اتىراۋدا جۇرگىزۋشى قۇجاتسىز 4 توننا ديزەل وتىنىمەن ۇستالدى

اتىراۋ. 2 ءساۋىر. اتىراۋ وبلىسىندا 4 توننا ديزەل وتىنىن قۇجاتسىز تاسىمالداعان كولىك جۇرگىزۋشىسى ۇستالدى. بۇل تۋرالى اتىراۋ وبلىستىق ىشكى ىستەر دەپارتامەنتىنىڭ ءباسپاسوز قىزمەتى حابارلادى. جىلىوي اۋداندىق ىشكى ىستەر ءبولىمىنىڭ جول-پاترۋلدىك پوليتسيا قىزمەتكەرلەرى كەزەكتى رەيدتىك شارا كەزىندە قۇلسارى-سارىقامىس تاس جولى بويىندا ماز كولىگىن توقتاتقان. پوليتسەيلەر كولىكتى تەكسەرۋ بارىسىندا وعان تيەلگەن 4 توننا ديزەل جانارمايى بار ەكەنىن انىقتادى. الايدا, جۇرگىزۋشى ديزەل وتىنى ءتيىستى جەرگە اپارىلۋى قاجەتتىگىن راستايتىن ارنايى قۇجاتتى ۇسىنا المادى. «قازىر ديزەل جانارمايىنىڭ قايدان, قانداي جولمەن الىنعانى تەكسەرىلۋدە. ال كولىك جۇرگىزۋشىسى جىلىوي اۋدانىنىڭ ورتالىعى – قۇلسارى قالاسىنىڭ 27 جاستاعى تۇرعىنى ەكەن. تەكسەرۋ قورىتىندىسىمەن ءتيىستى شەشىمدەر قابىلدانادى», دەيدى اتىراۋ وبلىستىق ىشكى ىستەر دەپارتامەنتى ءباسپاسوز قىزمەتىنىڭ جەتەكشىسى گۇلنازيرا مۇحتاروۆا. جولداسبەك شوپەعۇل. دەرەك: اتىراۋ وبلىستىق ىشكى ىستەر دەپارتامەنتىنىڭ ءباسپاسوز قىزمەتى. سۋرەت: thenews.kz.