پەتروپاۆل. 2 ءساۋىر. “استانا ەكسپو-2017” ۇك مەن وبلىس اكىمدىگى اراسىنداعى ىنتىماقتاستىق تۋرالى مەموراندۋم اياسىندا ەكى جەل ەنەرگياسى قوندىرعىسى قىزىلجار اۋدانىنا قاراستى «زەنچەنكو جانە ك» كومانديتتىك سەرىكتەستىگىندە پايدالانۋعا بەرىلدى. بۇل تۋرالى سولتۇستىك قازاقستان وبلىسى اكىمدىگىنىڭ ءباسپاسوز قىزمەتى حابارلادى.
ەلباسىنىڭ ەلىمىزدى “جاسىل ەكونوميكاعا” كوشىرۋ جونىندەگى تاپسىرماسىن جۇزەگە اسىرۋ ماقساتىمەن “زەنچەنكو جانە ك” كس 2012 جىلى جالپى قۋاتتىلىعى 1,5 مەگاۆاتتى قۇرايتىن ەكى جەل ەنەرگياسى قوندىرعىسىن ىسكە قوسقان ەدى. سودان بەرگى ەكى جىلدا 4 ملن. كۆت/ساعاتتان ارتىق ەلەكتر قۋاتى وندىرىلگەن.
ارقايسىسىنىڭ قۋاتى 1 مەگاۆاتت, جالپى قۇنى 1 ميلليون ەۋرو تۇراتىن جەل ەنەرگياسى قوندىرعىلارىن ىسكە قوسۋ سالتاناتىنا وبلىس اكىمى ەرىك سۇلتانوۆ قاتىسىپ, جوبا يندۋستريالاندىرۋ كارتاسىنىڭ ەكىنشى بەسجىلدىعى شەڭبەرىندە جۇزەگە اسقانىن, الداعى ۋاقىتتا مۇنداي قوندىرعىلار كوبەيە تۇسەتىنىن جەتكىزدى.
«وسىدان ەكى جىل بۇرىن باستالعان جوبانىڭ ەكىنشى كەزەگىن ىسكە قوسۋ ارقىلى قوندىرعىلاردىڭ جالپى قۋاتتىلىعى 3,5 مەگاۆاتتقا جەتىپ وتىر. تيىمدىلىگى ايتارلىقتاي: ەلەكتر قۋاتى شىعىنىن اي سايىن 6,3 ميلليون. تەڭگەگە قىسقارتۋعا مۇمكىندىك بەرەدى. مەملەكەت باسشىسىنىڭ يدەياسىن وڭىرىمىزدە ءبىرىنشى بولىپ ورىنداۋشىلار قاتارىندامىز,– دەيدى قازاقستاننىڭ ەڭبەك ەرى, سەرىكتەستىكتىڭ باس ديرەكتورى گەننادي زەنچەنكو.
اتالمىش جوبا 2017 جىلى ەلوردامىز استانادا وتەتىن حالىقارالىق مامانداندىرىلعان “ەكسپو” كورمەسى قارساڭىندا بالامالى ەنەرگيا كوزىن پايدالانۋداعى ەكونوميكالىق, ەكولوگيالىق ماڭىزدى قادام سانالارى انىق.
ءومىر ەسقالي.
دەرەك: سولتۇستىك قازاقستان وبلىسى اكىمدىگىنىڭ ءباسپاسوز قىزمەتى
سۋرەت: سولتۇستىك قازاقستان وبلىسى اكىمدىگىنىڭ باسپاسوز قىزمەتى.
