استانا. 4 ناۋرىز. ۆتب بىرىڭعاي ليگاسىندا وينايتىن «استانا» باسكەتبول كومانداسى ءوز الاڭىندا سامارانىڭ «كراسنىە كرىلياسىن» 95:88 ەسەبىمەن جەڭدى. بۇل تۋرالى egemen.kz حابارلادى.
ويىندا العاش بولىپ ۇپاي ەنشىلەگەن «استانا» ءبىرىنشى كەزەڭدى ءوز پايداسىنا اياقتادى.
دەگەنمەن, قوناقتار باسقا كەزەڭدەردەن گورى ءدال وسى شيرەكتە ايتارلىقتاي قارسىلىق كورسەتتى. ءتىپتى كەزەڭنىڭ ورتا تۇسىنان اۋا بەرگەندە سامارالىقتار 8 ۇپاي باسىمدىعىمەن العا شىقتى. ايتسە دە, ولار ۇزىلىسكە دەيىن بۇل باسىمدىقتى ۇستاپ تۇرا المادى.
ويىننىڭ قالعان ءۇش كەزەڭىندە «كراسنىە كرىليا» كومانداسىنىڭ ويىنشىلارى تەك ەسەپ ايىرماسىن قىسقارتۋمەن عانا ۋاقىت وتكىزدى. تارتىستىڭ ءۇشىنشى كەزەڭىندە «استانا» 74:56 ەسەبىمەن العا شىعىپ, ۇپاي باسىمدىعىن 18-گە دەيىن ارتتىردى. الايدا, ءتورتىنشى كەزەڭدە قوناقتاردىڭ ويىنىنا قان جۇگىرىپ, ەكى كوماندا اراسىنداعى ەسەپ 4 ۇپايعا دەيىن قىسقاردى. «استانانى» جاتتىقتىراتىن ليتۆالىق مامان رامۋناس بۋتاۋتاس دەرەۋ كومانداسىنىڭ ويىن ورنەگىنە وزگەرىس ەنگىزدى. ناتيجەسىندە, ەلوردالىقتار كەزدەسۋ سوڭىنا دەيىن جەڭىس ەسەبىن ساقتاپ قالا الدى. سوعان قاراماستان تارتىس سوڭىنداعى ءباسپاسوز ءماسليحاتىندا بۋتاۋتاس مىرزا شاكىرتتەرىنىڭ ويىنىنا كوڭىلى تولماعانىن ايتتى.
كەزدەسۋ بارىسىندا ەڭ كوپ ۇپاي جيناعان ويىنشى «كراسنىە كرىليا» ساپىنداعى ۆيكتور زارياجكو. ول 40 مينۋتتىڭ ىشىندە ەنشىسىنە 25 ۇپاي جازعان ەكەن. ال «استانا» كومانداسىنان دجەرري دجونسون ۇزدىك اتاندى. دجەرري ءوز كومانداسىنىڭ پايداسىنا 20 ۇپاي ولجالادى.
وسى جەڭىسىنەن كەيىن «استانا» ۆتب ليگاسىنىڭ تۋرنير كەستەسىندە 9-ورىنعا جايعاستى. سايىستىڭ پلەي-وفف كەزەڭىنە ۇزدىك سەگىز كوماندا شىعاتىنى بەلگىلى. استانالىقتار ليگا اياسىنداعى كەلەسى ويىندى 8 ناۋرىز كۇنى ءوز الاڭىندا «نيجني نوۆگورودقا» قارسى وتكىزەدى. بۇل كوماندا بۇگىندە تۋرنير كەستەسىندە 4-ساتىدا كەلەدى. سونداي-اق, بۇل «استانانىڭ» قاتارىنان ءۇشىنشى جەڭىسى ەكەنىن دە ايتا كەتەيىك. وسىعان دەيىن ەستونيانىڭ "كالەۆ" كومانداسى مەن ساراتوۆتىڭ "اۆتودورىنان" باسىم تۇسكەن بولاتىن.
ەلامان قوڭىر.
دەرەك: egemen.kz
سۋرەت: bcastana.kz.
