ۇكىمەتتىك ەمەس ۇيىمدار – مەملەكەت قولداۋىندا

كەشە استانادا پرەمەر-ءمينيستردىڭ ورىنباسارى بەردىبەك ساپارباەۆتىڭ توراعالىعىمەن قازاقستان ۇكىمەتى جانىنداعى ۇكىمەتتىك ەمەس ۇيىمدارمەن (ۇەۇ) ءوزارا ءىس-قيمىل جونىندەگى ۇيلەستىرۋ كەڭەسىنىڭ وتىرىسى ءوتتى. وعان ءماجىلىس دەپۋتاتتارى, مەملەكەتتىك ورگانداردىڭ باسشىلارى, حالىقارالىق ۇيىمدار مەن ۇەۇ وكىلدەرى قاتىستى. مەملەكەت پەن ۇەۇ-نىڭ ءوزارا ارەكەتتەستىگى جونىندەگى وزەكتى ماسەلەلەردى ۇكىمەتتىك دەڭگەيدە تالقىلاۋدىڭ ماڭىزدى ۇنقاتىسۋ الاڭى بولىپ سانالاتىن ۇيلەستىرۋ كەڭەسىنىڭ كەڭەيتىلگەن وتىرىسىندا بەردىبەك ساپارباەۆ قازىرگى تاڭدا اتالعان باعىت بويىنشا جۇرگىزىلىپ جاتقان جۇمىستارعا جالپى شولۋ جاساي وتىرىپ, جەكەلەگەن تۇيتكىلدەرگە نازار اۋداردى. – ۇكىمەتتىك ەمەس ۇيىمدار نەگىزىنەن از قامتىلعان وتباسى­لار­دىڭ, مۇگەدەك, جەتىم بالالاردىڭ ماسەلەلەرىن شەشۋگە تىرىسىپ جاتادى. وسىنىڭ بارلىعىن ءبىز دە تۇسىنەمىز. سوندىقتان, ۇكىمەتتىك ەمەس ۇيىمدارعا ءاردايىم قولداۋ كورسەتەمىز. سوڭعى ءۇش جىلدىڭ كولەمىندە مەملەكەتتىك تاپسىرىسقا بولىنەتىن قارجى 16 پايىزعا ارتىپ, ول 16 ميلليارد تەڭگەنى قۇرا­دى. قازىرگى تاڭدا ەلىمىزدىڭ 8 ميلليونعا تاياۋ تۇرعىنى ۇكىمەتتىك ەمەس ۇيىمداردىڭ قىزمەتتەرىمەن قامتىلعان, – دەدى بەردىبەك ساپارباەۆ. سونداي-اق, ول بارلىق جەرگى­لىكتى اتقارۋشى بيلىك ورىندارى اتالعان سالاعا قاراجات ءبولىپ كەلە جاتقانىن, الايدا, بۇل باعىتتا ويلاندىراتىن ماسەلەلەر دە بار ەكەنىن جەتكىزدى. – ارينە, جىل سايىن 700 ميلليون تەڭگەدەن استام قارجى باعىتتاپ, بارىنشا قولداۋ كورسەتىپ جاتقان وبلىستار دا جوق ەمەس. سولاردىڭ ءبىر شوعىرىن اتاپ وتەر بولسام, ولار – وڭتۇستىك قازاقستان, الماتى, پاۆلودار وبلىستارى. وكىنىشكە قاراي, جىل سايىن مەملەكەتتىك تاپسىرىس بويىنشا بولىنەتىن اقشالاي شىعىستى قىسقارتىپ وتىراتىن وڭىرلەر دە بارشىلىق. مىسالى, بيىل سولتۇستىك قازاقستان وبلىسى بويىنشا بار بولعانى 91 ميلليون تەڭگە قاراستىرىلعان. سول سياقتى, ەنەرگەتيكا مينيسترلىگى دە, ءبىلىم جانە عىلىم مينيسترلىگى دە ۇكىمەتتىك ەمەس ۇيىمدارعا بولىنەتىن شىعىستى ازايتىپ وتىر. اۋىلدارعا جەتكىلىكتى دەڭگەيدە كوڭىل بولىنبەۋدە. دالىرەگى, اۋدان, اۋىلداردا ۇكىمەتتىك ەمەس ۇيىمداردىڭ قىزمەتى دۇرىس جولعا قويىلماعان. مۇنداي جاع­داي شىعىس قازاقستان, ءسولتۇس­تىك قازاقستان وبلىستارىن­دا بايقالۋدا, – دەدى پرەمەر-ءمينيستردىڭ ورىنباسارى. جيىن بارىسىندا ۇلتتىق ەكونوميكا ءمينيسترىنىڭ ءبىرىنشى ورىنباسارى مارات قۇسايىنوۆتىڭ «100 ناقتى قادام» ۇلت جوسپارىن ىسكە اسىرۋ اياسىندا مەملەكەتتىك ورگان­داردىڭ الەۋمەتتىك ماڭىزدى مەم­لەكەتتىك قىزمەت تۇرلەرىن ازامات­تىق قوعام ينستيتۋتتارىنا ءبىرتىن­دەپ تاپسىرۋ جونىندەگى حابارلاماسى تىڭدالدى. ول قازىرگى تاڭدا ارنايى قۇرىلعان جۇمىس توبىنىڭ اتالعان باعىتتا اتقارىپ جاتقان شارالارىنان حاباردار ەتتى. سونىمەن قاتار, باسقوسۋدا مادەنيەت جانە سپورت ءمينيسترىنىڭ ورىنباسارى مارات ءازىلحانوۆ, سولتۇستىك قازاقستان وبلىسى اكىمىنىڭ ورىنباسارى انارحان دۇيسەنوۆا, اقتوبە وبلىسى اكى­مىنىڭ ورىنباسارى سارا نۇرقا­توۆا جانە «قازاقستاننىڭ ازامات­تىق اليانسى» زاڭدى تۇلعالار بىرلەستىگىنىڭ (زتب) ۆيتسە-پرەزيدەنتى ارتۋر پلاتونوۆ مەملەكەتتىك ورگانداردىڭ ۇكىمەتتىك ەمەس ۇيىمدارمەن ءوزارا ءىس-قيمىلى, ارەكەتتەستىگى جونىندە باياندادى. بۇعان قوسا, «قازاقستاننىڭ ازاماتتىق اليانسى» زتب-نىڭ اتقارۋشى ديرەكتورى يل­دار كاتەنوۆ مەملەكەتتىك الەۋ­مەتتىك تاپ­سىرىستىڭ لوتتار تاقىرىپ­تا­رىن قالىپتاستىرۋ بويىنشا ءتۇس­كەن ۇسىنىستار جونىندە ايتىپ ءوتتى. باسقوسۋدى قورىتىندىلاعان بەردىبەك ساپارباەۆ ايماق باسشىلارىنا, مادەنيەت جانە سپورت مينيسترلىگىنە, وزگە دە ورتالىق مەملەكەتتىك ورگاندارعا ۇكىمەت­تىك ەمەس ۇيىمدارمەن ىنتىماق­تاس­تىق تاجىريبەسىن جەتىلدىرۋگە جانە الەۋمەتتىك سالاداعى ازاماتتىق باستامالاردى جۇزەگە اسىرۋعا قاتىستى حاتتامالىق تاپسىرمالار بەردى. جولدىباي بازار, «ەگەمەن قازاقستان».