اتىراۋ پوليتسەيلەرى جايىققا باتقان زەينەتكەردى قۇتقاردى

اتىراۋ. 2 ءساۋىر. اتىراۋ وبلىسىنىڭ ۋچاسكەلىك پوليتسيا ينسپەكتورلارى جايىق وزەنىنە باتىپ بارا جاتقان زەينەتكەردى قۇتقارىپ قالدى. بۇل تۋرالى اتىراۋ وبلىستىق ىشكى ىستەر دەپارتامەنتىنىڭ ءباسپاسوز قىزمەتى حابارلادى. وقىس وقيعا 22 ناۋرىز كۇنى ساعات 16:30-دار شاماسىندا ماحامبەت اۋدانىندا بولعان. اۋدان ورتالىعى – ماحامبەت سەلوسىنىڭ تۇسىندا 64 جاستاعى ەر ادام جايىق وزەنىندەگى مۇز ۇستىمەن وتپەك بولعان. الايدا, مۇز ويىلىپ, زەينەتكەر سۋعا باتا باستاعان. دەر كەزىندە ارەكەت ەتكەن ۋچاسكەلىك پوليتسيا ينسپەكتورلارى, پوليتسيا كاپيتانى ارداق دوشەكەنوۆ پەن پوليتسيا اعا لەيتەنانتى ەرنار بيسەمبيەۆ دەرەۋ كومەك بەرۋگە ۇمتىلادى. ءسويتىپ, ولار سۋعا باتىپ بارا جاتقان زەينەتكەردىڭ قولىنا قوسارلانا جارماسىپ, اجالدان اراشالاپ قالدى. «ارداق دوشەكەنوۆ العا اۋىلىندا, ال ەرنار بيسەمبيەۆ اقجايىق اۋىلىندا پوليتسيا ينسپەكتورى بولىپ جۇمىس ىستەيدى. ءوز ىستەرىن جاۋاپكەرشىلىكپەن اتقارىپ كەلەدى. بۇل جولى دا ولار قورعانسىز جاندى قيىندىقتان اراشالاپ, ەرلىككە ءتان ارەكەتىمەن دارالاندى. سۋعا مالشىنعان زەينەتكەردى قىزمەتتىك كولىگىمەن اۋرۋحاناعا اكەلىپ, العاشقى كومەك كورسەتىلگەن سوڭ ۇيىنە جەتكىزدى», دەيدى اتىراۋ وبلىستىق ىشكى ىستەر دەپارتامەنتىنىڭ ءباسپاسوز حاتشىسى گۇلنازيرا مۇحتاروۆا. جولداسبەك شوپەعۇل. دەرەك: اتىراۋ وبلىستىق ىشكى ىستەر دەپارتامەنتىنىڭ ءباسپاسوز قىزمەتى. سۋرەت: kazvesti.kz.