورتالىقتىڭ اۋماعىندا بالالارعا اتا-انالارىمەن بىرگە ورنالاسۋعا مۇمكىندىك بەرەتىن پانسيونات قاراستىرىلعان. ورتالىقتىڭ جانىندا حيميا تەراپيانىڭ اۋىر كۋرستارىنان وتكەن جانە سۇيەك كەمىگى ترانسپلانتاتسيالانعان ناۋقاستارعا قىزمەت كورسەتەتىن وڭالتۋ ورتالىعى جۇمىس ىستەيتىن بولادى. سوڭعى 5 جىلدا كومپانيا شىعىس قازاقستانداعى ءتۇرلى الەۋمەتتىك نىسانداردىڭ قۇرىلىسى مەن جوندەۋ جۇمىستارىنا 5,4 ملرد تەڭگەدەن استام قاراجات ءبولدى. توپتىڭ قارجىلاندىرۋى ارقاسىندا ايماقتاعى ءبىلىم, دەنساۋلىق جانە سپورت سالالارى بويىنشا عيماراتتار سالىندى. سونداي-اق, KAZ Minerals توبى وبلىستىق اۋرۋحانانى ورتوپەديالىق جانە تراۆماتولوگيالىق وپەراتسيالارعا ارنالعان جابدىقتارمەن قامتاماسىز ەتتى. دۋمان اناش. دەرەك: شىعىس قازاقستان وبلىسىنىڭ اقپاراتتىق ورتالىعى. سۋرەت: rnpc.kz.