قىزىلوردالىق مامان ەڭبەك سىڭىرگەن جاتتىقتىرۋشى اتاندى

استانا. 2 ءساۋىر. قازاقستان رەسپۋبليكاسىنىڭ مادەنيەت جانە سپورت مينيسترلىگى سپورت جانە دەنە شىنىقتىرۋ كوميتەتىنىڭ توراعاسى ەلسيار قاناعاتوۆتىڭ بۇيرىعىمەن قىزىلوردا وبلىسى قارماقشى اۋدانىنىڭ تۋماسى بولاتبەك كەنەەۆكە قازاق كۇرەسىنەن «قازاقستان رەسپۋبليكاسىنىڭ ەڭبەك سىڭىرگەن جاتتىقتىرۋشىسى» اتاعى بەرىلدى. بۇل تۋرالى egemen.kz حابارلادى. بولاتبەك جاقسىلىق ۇلى ۇزاق جىل شاكىرت تاربيەلەپ, ۇلتتىق سپورتىمىزدىڭ دامۋىنا سۇبەلى ۇلەس قوسقان بىلىكتى مامان. سونداي-اق, قازاق كۇرەسىنەن الەم چەمپيونى عالىمجان ءابدىراحمانوۆتىڭ جەكە جاتتىقتىرۋشىسى ەكەنىن ايتا كەتەيىك. بۇگىندە ول قىزىلوردا وبلىستىق سپورتتا دارىندى بالالارعا ارنالعان ج.ءباھادۇر اتىنداعى مەكتەپ-ينتەرناتىندا قىزمەت ىستەيدى. قازاق بالالارىن سپورتقا باۋلىعان ول ءالى تالاي الەم چەمپيونىن شىعارسام دەيدى. شىن تالانتتى اۋىلدان ىزدەپ, ءوڭىر سپورتىنىڭ وركەندەۋىنە ەڭبەك ەتىپ جۇرگەن جاتتىقتىرۋشىعا الداعى ۋاقىتتا تەك ساتتىلىك تىلەيمىز. ەلامان قوڭىر. دەرەك, سۋرەت: egemen.kz.