الماتىدا اراعا ەكى كۇن سالىپ, قايتادان قار جاۋدى

الماتى. 2 ءساۋىر. الماتىدا قايتادان قار جاۋا باستادى. كوكتەمنىڭ ەكىنشى ايىنداعى اۋا رايىنىڭ توسىن قۇبىلىسىنا قالالىقتار اڭ-تاڭ. بۇل تۋرالى ەgemen.kz ءتىلشىسى حابارلادى. ەكى كۇن بۇرىن الماتىعا سوڭعى ءۇش جىلدا جانە قىس كەزىندە بولماعان قار تۇسكەن. قاردىڭ قالا بويىنشا ورتاشا قالىڭدىعى 35 سانتيمەرگە جەتتى, ول جىلدىق مولشەردىڭ ۇشتەن بىرىنە تەڭ. قالالىق كوممۋنالدىق قىزمەت اۋەلدە كوشەلەر مەن اۋلالاردى, باقتاردى, الاتاۋعا تارتقان جولداردى تازالاۋعا 800 ادام, 300 تەحنيكا جۇمىلدىرىلعانى تۋرالى مالىمەت بەردى. الماتى تابيعاتى ادەتتەگىدەي قىزىق, ءبىر كۇننىڭ ىشىندە قالانىڭ باستى كوشەلەرى قايتا قۇرعاپ شىقتى. ارينە, بۇعان كوممۋنالشىلىردىڭ قوسقان ۇلەسى از بولماعان سەكىلدى. ويتكەنى, ەري جاۋعان ۇلپا قار باسىلعاندا تۇرعىندار الماتىدان 10 840 تەكشە مەتر قار سىرتقا شىعارىلعانى, وعان 1 100 كاماز ەكۆيۆالەنتى مەن 1 200 ادام قاتىسقانى تۋرالى حاباردار بولدى. كوشەلەرگە 5 توننا حلور قوسىلعان قۇم, 36 توننا تۇز توگىلگەن. الماتىداعى 548 مىڭ كولىك جۇرگىزۋشىنىڭ قينالىسىن تۇسىنۋگە بولادى: ناۋرىز مەرەكەسىنىڭ جايماشۋاق كۇندەرى كولىكتەرىنە جازدىق شينا اۋىستىرىپ ۇلگەرگەندەر ونسىز دا كەپتەلىستەگى قالا كوشەلەرىندە ساقتانا ءجۇرىپ, جول ءجۇرۋ قوزعالىسىن تىپتەن باياۋلاتىپ جىبەردى. ەندىگى ماسەلە, قالا كوممۋنالدىق قىزمەتىنىڭ قىسقا ارناعان رەزەرۆى تۇگەسىلىپ قالماسا بولعانى, قازىر الماتىدا قايتادان, مايدالاپ قار جاۋىپ تۇر. تالعات ءسۇيىنباي. دەرەك, سۋرەت: ەgemen.kz.