قازاقستان رەسپۋبليكاسى ۇلتتىق بانكىنىڭ ۇيىمداستىرۋىمەن «يسلام قارجىلىق قىزمەت كورسەتۋ كەڭەسىنىڭ» ءحىى ءسامميتى ءوز جۇمىسىن باستادى.
الەمدىك قارجى ساياساتىنىڭ ءىرى وكىلدەرىنىڭ ءبىرى بولىپ تابىلاتىن يسلام قارجىلىق قىزمەت كورسەتۋ كەڭەسى (IFSB) دۇنيەجۇزىندە يسلامدىق قارجىلاندىرۋ تەتىگىن دامىتۋ, قارجى مەكەمەلەرىنىڭ قىزمەتىن رەتتەۋ جانە قاداعالاۋ, قارجىلىق تۇراقتىلىقتى قامتاماسىز ەتۋ سەكىلدى قىزمەتتەردى اتقارادى. بۇدان وزگە, بۇل كەڭەس يسلامدىق قارجى يندۋسترياسىنىڭ نەگىزگى ويىنشىلارى ءوزارا ۇنقاتىسۋ مەن ەركىن قاتىناس جاساۋ الاڭى رەتىندە دە الەمدىك ەكونوميكا سالاسىندا ماڭىزدى رولگە يە.
العاش رەت 2004 جىلى ۋەلس حانزاداسى ءچارلزدىڭ باستاماسىمەن ۇلىبريتانيادا وتكەن اتالمىش ءسامميتتىڭ ءحىى وتىرىسىن قازاقستاندا وتكىزۋگە 2014 جىلدىڭ سوڭىندا قازاقستان رەسپۋبليكاسى ۇلتتىق بانكى مەن يسلام قارجىلىق قىزمەت كورسەتۋ كەڭەسى اراسىندا جاسالعان مەموراندۋم ناتيجەسىندە قول جەتكىزىلگەن بولاتىن. ەسكە سالا كەتسەك, ەلىمىزدە يسلامدىق قارجى جۇيەسىن دامىتۋ نيەتىندە ءبىرقاتار يگى شارالار مەن زاڭ جوبالارى قابىلدانىپ, بۇگىندە ءوز ناتيجەسىن بەرە باستادى. اتاپ ايتقاندا, 2011 جىلى قازاقستان رەسپۋبليكاسىنىڭ ۇلتتىق بانكى يسلامدىق قارجىلىق قىزمەتتەر جونىندەگى كەڭەسىنە (IFSB) مۇشە بولىپ كىردى. 2009 جىلى قازاقستان رەسپۋبليكاسىندا يسلامدىق قارجىلاندىرۋ جونىندەگى زاڭ قابىلدانىپ, سوعان سəيكەس يسلام بانكتەرىنىڭ, يسلامدىق ينۆەستيتسيالىق قورلاردىڭ جۇمىس ىستەۋى, يسلامدىق باعالى قاعازداردىڭ شىعارىلۋى ءۇشىن جاعدايلار جاسالدى. 2011 جىلى مەملەكەتتىك يسلامدىق باعالى قاعازداردى شىعارۋ مۇمكىندىگىن كوزدەيتىن, سونداي-اق, قازاقستان رەسپۋبليكاسىنىڭ رەزيدەنتتەرى شىعاراتىن يسلامدىق باعالى قاعازداردىڭ وريگيناتورلارىنىڭ تىزبەسىن كەڭەيتەتىن زاڭ قابىلداندى. يسلامدىق قارجىلاندىرۋدى, ساقتاندىرۋدى جəنە ليزينگتى دامىتۋ ءۇشىن قازاقستان رەسپۋبليكاسىنىڭ ۇلتتىق بانكى «قازاقستان رەسپۋبليكاسىنىڭ كەيبىر زاڭنامالىق اكتىلەرىنە ساقتاندىرۋ جəنە يسلامدىق قارجىلاندىرۋ مəسەلەلەرى بويىنشا وزگەرىستەر مەن تولىقتىرۋلار ەنگىزۋ تۋرالى» زاڭ جوباسىن əزىرلەدى. قازاقستان رەسپۋبليكاسىنىڭ ۇكىمەتى يسلامدىق قارجىلاندىرۋدى دامىتۋدىڭ 2020 جىلعا دەيىنگى جول كارتاسىن بەكىتتى, ونى ىسكە اسىرۋ يسلامدىق قارجىلىق قىزمەتتەر يندۋسترياسىن تۇراقتى دامىتۋ ءۇشىن جاعدايلار جاساۋعا, ەميتەنتتەردىڭ, ينۆەستورلاردىڭ جəنە نارىققا قاتىسۋشىلاردىڭ شەكتى كولەمىن قۇرۋعا ىقپال ەتەتىن بولادى. تمد كولەمىندە العاش رەت قازاقستاندا وتكىزىلىپ وتىرعان سامميتكە الەمنىڭ 35 مەملەكەتىنەن 300-دەن اسا دەلەگات قاتىسۋدا. سامميت قوناقتارى قاتارىندا قارجى نارىعىن رەتتەۋ جانە قاداعالاۋ ورگاندارىنىڭ, حالىقارالىق قارجى ينستيتۋتتارىنىڭ وكىلدەرى, قارجى نارىعىنا قاتىسۋشى بەلسەندى توپ پەن قارجى-ەكونوميكا سالاسىنىڭ جەتەكشى عالىمدارى مەن ساراپشى ماماندارى بار. الماتى تورىندە ءوتىپ جاتقان سامميت قوناقتارى مەن قاتىسۋشىلارىن قازاقستان رەسپۋبليكاسىنىڭ پرەمەر-ءمينيسترى كارىم ءماسىموۆ ون-لاين رەجىمىندە قۇتتىقتاپ, ەلىمىزدە يسلامدىق قارجى جۇيەسىنىڭ دامۋىنا جاسالعان مۇمكىندىكتەر بارىسىن دا ايتىپ ءوتتى. – قازاقستان رەسپۋبليكاسىنىڭ پرەزيدەنتى نۇرسۇلتان نازارباەۆتىڭ تاپسىرماسىنا سايكەس يسلام قارجىلاندىرۋىنىڭ 2020 جىلعا دەيiنگi جول كارتاسى دايىندالىپ, قازىرگى تاڭدا ول قابىلداندى. ەل ۇكىمەتىنىڭ بولاشاققا جاساعان قادامى بارىسىندا يسلامدىق قارجى قىزمەتتەرى كەڭەسىنىڭ مۇشەلىگىنە ەندىك, – دەدى ءوز سوزىندە ۇكىمەت باسشىسى. قازاقستان رەسپۋبليكاسى ۇلتتىق بانكىنىڭ توراعاسى قايرات كەلىمبەتوۆ ءسامميتتىڭ اشىلۋ سالتاناتىندا سويلەگەن سوزىندە ەلىمىزدە يسلامدىق قارجىلاندىرۋ تەتىگىمەن قاتار, وتاندىق قارجى سالاسىنىڭ جاڭا دەڭگەيگە كوتەرىلگەندىگىن, از عانا ۋاقىت ىشىندە كوپتەگەن يگى جۇمىستار اتقارىلىپ, مەملەكەت تاراپىنان ۇلكەن قولداۋدىڭ كورسەتىلىپ وتىرعاندىعىن تىلگە تيەك ەتە كەلىپ: – يسلام قارجىلىق قىزمەت كورسەتۋ كەڭەسى الەمدەگى مۇسىلمان ەلدەرىنەن وزگە دە مەملەكەتتەرمەن تىعىز بايلانىس ورناتىپ, جاھانعا قارجىلاندىرۋ جانە قاراجاتپەن دۇرىس جۇمىس ىستەۋدىڭ يسلامدىق ءتيىمدى جولىن ناسيحاتتاپ كەلەدى. ازيا مەن باتىستىڭ الدىڭعى قاتارلى دامىعان ەلدەرىنىڭ ەكونوميكالارىنا ينۆەستيتسيا سالۋ ارقىلى اتالعان كەڭەس تەك قارجى سالاسىنا عانا ەمەس, جالپى ادامزاتتىق دامۋ ۇدەرىسىنە دە زور ىقپال ەتكەنىن ايتا كەتۋىمىز كەرەك, – دەدى باس بانكير. – The Islamic Financial Services Board (IFSB), يسلام قارجىلىق قىزمەت كورسەتۋ كەڭەسى – بانك جəنە ساقتاندىرۋ جۇيەسىنەن, سونداي-اق, كاپيتال نارىعىنان تۇراتىن يسلامدىق قارجىلىق قىزمەتتەر يندۋسترياسىنىڭ تۇراقتىلىعىن قامتاماسىز ەتەتىن ۇيىمداردى رەتتەيتىن جəنە باقىلايتىن حالىقارالىق ورگان. IFSB-نىڭ 184 مۇشەسى بار, ونىڭ 59-ى رەتتەۋشى جəنە قاداعالاۋشى ورگاندارعا تيەسىلى جəنە 8 حالىقارالىق ۇكىمەتارالىق ۇيىمدار بار. حالىقارالىق قارجى سالاسى ينۆەستيتسيا جاساۋ ءۇشىن جوعارى ءوسۋ قارقىنى بار جاڭا نارىق كوزدەرىن ىزدەۋدە. سول سەبەپتى قازىرگى تاڭدا ەكونوميكالىق ءوسىمى مەن تۇراقتىلىعى جونىنەن قازاقستان ورتالىق ازيا مەن تمد كولەمىندەگى بىردەن-ءبىر قولايلى مەملەكەت, – دەپ اتاپ كورسەتتى IFSB باس توراعاسى جاسيم احماد. بۇعان دەيىن كاتاردا, ليۆاندا, ءباا-دە, يوردانيادا, سينگاپۋردە, باحرەيندە, ليۋكسەمبۋرگتە, تۇركيادا, مالايزيادا جانە ماۆريكيادا ءوز جۇمىسىن ءتيىمدى جۇرگىزىپ كەلگەن سامميتكە قاتىسۋشى قارجىگەر ماماندار الماتىدا وتكەن باسقوسۋدىڭ جەمىستى بولعانىمەن قاتار, كەلەشەكتە قازاق ەلىندە يسلامدىق قارجى يندۋسترياسىنىڭ قارقىندى دامۋىنا زور مۇمكىندىكتەردىڭ بار ەكەندىگىن اتاپ كورسەتتى.
قانات ەسكەندىر, «ەگەمەن قازاقستان».
الماتى.
