پەتروپاۆلدا 85 جاستاعى كەيۋانانىڭ ءۇيى اپاتتى جاعدايدا تۇر

پەتروپاۆل. 2 ءساۋىر.  كوزىن تىرناپ اشقاننان وبلىس ورتالىعىندا تۇرىپ كەلە جاتقان  احمەتشينا عاينيكامال اجەي  قۇلاعالى تۇرعان باسپانا باسىپ قالا دەپ ءار تاڭىن  ۇيقىسىز اتىرىپ كەلەدى. بۇل تۋرالى كتك ارناسى حابارلادى. تىل ەڭبەككەرى 85 جاستا. سۋ تاسىپ, وت جاعۋدان قالعان. وزگە تۇگىل وزىنە قارايلايتىن شاماسى جوق: دىمكاس. تانىستارى اندا-ساندا قارايلاسىپ تۇرادى. قارتايعاندا ەشكىمگە كەرەكسىز بولىپ قالعانىم با دەپ نالىعاندا ەتەگى جاسقا تولادى. بارىنەن دە قاتتى قينايتىنى– باسپانانىڭ اپاتتى جاعدايدا تۇرعانى.  بىلتىر ءۇيدىڭ جارتىسى ورتەنىپ كەتىپتى. كورشى-قولاڭ اسارلاپ, جاماپ-جاسقاپ بەرگەنىمەن, قىستا يت بايلاسا تۇرعىسىز , سۋىق.  وسىدان  شيرەك عاسىرعا جۋىق قۇداي قوسقان قوساعى قايتىس بولعاننان بەرى جالعىزدىقتىڭ  تاۋقىمەتىن تارتىپ كەلەدى. «اياعىن ارەڭ باسادى, كوزى كورۋدەن قالدى.  قالا باسشىلارى  قاريانىڭ قازىرگى اۋىر جاعدايىن ەسكەرىپ, جىلۋى, سۋى بار ۋاقىتشا پاتەر بەرۋىن وتىنەمىز»,– دەيدى تۋىسىنداي بولىپ كەتكەن كورشىسى نادەجدا ارحيپوۆا. قالالىق جۇمىسپەن قامتۋ جانە الەۋمەتتىك باعدارلامالار ءبولىمىنىڭ مامانى ءاليما بەكنازاروۆا جەڭىستىڭ 70 جىلدىعى قارساڭىندا  مەرەكەلىك مەدال, 25 مىڭ تەڭگە مولشەرىندە الەۋمەتتىك كومەك بەرىلەتىنىن, اس-سۋىنا قارايلاساتىن كۇتۋشى تاعايىندالاتىنىن جەتكىزگەنىمەن, باسپانا جايلى ءتىس جارمايدى. عاينيجامال اپاي بار عۇمىرىن ەڭبەكپەن وتكىزگەن. تىڭ يگەرۋ جىلدارى ۆاگونعا  استىق تيەگەن, جۇك تاسىمالداعان. زەينەتاقىسى–30 مىڭ تەڭگە عانا.  قارتتار ۇيىنە بارۋعا ءۇزىلدى-كەسىلدى قارسى. بار ارمانى–قۇرقىلتايدىڭ ۇياسىنداي عانا جىلى ورىن . باسقا ەشتەڭە دامەتپەيدى. ءومىر ەسقالي. دەرەككوز: كتك ارناسى. سۋرەت: egemen.kz