اقش سەناتورلارى رەسەيگە قارسى فيفا-عا حات جولدادى

استانا. 2 ءساۋىر. اقش سەناتورلارى فۋتبولدان 2018 جىلعى الەم چەمپيوناتىنىڭ رەسەيدە وتۋىنە قارسىلىق ءبىلدىرىپ, فيفا-عا حات جولدادى. ولاردىڭ مۇنداي قادامعا بارۋىنا ۋكرايناداعى جاعداي مەن قىرىم ماسەلەسى سەبەپ بولعان. بۇل تۋرالى championat.com حابارلادى. فيفا پرەزيدەنتى يوزەف بلاتتەردىڭ اتىنا جازىلعان حاتتا: «رەسەيدىڭ الەم چەمپيوناتىن وتكىزۋى پرەزيدەنت ۆلاديمير ءپۋتيننىڭ رەجيمىن ودان سايىن كۇشەيتە تۇسەدى. ال شىن مانىندە ول قازىر ءوز ىستەرىنە جاۋاپ بەرۋى ءتيىس», – دەلىنگەن. حاتقا 13 سەناتور قول قويعان. ولاردىڭ اراسىندا اقش پرەزيدەنتتىگىنە ۇمىتكەر بولعان دجون ماككەين دە بار. حاتتىڭ ءبىر كوشىرمەسى اقش فۋتبول فەدەراتسياسىنا دا جىبەرىلگەن. ايتا كەتەيىك, اتالعان الەم چەمپيوناتى رەسەيدە 2018 جىلدىڭ 14 ماۋسىمى مەن 15 شىلدەسى ارالىعىندا وتەدى دەپ جوسپارلانۋدا. دوپ دوداسى رەسەيدىڭ 11 قالاسىندا وتپەك. سولتۇستىك كورشىمىزدىڭ الەمدىك مۋنديالدى وتكىزەتىنى 2010 جىلدىڭ جەلتوقسان ايىندا بەلگىلى بولدى. ەلامان قوڭىر. دەرەك: championat.com. سۋرەت: twitter.com.