ەلباسى «جاستار قۋاتتى قازاقستان ءۇشىن!» رەسپۋبليكالىق فورۋمىنا قاتىستى

استانا. 2 ءساۋىر. ەلباسى باتىس قازاقستان وبلىسىنا ساپارى بارىسىندا «جاستار قۋاتتى قازاقستان ءۇشىن!» اتتى رەسپۋبليكالىق فورۋمىنا قاتىستى. بۇل تۋرالى اقوردانىڭ ءباسپاسوز قىزمەتىنە سۇيەنىپ egemen.kz حابارلادى. فورۋمعا ستۋدەنت, سپورتشى, شىعارماشىل جانە جۇمىسشى جاستاردىڭ 2 000-عا جۋىق وكىلى كەلدى. سونداي-اق, اتىراۋ جانە ماڭعىستاۋ وبلىستارىنىڭ جاستارى دا تىكەلەي ەفير ارقىلى وسى ءىس-شاراعا قاتىستى. مەملەكەت باسشىسى قاتىسۋشىلاردى فورۋم جۇمىسىنىڭ باستالۋىمەن قۇتتىقتاپ, جاستاردىڭ نەگىزگى باستامالاردى جۇزەگە اسىرۋعا بەلسەنە قاتىسىپ جۇرگەنىنە توقتالدى. «قازاقستان قاتاڭ كليمات جاعدايىندا جەرىمىزدى ورمانعا اينالدىرۋ ءۇشىن كۇش سالۋدا. «جاسىل ەل» باعدارلاماسى اياسىندا 115 مىڭ گەكتار اۋماقتا 50 ميلليون اعاش وتىرعىزىلدى. 200 مىڭدىق «جاسىل ەل» كومانداسىنىڭ بۇل ەڭبەگى ەرلىككە بارا-بار. «ديپلوممەن – اۋىلعا!» باعدارلاماسى بويىنشا 30 مىڭ جاس اۋىلعا اتتاندى. بۇل جاستاردىڭ ەلدى جانە ونىڭ شالعاي مەكەندەرىن دامىتۋعا قاتىسۋىنىڭ كورسەتكىشى بولىپ سانالادى. قازاقستان جاستارعا ءتۇرلى سالالاردا قامقورلىق كورسەتەدى, سونىڭ ىشىندە ولاردى شەتەلدەردە وقىتادى. رەسپۋبليكادا ءبىلىمدى ەڭبەك تاجىريبەسىمەن ۇشتاستىراتىن دۋالدى وقىتۋ جۇيەسىن ەنگىزۋ شارالارى قابىلدانۋدا. بۇگىندە بەلسەندى ءارى ماقساتشىل جاستار ءۇشىن ەلىمىزدە بارلىق مۇمكىندىكتەر بار», – دەدى مەملەكەت باسشىسى. قازاقستان پرەزيدەنتى فورۋمعا نيەتى ءبىر, تىلەگى ورتاق مىڭداعان قازاقستاندىق جاس قاتىسىپ وتىرعانىن ايتتى. «ءبىز بىرلەسىپ قۋاتتى ەل قالىپتاستىرامىز. وسىنىڭ ءبارى سىزدەر ءۇشىن جاسالۋدا. 4 جىلدا قارجىلاندىرۋ كولەمى ءبىلىم بەرۋدە 2 ەسەگە, عىلىمدا 2,5 ەسەگە, دەنساۋلىق ساقتاۋدا 1,5 ەسەگە ۇلعايدى. بۇكىل ەل بويىنشا ءبىز جوعارى وقۋ ورىندارىندا تەگىن وقۋ ءۇشىن جىل سايىن 35 مىڭ گرانت بولەمىز. نازارباەۆ ۋنيۆەرسيتەت, زياتكەرلىك مەكتەپتەر جەمىستى جۇمىس ىستەۋدە. ءبىز يندۋستريالاندىرۋدىڭ ءبىرىنشى بەسجىلدىعىن تابىستى اياقتادىق. ونىڭ اياسىندا 700 كاسىپورىن سالىنىپ, 60 مىڭ جاڭا جۇمىس ورنى اشىلدى. ەلگە 200 ميلليارد دوللار شەتەلدىك تىكەلەي ينۆەستيتسيا كەلدى. بارشانىڭ ەڭبەگىنىڭ ارقاسىندا ەلىمىز الەمنىڭ مەيلىنشە دامىعان 50 مەملەكەتىنىڭ قاتارىنا كىردى», – دەدى نۇرسۇلتان نازارباەۆ. مەملەكەت باسشىسى باتىس قازاقستان ءوڭىرىنىڭ تۇراقتى ەكونوميكالىق ءوسىمىن, الەۋمەتتىك ماسەلەلەردىڭ شەشىلىپ جاتقانىن, وتباسىلاردىڭ ءال-اۋقاتى ارتقانىن اتاپ ءوتتى. «وبلىستارىڭىزدا سوڭعى جىلدارى 260 ميلليارد تەڭگەنىڭ سوماسىنا 34 كاسىپورىن سالىندى جانە جاڭعىرتىلدى. وندا ەكى مىڭنان استام ادام جۇمىسقا ورنالاستى. ونەركاسىپتىك ءوندىرىس كولەمى نەبارى 3 جىلدا 2 ەسە ءوستى. قورعانىس كەشەنى كاسىپورنى تابىستى دامىپ كەلەدى, سونىڭ ارقاسىندا ءبىزدىڭ كەمە جاسايتىن سالامىز جانە ءوز تەڭىز فلوتىمىز بار. ءبىز شاعىن كاسىپكەرلىكتىڭ دامۋىنا قول ۇشىن سوزامىز. «بيزنەستىڭ جول كارتاسى – 2020» باعدارلاماسى بويىنشا تەك باتىس قازاقستان وبلىسىندا بىلتىر 1,7 ميلليارد تەنگە ءبولىندى, 9,5 ميلليارد تەڭگەگە 123 جوبا جۇزەگە اسىرىلدى. «جۇمىسپەن قامتۋ – 2020» باعدارلاماسى بويىنشا وبلىستا 12 مىڭ جاس جۇمىسقا ورنالاستى», – دەدى قازاقستان پرەزيدەنتى. نۇرسۇلتان نازارباەۆ سونداي-اق, «نۇرلى جول» باعدارلاماسىنىڭ نەگىزگى باعىتتارىنا جانە وڭىردەگى يندۋستريالىق جوبالاردىڭ جۇزەگە اسىرىلۋ بارىسىنا توقتالدى. «ءبىز جولدار, الەۋمەتتىك نىساندار مەن جاستار ءۇشىن باسپانا سالىپ جاتىرمىز. سوڭعى 2 جىلدا وبلىستا 360 جاس وتباسى پاتەر الدى. ياعني, 1 000-نان استام ادام باسپانالى بولدى. «نۇرلى جول» اياسىندا وبلىستارىڭىزدا ورال-كامەنكا تاس جولى قايتا جوندەلەدى. قوسىمشا ينۆەستيتسيا تارتۋ ءۇشىن جاڭا يندۋستريالىق ايماق قۇرىلۋدا. جالپى قۇنى 44 ميلليارد تەڭگەنىڭ ەكى يندۋستريالىق نىسانىن ىسكە قوسۋ جوسپارلانۋدا. قۇنى 2,5 ميلليارد تەڭگە تاعى 3 جوبا جۇزەگە اسىرىلىپ جاتىر, ولار كەلەر جىلى ىسكە قوسىلادى. الدا ۇلكەن جوسپار جانە اۋقىمدى جۇمىس بار. ەڭبەكقور حالىق ءۇشىن بۇل سوڭعى شەك ەمەس دەپ ويلايمىن», – دەدى مەملەكەت باسشىسى. قازاقستان پرەزيدەنتى فورۋمعا كوپتەگەن بەلگىلى سپورتشىلار قاتىسىپ وتىرعانىنا نازار اۋداردى. «ءبىزدىڭ يليا يلين, گەننادي گولوۆكين, دەنيس تەن, الەكساندر ۆينوكۋروۆ جانە ولارعا قوسا لوندون وليمپياداسىندا كوپتى ءتانتى ەتكەن وزگە دە وليمپياداشىلارىمىزدىڭ ەسىمدەرى بۇكىل الەمگە تانىمال. ولار