اقتوبە. 21 مامىر. اقتوبەگە ۇلى جەڭىستىڭ 70 جىلدىعىنا وراي سانكت-پەتەربۋرگ قالاسىنىڭ نەۆسكي اۋدانىنان ءبىر توپ سوعىس ارداگەرى كەلدى. ولاردى اقتوبە قالاسىنىڭ اكىمى ەرحان وماروۆ قابىلدادى. بۇل تۋرالى egemen.kz ءتىلشىسى حابارلادى.
دەلەگاتسيانىڭ كەلۋ ماقساتى – قازاقستانداعى ارداگەرلەرمەن كەزدەسۋ, قازاق حالقىنىڭ تاريحىمەن جانە مادەنيەتىمەن تانىسۋ. قوناقتارمەن كەزدەسۋ بارىسىندا شاھار باسشىسى ەكى ەل اراسىنداعى ىنتىماقتاستىققا ەرەكشە نازار اۋداردى. ۇلى جەڭىستىڭ 70 جىلدىعى وڭىردە كەڭ كولەمدە اتالىپ وتكەنىن, مۇنداي ىزگىلىكتى كەزدەسۋلەردىڭ سوعىس كەزىندەگى اعا ۇرپاقتىڭ ەرلىك ىستەرى مەن جانقيارلىق ەڭبەگىن جاستاردىڭ جادىندا جاڭعىرتىپ, ولاردىڭ بويىندا وتانسۇيگىشتىك قاسيەتتى قالىپتاستىرۋعا ىقپال ەتەتىنىنە توقتالدى.
نەۆسكي اۋدانى ارداگەرلەر كەڭەسىنىڭ توراعاسى ميحايل شەۆچۋك اقتوبە حالقىنىڭ ىقىلاسىنا ريزاشىلىقتارىن جەتكىزدى. ال اتالعان اۋدان اكىمشىلىگىنىڭ جاستار ساياساتى جانە قوعامدىق ۇيىمدارمەن بايلانىس ءبولىمىنىڭ باستىعى اندرەي ليابين اقتوبە قالاسىندا جاساقتالعان №74 دەربەس تەڭىز اتقىشتار بريگاداسى مەن مىڭداعان قازاقستاندىقتاردىڭ لەنينگراد قالاسىن قورعاۋعا قاتىسقانىن, قازاقستاننىڭ قورشاۋداعى قالاعا ازىق-ت ۇلىك, قارۋ-جاراق جانە جىلى كيىم جەتكىزىپ تۇرعانىن ايتتى. سونداي-اق, ول اقتوبەدەگى سوعىس ارداگەرلەرىنە «1941-1945 جىلدارداعى ۇلى وتان سوعىسىنداعى جەڭىسكە 70 جىل» مەرەكەلىك مەدالىن جانە ەسكەرتكىش سىيلىقتارىن تابىس ەتتى. ءوز كەزەگىندە اقتوبەلىكتەر تاراپىنان دا ەسكەرتكىش سىيلىقتار ۇسىنىلدى.
سونىمەن قاتار, قوناقتار «ماڭگىلىك الاۋ» داڭق مەموريالى جانىنداعى «سول جىلدارعا باس يەمىز» اكتسياسىنا قاتىستى. دەلەگاتسيا كەڭەس وداعىنىڭ باتىرى ءاليا مولداعۇلوۆانىڭ مەموريالدىق كەشەنىنە جانە باتىرلار اللەياسىنا گۇل شوقتارىن قويۋدى جوسپارلاپ وتىر. ودان بولەك, قالانىڭ بىرقاتار كاسىپورىندارى مەن مۋزەيلەرىندە, جوعارى جانە ارناۋلى ورتا وقۋ ورىندارىندا بولىپ, ەڭبەك ۇجىمدارىمەن جانە ستۋدەنتتەرمەن كەزدەسپەك.
ساتىبالدى ءساۋىرباي.
دەرەك, سۋرەت: egemen.kz.
