جاڭاوزەندە قارۋلانعان 3 جىگىت بۋكمەكەرلىك كەڭسەگە شابۋىل جاسادى

اقتاۋ. 19 مامىر. ماڭعىستاۋ وبلىسى جاڭاوزەن قالاسىندا قارۋلانعان ءۇش جىگىت بۋكمەكەرلىك كەڭسەگە شابۋىلدادى. بۇل تۋرالى lada.kz سايتىنا سىلتەمە جاساپ, egemen.kz ءتىلشىسى حابارلادى. قىلمىس جاڭاوزەن قالاسىنداعى 4-ءشى شاعىن اۋدانىندا ورنالاسقان Inbet بۋكمەكەرلىك كەڭسەسىندە بولعان. وقيعا ورنىنا كەلگەن شۇعىل-زەرتتەۋ توبى ماسكا كيىپ, قارۋلانعان 3 جىگىتتىڭ كەڭسەگە باسىپ كىرىپ, ونداعىلاردى قورقىتىپ, كاسساداعى بارلىق اقشانى بەرۋىن تالاپ ەتكەندىگىن انىقتادى. قاراقشىلار 15 مىڭ تەڭگە كولەمىندە اقشانى الىپ كەتكەن. ولاردىڭ بىرەۋى ويىن ۇستەلى ماڭىنداعى جاستارعا قاراي وق اتقان. سالدارىنان جاراقاتتانعان 23 جانە 24 جاستاعى ەكى جىگىت جاڭاوزەن قالالىق اۋرۋحاناسىنا جەتكىزىلدى. بۇگىندە ولار تراۆماتولوگيا بولىمىندە ەم-دوم قابىلداۋدا. قاڭعىعان وق ءبىرىنىڭ جامباسىنا تيسە, ەكىنشىسىنىڭ قولىن جاراقاتتاعان. قازىرگى تاڭدا بۇل ىسكە قاتىستى ناقتى دەرەكتەر جوق. تەرگەۋ امالدارى جۇرگىزىلۋدە. گۇلايىم شىنتەمىرقىزى. دەرەك, سۋرەت: lada.kz.