جاڭا بۋىن ءۇشىن لايىقتى ۇلگى بولىپ سانالادى. بۇگىندە سپورت سالاسىندا 1 500 سپورت نىسانى – ستاديوندار, باسسەيندەر, حوككەي جانە تەننيس كورتتارى جۇمىس ىستەيدى. بۇگىنگى ءبىزدىڭ فورۋمنىڭ قازاقستان تەننيس فەدەراتسياسىنىڭ كومەگىمەن سالىنعان وسى زاماناۋي تەننيس ورتالىعىندا ءوتىپ وتىرۋى دا بەكەر ەمەس. مۇندا بولاشاق چەمپيوندار تاربيەلەنەدى», – دەدى نۇرسۇلتان نازارباەۆ. مەملەكەت باسشىسى الەمنىڭ وزىق 30 ەلىنىڭ قاتارىنا كىرۋ جولىنداعى جاڭا كەزەڭنىڭ باستالعانىن اتاپ ءوتتى. «ءبىز باستى ماقساتى حالىقتىڭ تۇرمىسىن بارلىق جاعىنان جاقسارتۋ, سونىمەن قوسا ساپالى مەملەكەتتىك باسقارۋ, سوتتىق-قۇقىقتىق قورعاۋ, يندۋستريانى دامىتۋ, حالىق بىرلىگىن نىعايتۋ بولىپ سانالاتىن 5 ينستيتۋتسيونالدىق رەفورمانى جۇزەگە اسىرۋدامىز. بۇل – الداعى كوپ جىلدارعا كوزدەلگەن اۋقىمدى دامۋ جوسپارى», – دەدى قازاقستان پرەزيدەنتى. نۇرسۇلتان نازارباەۆ جاسالىپ جاتقان جۇمىستىڭ ءبارى ەل بولاشاعىنا, وسكەلەڭ ۇرپاقتىڭ ەرتەڭىنە باعىتتالىپ وتىرعانىن ايتتى. «بۇگىندە سەندەردىڭ الدارىڭنان بۇكىل الەمگە جول اشىق. سەندەر قىزىقتى كەزەڭدە ءومىر ءسۇرىپ, بولاشاققا باعىت ۇستاعان ەلمەن بىرگە ءوسىپ كەلەسىڭدەر. وسىنىڭ بارلىعى بەيبىتشىلىك پەن تۇراقتىلىقتىڭ, قازاقستان حالقىنىڭ دوستىعىنىڭ, تۋىستىعىنىڭ جانە ءوزارا تۇسىنىستىگىنىڭ ارقاسى», – دەدى مەملەكەت باسشىسى. فورۋم بارىسىندا «قازاقستان-2050» جالپىۇلتتىق قوزعالىسى كەڭەسىنىڭ مۇشەسى, قازاقستان-فينليانديا بيزنەس-حابىنىڭ جەتەكشىسى م.مانكەەۆ, م.وتەمىسوۆ اتىنداعى باتىس قازاقستان مەملەكەتتىك ۋنيۆەرسيتەتىنىڭ ستۋدەنتى پرەزيدەنتتىك ستيپەنديا يەگەرى گ.قويلانوۆا, وليمپيادا چەمپيونى ي.يلين, اتىراۋ جانە ماڭعىستاۋ وبلىستارى جاستارىنىڭ وكىلدەرى ءسوز سويلەپ, جاستارعا جانە ولاردىڭ باستامالارىنا ۇدايى قولداۋ كورسەتەتىن مەملەكەت باسشىسىنا العىستارىن ايتتى. سونداي-اق, «قازاقستان-2050» ستراتەگياسىن جۇزەگە اسىرۋ ىسىنە بەلسەنە قاتىسۋعا ءازىر ەكەندىكتەرىنە سەندىردى. فورۋم 4 كورتى, 300 ورىنعا ارنالعان تريبۋنالارى بار تەننيس ورتالىعىندا ءوتتى. كەشەن دەنە شىنىقتىرۋ جانە ساۋىقتىرۋ ءىس-شارالارىن وتكىزۋگە, حالىقتىڭ بەلسەندى دەمالىسىنا ارنالعان. ەلامان قوڭىر. دەرەك: egemen.kz. سۋرەت: vk.com.