جاقىندا الماتىدا ۇلى جەڭىستىڭ 70 جىلدىعىنا ارنالىپ ەرەكشە فەستيۆال باستالدى. الماتىعا مامىردىڭ كەلگەنىن مامىرگۇلدىڭ ءيىسى اڭقىعانىنان بىلەسىڭ. وسىناۋ ادەمى گۇل ءارى جەڭىس مەيرامىمەن دە استاسىپ جاتىر.
ونىڭ ۇستىنە كەزىندە ۇلى وتان سوعىسىندا قازا بولعان اتا-بابالارىمىزدىڭ قۇرمەتىنە وسىدان جارتى عاسىردان استام ۋاقىت بۇرىن جەرلەستەرىمىز ماريام ساعيتوۆا مەن تادەۋش دزەۆيتسكي الماتىداعى 28 گۆاردياشى-پانفيلوۆشىلار باعىندا مامىرگۇل الاڭىن («سيرەنوۆايا پوليانا») وتىرعىزعان ەكەن. سودان بەرى بۇل الاڭداعى مامىرگۇلدىڭ تۇرلەرى 300-گە جەتكەن. ونىڭ ىشىندە «اناما سىيلىق», «اققۋ», «ءسۇيىنشى» اتتى تۇرلەرى ارنايى اۆتورلىق كۋالىك العان. ياعني, بۋدانداستىرىلعان وسىناۋ مامىرگۇلدەردىڭ يەلەرى بار.
ادەمىلىگى كوزدىڭ جاۋىن الاتىن, ءيىسى جۇپار وسىناۋ باقتىڭ گۇلدەنۋىنە, وتاندىق مامىرگۇلدەردىڭ عاجاپ سۇرىپتارىنىڭ پايدا بولۋىنا قازاق كسر عىلىم اكادەمياسىنىڭ باس بوتانيكالىق باعىنىڭ قىزمەتكەرلەرى انتونينا مەلنيك, ۆالەنتينا رۋبانيك پەن بوريس دياگيلەۆ سياقتى سەلەكتسيونەر مامانداردىڭ سىڭىرگەن ەڭبەگى بار ەكەنىن ۇمىتپاۋ قاجەت.
كەزىندە مامىرگۇلدەردىڭ قازاقستانداعى كوللەكتسيالىق الاڭىنداعى سۇرىپتارىنا كەشەگى كەڭەستىك اۋماقتىڭ بوتانيكتەرى كوپ قىزىعۋشىلىق تۋعىزعان بولسا, قازىر دە «سنەجنىي كوم», «كازاحستانسكي سۋۆەنير», «اكادەميك ق.ساتباەۆتىڭ قۇرمەتىنە», «ليلوۆايا پيراميدا», «شىعىس شۇعىلاسى», «حان ءتاڭىرى», «قازاقستاندىق» دەيتىن تۇرلەرى ەش جەردە كەزدەسپەيدى.
وكىنىشكە قاراي, ءومىرىن وسىناۋ گۇلدەرگە ارناعان سەلەكتسيونەرلەردىڭ كوزدەرى كەتكەن سوڭ, مامىرگۇلدىڭ كەيبىر تۇرلەرى جويىلعان. سوندىقتان, تابيعاتتىڭ وسىناۋ بايلىعىن جوعالتىپ الماۋ ءۇشىن بۇل ماسەلەگە بەيجاي قارامايتىن جاندار جاڭا باستامانى قولعا الىپ وتىر.
ەندىگى جەردە جاس ناتۋراليستەر ستانساسىنىڭ اۋماعىندا مامىرگۇلدەردىڭ بارلىق سۇرىپتارىن وتىرعىزىپ, كوبەيتۋدى قولعا الماق. ءسويتىپ, مەكتەپ اۋلالارىندا, قازاقستان رەسپۋبليكاسىنىڭ تۇڭعىش پرەزيدەنتى ساياباعىندا مامىرگۇلدەر اللەياسىن جايقالتاتىن بولادى.
جاس ناتۋراليستەر ستانساسىندا وتكەن العاشقى مامىرگۇل فەستيۆالى «مامىرگۇل ءيىسى اڭقىعان قالا...» دەپ اتالادى.
فەستيۆال باعدارلاماسى اياسىندا مامىرگۇل تۇرلەرىنىڭ كورمەسى, باس بوتانيكالىق باق ماماندارىمەن كەزدەسۋلەر, «جەڭىسكە ساليۋت» اتتى جاس ارانجيروۆششيكتەر بايقاۋى, «مەن مامىرگۇلدى سۇيەمىن» اتتى سۋرەت كونكۋرسى, مونشاق تىگۋ سياقتى ءتۇرلى قىزىقتى شارالار ۇيىمداستىرىلۋدا.
ايناش ەسالي, «ەگەمەن قازاقستان».
الماتى.
