الماتىلىقتاردى ابدىرتقان داۋىل قايتالانۋى مۇمكىن

الماتى. 19 مامىر. وتكەن سەنبىدەگى تۇتقيىلدان قاتتى سوققان جەل مەن ارتىنان نوسەرلەتىپ توقتاۋسىز جاۋعان جاڭبىر الماتىلىقتاردىڭ ەسىندە. «قازگيدرومەت» ءدال سونداي وقيعانىڭ الداعى كۇندەرى تاعى دا قايتالانىتىنىن ەسكەرتتى. بۇل تۋرالى قاز تاگ حابارلادى. «قازگيدرومەت» رەسپۋبليكالىق مەملەكەتتىك كاسىپورنى فيليالىنىڭ ءبولىم باستىعى سۆەتلانا امانقۇلوۆانىڭ مالىمەتىنە قاراعاندا, كەلەسى داۋىل شامامەن 21-22 مامىر كۇندەرى قايتا كوتەرىلۋى مۇمكىن. «قالادا شاڭ بوران بولماسى انىق. سەبەبى, جەردەگى جاۋىنىڭ ىلعىلى ءالى دە كەپكەن جوق. بىراق, كوشەلەردە قالدىق پەن كۇل-قوقىس كوپ. قۋراعان اعاشتار دا بارشىلىق. سوندىقتان قالانىڭ ءتيىستى كوممۋنالدىق مەكەمەلەرى بۇل جايتتى ەسكەرۋى ءتيىس» دەدى مامان. سينوپتيكتەر اۋا رايىنا قاتىستى بارلىق دەرەكتەردى كۇن سايىن قالا اكىمدىگى مەن توتەنشە جاعدايلار كوميتەتىنە ءۇزىلىسسىز جىبەرىپ تۇرادى. سونداي-اق, سۆەتلانا امانقۇلوۆا: «تابيعاتتىڭ توسىن مىنەز تانىتۋى ماۋسىم ايىنىڭ سوڭىنا دەيىن الدەنەشە رەت قايتالانۋى ىقتيمال, ويتكەنى, ءدال وسى مەزگىلدە اتلانت مۇحيتىنان اۋىپ كاسپيدىڭ ۇستىمەن وتكەن اۋا تولقىنى وڭتۇستىك قازاقستان وبلىسىنىڭ اۋماعىنا جينالادى. وسى كەزدەردە اتموسفەرانىڭ قىسىمى ارتىپ, تەمپەراتۋرا تومەندەيدى, جەل كۇشەيەدى»,– دەدى. ايتا كەتەيىك, الماتىلىق سينوپتيكتەر الداعى بولاتىن توسىن قۇبىلىس تۋرالى ناقتى مالىمەتتى 20 مامىر كۇنى تاراتاتىنىن دا ەسكەرتىپ وتىر. تالعات ءسۇيىنباي. دەرەك, سۋرەت: قازتاگ.