پەتروپاۆلدا پارامەن سوتتالعان شەنەۋنىكتىڭ تۋىستارى ميتينگ وتكىزدى

پەتروپاۆل. 19 مامىر. پارا الدى دەگەن كۇدىكپەن تۇتقىندالىپ, تۇرمەگە توعىتىلعان باسقارما باسشىسىنىڭ تۋعان-تۋىستارى وبلىس ورتالىعىندا قارسىلىق ميتينگىسىن وتكىزدى. بۇل تۋرالى كتك تەلەارناسى حابارلادى. ولار پەتروپاۆلدىڭ اكىمدىگىنەن جيىن وتكىزۋگە زاڭدى رۇقسات العاننان كەيىن وسىنداي ۇيعارىمعا كەلىپتى.  بۇعان دەيىن جيىن-شەرۋلەر ۇيىمداستىرۋعا كەلىسىم بەرىپ كورمەگەن اكىمدىكتىڭ بۇل قادامى شەنەۋنىك جازىقتى ەمەس دەگەن ويدى قۇپتاعانداي سەزىلەدى.     وبلىستىق قۇرىلىس باسقارماسىنىڭ بۇرىنعى باسشىسى راتمير ۋسمانوۆ مامليۋتكا قالاسىندا تۇراتىن كاسىپكەر مۇرات حورسيەۆتەن 10 مىڭ دوللار بوپسالاعانى ءۇشىن 6 جىلعا سوتتالعان بولاتىن.   م. حورسيەۆ تە 4 جىل مەرزىمگە جازاعا كەسىلگەن. الايدا, ەكەۋى دە سوت ۇكىمىمەن كەلىسپەي جوعارعى ينستانتسياعا شاعىم ءتۇسىردى. ەندىگى ۇمىتتەرى – كاسساتسيالىق سوت. ءسوز اراسىندا وسى قىلمىستىق ءىس بويىنشا وبلىستىق, اۋداندىق دەڭگەيدەگى بىرقاتار لاۋازىمدى تۇلعالار جاۋاپكەرشىلىككە تارتىلىپ, وبلىستىڭ اكىمى مەن قۇرىلىس ىستەرىنە جاۋاپتى ورىنباسارى قىزمەتتەرىنەن الاستاتىلعانىن ايتا كەتكەن ءجون. «قارجى پوليتسياسى مەنىڭ ۇلىمنىڭ ءسوزى جازىلعان تاسپانى مونتاجداعان. سالدارىنان اقشانى قارىزعا الدىم دەگەن سوزدەردىڭ ءبارى وشىرىلگەن. بىزدە دوسىڭنان قارىز العانىڭ ءۇشىن دە سوتتايدى. بۇل – بارىپ تۇرعان ادىلەتسىزدىك!», دەيدى راتميردىڭ اناسى سۋفيا ۋسمانوۆا. ءومىر ەسقالي. دەرەك: كتك تەلەارناسى. سۋرەت: egemen.kz