«يسلام مەملەكەتى» سيريانىڭ پالميرا قالاسىن باسىپ الدى

«يسلام مەملەكەتى» لاڭكەستىك توبى سيريانىڭ پالميرا قالاسىن باسىپ الدى. بۇل تۋرالى euronews.com حابارلادى. سيريا اسكەرى «يسلام مەملەكەتى» قارۋلى جاساعىنىڭ شابۋىلىنا تويتارىس بەرە الماي, پالميرا قالاسىن تاستاپ كەتۋگە ءماجبۇر بولدى. قالا ءۇشىن كەسكىلەسكەن ۇرىس بىرنەشە كۇنگە سوزىلدى. باقىلاۋشىلار پالميرا قالاسىنىڭ ەشقانداي ستراتەگيالىق ماڭىزعا يە ەمەس ەكەنىن ايتقان ەدى. دەگەنمەن, ولار لاڭكەستىك توپ مۇنداعى سيرەك كەزدەسەتىن تاريحي ەسكەرتكىشتەردى جويىپ جىبەرەدى دەپ قاۋىپتەندى. سيريا بيلىگى قالادان جۇزدەگەن كونە ەسكەرتكىشتى الىپ شىققان. الايدا, ەسكەرتكىش-مۇسىندەردىڭ ءبىرازىن شىعارۋ مۇمكىن بولماي تۇر. كونە جادىگەرلەر جونىندەگى سيريا ماماندارى بۇل جاعدايعا حالىقارالىق قاۋىمداستىقتىڭ ارالاسۋىن سۇراپ وتىر. «بۇل – حالىقارالىق سوعىس. ەگەر «يسلام مەملەكەتى» لاڭكەستىك توبى جەڭىسكە جەتسە, ول سيريا حالقىنىڭ عانا جەڭىلىسى بولىپ سانالمايدى. بۇل امەريكا, قىتاي, فرانتسيا, ۇلىبريتانيا, رەسەي, بىرىككەن ۇلتتار ۇيىمى قاۋىپسىزدىك كەڭەسىنىڭ تۇراقتى مۇشەلەرى مەن بۇكىل حالىقارالىق قاۋىمداستىقتىڭ دا جەڭىلىسى», – دەيدى كوپكە ۇندەۋ تاستاعان جەرگىلىكتى ماماندار. پالميرا – يۋنەسكو-نىڭ تاريحي مۇرالار تىزىمىنە ەنگەن قالا. كونە شاھار اتاۋى تۋرالى العاشقى دەرەكتەر ءبىزدىڭ داۋىرىمىزگە دەيىنگى ەكىنشى مىڭجىلدىقتاردا كەزدەسەدى. قاقتىعىس باستالماي تۇرعاندا قالا سيرياداعى ەڭ باستى تۋريستىك ورتالىقتىڭ ءبىرى سانالعان ەدى. سوعىس سالدارىنان مۇنداعى تاريحي ەسكەرتكىشتەر قاتتى زاقىمداندى. ەندى كونە قالاعا جويىلىپ كەتۋ قاۋپى ءتونىپ تۇر. ەلامان قوڭىر. دەرەك: euronews.com. سۋرەت: ria.ru.