ەلباسى ليتۆا پرەمەر-ءمينيسترى الگيرداس بۋتكياۆيچيۋسپەن كەزدەستى

استانا. 21 مامىر. مەملەكەت باسشىسى VIII استانا ەكونوميكالىق فورۋمىنا قاتىسۋعا كەلگەن ليتۆا پرەمەر-ءمينيسترى الگيرداس بۋتكياۆيچيۋسپەن كەزدەستى. بۇل تۋرالى akorda.kz حابارلادى. كەزدەسۋ بارىسىندا ەكىجاقتى, سونىڭ ىشىندە ساۋدا-ەكونوميكالىق جانە ينۆەستيتسيالىق سالالارداعى ءوزارا ىقپالداستىق ماسەلەلەرى تالقىلاندى. ەلباسى 2007-2009 جىلدارداعى جاھاندىق قارجى-ەكونوميكالىق داعدارىسقا جاۋاپ رەتىندە ۇيىمداستىرىلعان فورۋمعا قاتىساتىنى ءۇشىن ليتۆا پرەمەر-مينيسترىنە العىس ايتتى. «فورۋمعا 90 ەلدەن كەلگەن 3 000 دەلەگات قاتىسادى. ءبىز قازاقستاننىڭ ينفراقۇرىلىمدىق جانە يندۋستريالىق دامۋ تۇرعىسىنان قابىلداپ جاتقان شارالارى مەن جۇزەگە اسىرىپ جاتقان وزگە دە باعدارلامالارى تۋرالى ايتپاق نيەتتەمىز», – دەدى مەملەكەت باسشىسى. نۇرسۇلتان نازارباەۆ ەكى ەلدىڭ اراسىنداعى ساياسي ديالوگ پەن ەكونوميكالىق ىنتىماقتاستىقتىڭ دەڭگەيى جوعارى ەكەنىن اتاپ ءوتتى. «ليتۆامەن ارقاشان جاقسى قارىم-قاتىناستا بولدىق. ءسىزدىڭ ساپارىڭىز ىنتىماقتاستىقتى ودان ءارى كەڭەيتۋگە قىزمەت ەتەدى دەپ ۇمىتتەنەمىن», – دەدى پرەزيدەنت. الگيرداس بۋتكياۆيچيۋس ەكىجاقتى قارىم-قاتىناستاردى نىعايتۋعا جانە دامىتۋعا قوسقان ەلەۋلى ۇلەسى ءۇشىن قازاقستان پرەزيدەنتىنە العىس ايتتى. «قازاقستان ليتۆانىڭ ورتالىق ازياداعى ماڭىزدى سەرىكتەسى بولىپ سانالادى», – دەدى ول. ليتۆا پرەمەر-ءمينيسترى سونداي-اق, نۇرسۇلتان نازارباەۆتى ەل پرەزيدەنتى لاۋازىمىنا قايتا سايلانۋىمەن قۇتتىقتاپ, قازاقستاننىڭ العا قويعان بارلىق ماقساتتارىنا جەتەتىنىنە سەنىمدىلىك ءبىلدىردى. ەلامان قوڭىر. دەرەك, سۋرەت: akorda.kz.