حالىقارالىق بايقاۋشىلار ىسكە كىرىستى

«دوستىق» ۇيىندە ورنالاسقان شەت مەم­لەكەتتەردىڭ, حالىقارالىق ۇيىمداردىڭ باي­قاۋ­شىلارىنا, بۇقارالىق اقپارات قۇرال­دارىنىڭ وكىلدەرىنە جاردەمدەسۋ ورتالى­عىنىڭ جەرگىلىكتى بولىمشەسى ءوز جۇمى­سىنا قىزۋ كىرىسىپ كەتتى. بۇگىندە ەلىمىز بويىنشا 236 حالىقارالىق بايقاۋشى اككرە­دي­تاتسيادان وتسە, ولاردىڭ ەكەۋى قىزىل­جار وڭىرىنە بارۋدى ۇيعارىپتى. اتاپ ايتقاندا, ەقىۇ اتىنان تەرىسكەيگە اتباسىن تىرەگەن شەتەلدىك قوناقتار كيرستەن ساكس ينگەر (اۆستريا) مەن ميلاش ستويا گينوۆيچ (سەربيا) وبلىستىق اكىمدىكتە وتكىزىلگەن جىلى شىرايلى كەزدەسۋدەن كەيىن ورتالىقتىڭ جۇمىسىمەن تانىستى. الدا اۋداندارعا بارۋ جوسپارلانىپ وتىر. – شەتەلدەن كەلگەن قوس بايقاۋشى سايلاۋعا دەيىن وسىندا بولىپ, سايلاۋشىلارمەن, سايلاۋ كوميسسياسى مۇشەلەرىمەن جۇزدەسەدى. ولاردىڭ كەزەكتەن تىس سايلاۋعا قاتىستى ماسەلەلەرمەن جان-جاقتى تانىسۋىنا بارلىق مۇمكىندىكتەر جاسالادى. بۇلايشا تاجىريبە الماسۋ ەكى جاققا دا ءتيىمدى بولارى انىق, – دەيدى شەت مەملەكەتتەردىڭ, حالىقارالىق ۇيىمداردىڭ بايقاۋشىلارىنا, بۇقارالىق اقپارات قۇرالدارىنىڭ وكىلدەرىنە جاردەمدەسۋ ورتالىعى وبلىستىق فيليالىنىڭ جەتەكشىسى ۆالەري ەۆدوكيمەنكو. ميسسيا ساراپشىلارىنىڭ ءبىرى كيرستەن ساكس ينگەر قازاقستاندا سايلاۋ ناۋقانى بارىنشا اشىقتىقپەن وتەتىنىنە, دەموكراتيالىق سايلاۋدىڭ قاعيداتتارى ساقتالاتىنىنا سە­نىم ءبىلدىرىپ, سولتۇستىكقازاقستاندىقتاردىڭ قوناق­جاي پەيىلىنە العىسىن جەتكىزدى. الدا رەسەيدىڭ قورعان, تۇمەن, ومبى وبلىس­تارىنان 40-قا تارتا بايقاۋشى كەلەدى دەپ كۇتىلۋدە. ءومىر ەسقالي, «ەگەمەن قازاقستان». سولتۇستىك قازاقستان وبلىسى.