بايقاۋ ۇدەرىسى قاداعالانادى

كەشە «قازمەديا ورتالىعىندا» ەلدەگى پرەزيدەنتتىك سايلاۋدى بايقاۋ ۇدەرىسىنە  ازىرلىك شەڭبەرىندە «بايقاۋشىنىڭ قۇقىقتارى مەن مىندەتتەرى. سايلاۋدى بايقاۋشىنىڭ قىزمەتىندەگى ءادىس-تاسىلدەر»  تاقىرىبىندا سەمينار-ترەنينگ ءوتتى.    ءىس-شارانى قازاقستان رەسپۋبليكاسىندا سايلاۋدى بايقاۋ جونىندەگى رەسپۋبليكالىق قوعامدىق كوميسسيا (سبرقك) ۇيىم­داستىردى. سەمينار-ترەنينگكە ل.ن.گۋ­مي­لەۆ اتىنداعى ەۇۋ ساياساتتانۋ كافەدراسى  پروفەسسورىنىڭ مىندەتىن اتقارۋشى مارينا ونۋچكو, سبرقك مۇشەسى تالانت رامازانوۆ جانە سبرقك مۇشەسى شىڭعىس لەپسىباەۆ قاتىسىپ, مۇنداي شارالار بارىسىندا بايقاۋشىلارعا قويىلاتىن نەگىزگى تالاپ-مىندەتتەر مەن قۇقىقتار ايقىندالىپ, جاۋاپكەرشىلىكتەر بەلگىلەنەتىنىن اتاپ ءوتتى. ماسەلەن, تالانت رامازانوۆ ساياسي ناۋقان كەزىندە ءاربىر سايلاۋشى كونستيتۋتسيا مەن سايلاۋ تۋرالى زاڭناماداعى ەرەجەلەر مەن نورمالاردى قاتاڭ ساقتاۋى تيىستىگىن, ال بايقاۋشى سايلاۋ ۇدەرىسىنە بوگەت جاساماي, بارلىق ۇدەرىستىڭ زاڭنامالارعا سايكەس جۇرگىزىلۋىن قاداعالاپ وتىرۋى قاجەتتىگىن جەتكىزدى. شىڭعىس لەپسىباەۆ سايلاۋ كەزىندە كەزدەسەتىن ءتۇرلى قاراما-قايشىلىقتارعا, اكىمشىلىك زاڭ بۇزۋشىلىقتارعا توقتالىپ, ولاردى بولدىرماۋ مەن الدىن الۋدىڭ جولدارىن ايتىپ بەردى. ال مارينا ونۋچكو مۇنداي سەمينارلاردىڭ نەگىزگى ماقساتى – سايلاۋدى بايقاۋ جونىندەگى رەسپۋبليكالىق قوعامدىق كوميسسيانىڭ ميسسياسى مەن مىندەتتەرىن بىرىڭعاي ءتۇسىنۋدى قالىپتاستىرۋ جانە بايقاۋ ۇدەرىسىن جەتىلدىرۋ ەكەنىن اتاپ ءوتتى. بۇل كۇنگى شارا بارىسىندا بايقاۋشىلاردىڭ سايلاۋ ۇدەرىسىندەگى شەشۋشى ءرولى,  بايقاۋ  ۇدەرىسىندە اقپاراتتىق تەحنولوگيالاردى قولدانۋ سەكىلدى ماسەلەلەر قارالدى. سونداي-اق, سايلاۋدىڭ حالىقارالىق ستاندارتتارى مەن 2011 جانە 2012  جىلدارداعى سايلاۋ ناۋقانىندا سبرقك-نىڭ قىزمەت تاجىريبەسىنە تالداۋ جۇرگىزىلدى. ءلايلا ەدىلقىزى, «ەگەمەن قازاقستان».