پەتروپاۆل. 19 مامىر. سولتۇستىك قازاقستان وبلىسىنىڭ اقجار اۋدانىندا مەملەكەتتىك شەكارا بەكەتىنىڭ اشىلۋ ءراسىمى ءوتىپ, وعان ايماق باسشىسى ەرىك سۇلتانوۆ, قر ۇقك شەكارا قىزمەتى ديرەكتورىنىڭ ورىنباسارى, پولكوۆنيك مۇحتار ءسابيدولدانوۆ قاتىستى. بۇل تۋرالى وبلىس اكىمىنىڭ ءباسپاسوز قىزمەتى حابارلادى.
بۇعان دەيىن شەكارا اۋماعىندا تۇراتىن تۇرعىندار ەكى ەل اراسىنا قاتىناۋ ءۇشىن شالعايداعى حالىقارالىق بەكەتكە بارىپ, اۋرە-سارساڭعا ءتۇسىپ جۇرسە, ەندى ۋاقىت جاعىنان كوپ ۇتاتىن بولدى. ەڭ باستىسى, تۋعان-تۋىستارىنا بارۋ وڭايلاتىلعان تارتىپپەن جۇزەگە اسىرىلادى. بۇل تۋرالى ەرىك سۇلتانوۆ ءوز سوزىندە اتاپ كورسەتىپ, قازاقستان مەن رەسەي اراسىنداعى دوستىق قارىم-قاتىناستىڭ ودان ءارى بەكي تۇسۋىنە, ەكونوميكالىق-ساۋدا-ساتتىق بايلانىستاردىڭ تۇرلاۋلى دامۋىنا يگى ىقپالىن تيگىزەتىنىن جەتكىزدى.
«كىشكەنەكول» شەكارا كومەنداتۋراسىنىڭ كومەندانتى ماكسيم ماكارەنكونىڭ ايتۋىنشا, كۇنىنە شەكارادان 60 ادامعا دەيىن ءوتۋ مۇمكىندىگى قامتاماسىز ەتىلگەن.
قر مەملەكەتتىك شەكاراسىنىڭ نىعايۋىنا بەلسەندى كومەك كورسەتكەنى ءۇشىن وبلىس اكىمى ەرىك سۇلتانوۆقا «شەكارانى ۇزدىك كۇزەتكەنى ءۇشىن» مەدالى تاپسىرىلدى.
بۇگىندە وڭىردە 27 شەكارا بەكەتى جەڭىلدەتىلگەن تارتىپپەن جۇمىس ىستەيدى.
ءومىر ەسقالي.
دەرەك, سۋرەت: سولتۇستىك قازاقستان وبلىسى اكىمدىگىنىڭ ءباسپاسوز قىزمەتى.
