گەرمانيادا بومباعا بايلانىستى 30 مىڭ ادام قاۋىپسىز جەرگە كوشىرىلدى

استانا. 20 مامىر. گەرمانيانىڭ گاننوۆەر قالاسىندا مىڭداعان تۇرعىن اۋە بومباسىنىڭ تابىلۋىنا بايلانىستى قاۋىپسىز جەرگە كوشىرىلدى. بۇل تۋرالى ۆۆس حابارلادى. گاننوۆەردەن ەكىنشى دۇنيەجۇزىلىك سوعىس كەزىندە جارىلماي قالعان اۋە بومبالارى تابىلعان. وسىعان وراي قالانىڭ 30 مىڭنان استام تۇرعىنى 19 مامىر كۇنى كەشتە قاۋىپسىز جەرگە كوشىرىلدى. قالا تۇرعىندارى ۇيلەرىنە جارىلعىش زاتتار زالالسىزداندىرىلعاننان كەيىن عانا ورالا الادى. جەرگىلىكتى ءباسپاسوز قىزمەتىنىڭ دەرەكتەرىنە سۇيەنسەك, سالماعى 250 كگ. بولاتىن بومبا جەر استىندا 70 جىل بويى جاتقان. قاۋىپتى زات بۇرىنعى جوعارعى وقۋ ورنى عيماراتىن بۇزۋ كەزىندە تابىلعان. ماماندار بومبانىڭ قانشالىقتى قاۋىپتى ەكەنىن ناقتى  ايتا الماي وتىر. جالپى, گەرمانيادا سوعىس كەزىنەن جارىلماي قالعان جارىلعىش زاتتار ءجيى تابىلىپ جاتادى. سەبەبى, سوعىس جىلدارى گاننوۆەر وداقتاستاردىڭ ەڭ باستى اۋە نىسانى بولعانى بەلگىلى. ەكىنشى دۇنيەجۇزىلىك سوعىس كەزىندە بۇل قالاعا تاستالعان جارىلعىش زاتتىڭ سانى 100 مىڭنان اسىپ جىعىلادى. ەلامان قوڭىر. دەرەك: BBC. سۋرەت: newsfiber.com.