ماقسات – سايلاۋ مولدىرلىگىن قامتاماسىز ەتۋ

كەشە ورال قالاسىندا قازاقستانداعى سايلاۋلاردى بايقاۋ جونىندەگى رەسپۋبليكالىق قوعامدىق كوميسسياسى باتىس قازاقستان وبلىستىق فيليالىنىڭ تانىستىرىلۋ ءراسىمى وتكىزىلدى.وندا  اتالعان فيليالدىڭ ءتورايىمى ۆەرا شوحينا ونىڭ العا قويعان ماقساتتارى مەن مىندەتتەرى جانە تۇتاستاي العاندا پرەزيدەنتتىك سايلاۋعا ازىرلىك جۇمىستارى مەن ونى وتكىزۋ كەزىندەگى قۇرىلىمدىق بولىمشەنىڭ اتقاراتىن قىزمەتى تۋرالى جان-جاقتى ءارى ەگجەي-تەگجەيلى بايانداپ بەردى. ونىڭ باستى ءتۇيىنى تومەندەگىدەي: اتالعان رەسپۋبليكالىق قوعامدىق كوميسسيا 2005 جانە 2011 جىلدارى وتكىزىلگەن پرەزيدەنتتىك سايلاۋ مەن 2007 جانە 2012 جىلدارى وتكىزىلگەن پارلامەنتتىك سايلاۋدا ءوزىنىڭ تيىمدىلىگىن كورسەتە بىلگەن بولاتىن.سوندىقتان دا الداعى 26 ءساۋىر كۇنى پرەزيدەنتتىك سايلاۋ وتكىزىلەتىنىنە وراي بيىلعى ناۋرىز ايىنىڭ 3-ىندە ونىڭ قىزمەتى قايتادان جاڭعىرتىلعانى بەلگىلى. باسپاسوزدە بۇعان دەيىن حابارلانعانىنداي, ونىڭ قۇرامىنا بەلگىلى قوعام قايراتكەرلەرى, عالىمدار, ساراپشىلار مەن جۋرناليستەر ەنگىزىلدى. كوميسسيا قىزمەتىنىڭ باستى ماقساتى – سايلاۋ ۇدەرىسىنىڭ بارلىق ساتىلارىندا ونىڭ مولدىرلىگىن, ادىلدىگى مەن تازالىعىن قامتاماسىز ەتۋ. سونىمەن بىرگە, سايلاۋشىلار مەن سايلاۋعا قاتىساتىن كانديداتتاردىڭ كونستيتۋتسيالىق قۇقىقتارى بۇزىلماۋىن قاداعالاۋ ءىسى دە كوميسسيا قىزمەتى قۇزىرىنا كىرەدى. بۇگىنگى ەلەكتورالدىق كەزەڭدە بارلىق جەردەگىدەي باتىس قا­زاقستان وبلىسىندا دا رەس­پۋب­ليكالىق قوعامدىق كوميسسيانىڭ ايماقتىق وكىلدىگى ءوز جۇمىسىن باستاپ وتىر. بۇل وكىلدىك باي­قاۋلاردى شوعىرلاندىرۋ ورتالىعىنا اينالماق, دەپ مالىمدەدى بريفينگتە ۆ.شوحينا. وسى ورايدا, ورال ءوڭىر­ىن­دە بەلسەندى ازاماتتاردىڭ قاتارى­نان بايقاۋشىلاردىڭ كەڭ اۋ­قىمدى قوعامدىق جۇيەسى جاساقتال­عان. قازىرگى كۇنى مۇندا سايلاۋ ۋچاس­كەلەرىنە كەلەتىن بايقاۋشىلارعا ازاماتتىق ۇستانىمى جوعارى ۇمىتكەرلەردى تاڭداۋ مەن ىرىكتەۋ جۇمىستارى جۇرگىزىلۋدە. ءسويتىپ, پرەزيدەنتتىككە كانديداتتارعا داۋىس بەرىلەتىن 26 ءساۋىر كۇنى وبلىستاعى 523 سايلاۋ ۋچاسكەسىندە كوميسسيا فيليالى وكىلدىكتەرىنىڭ بايىپتى بايقاۋلارى جۇزەگە اسىرىلماق. رەسپۋبليكالىق قوعامدىق كوميسسيا وكىلدىگى ءوز قىزمەتى بارىسىندا حالىقارالىق بايقاۋ­شى­لارمەن, وبلىستىق سايلاۋ كوميس­سياسىمەن, پروكۋراتۋرا ورگان­دارىمەن, پرەزيدەنتتىككە كان­دي­­داتتاردىڭ سايلاۋالدى شتابتارى­مەن جانە باق-پەن اشىق ءارى بەلسەندى بايلانىس ۇستاپ وتىرۋدى ۇيعارعان. وسىنداي جاندى قا­رىم-قاتىناس عىلىمي-ساراپشىلار قاۋىمداستىعى جانە ازاماتتىق اليانس ينستيتۋتى وكىلدەرى اراسىندا دا جۇرگىزىلمەك. پرەزيدەنتتىك سايلاۋدىڭ قورى­تىن­دىسى بويىنشا رەسپۋبليكالىق قوعامدىق كوميسسيانىڭ باتىس قازاق­ستان وبلىسىنداعى فيليالى ءوزى­نىڭ تولىققاندى ەسەبىن جاسايدى. بۇعان قوسا, سايلاۋ ۇدەرىسى­نىڭ بارلىق كەزەڭدەرى بويىنشا وبەك­تيۆتى باعا بەرۋدى نازاردا ۇستايدى, دەپ ءتۇيىن جاسادى بريفينگتە فيليال ءتورايىمى ۆەرا كۋزمينيچنا. تەمىر قۇسايىن, «ەگەمەن قازاقستان». ورال.