پرەزيدەنتتىككە العاش ۇسىنىلعاندار ءتىزىمى جاريالاندى

استانا. 4 اقپان. ورتالىق سايلاۋ كوميسسياسى قازاقستان پرەزيدەنتى بولۋعا ۇمىتكەرلىككە ءوزىن-ءوزى ۇسىنۋشىلاردىڭ العاشقى لەگىنىڭ اتى-ءجونىن جاريا ەتتى. بۇل تۋرالى Tengrinews.kz ءتىلشىسى حابارلادى. «2 ناۋرىز كۇنى ورتالىق سايلاۋ كوميسسياسىنا ءوز كانديداتۋراسىن ءوزىن-ءوزى ۇسىنۋ ءتارتىبى بويىنشا اسقار جوراباي ۇلى سىرعاباەۆ ارىز بەردى. 3 ناۋرىز كۇنى تاعى دا ءوزىن-ءوزى ۇسىنۋ تارتىبىمەن ءوز كانديداتۋرالارىن سافيوللا قالاباي ۇلى الداجانوۆ, ليمانا قويشيەۆا, باقىت تولەگەن ۇلى ابدىكارىموۆ جانە سۋحراب ءامينجان ۇلى مىرزاشوۆ ۇسىندى», - دەلىنگەن وسك تاراتقان حابارلامادا. كوميسسيانىڭ مالىمەتىنشە, قازىرگە دەيىن بەس تالاپكەر ۇسىنىلىپ وتىر, ونىڭ بىرەۋى - ايەل. «قازاقستان رەسپۋبليكاسىنداعى سايلاۋ تۋرالى» كونستيتۋتسيالىق زاڭنىڭ 54-بابى 2-تارماعىنا سايكەس, پرەزيدەنتتىككە ۇمىتكەرلەردى سايكەستەندىرۋدى جانە وعان كونستيتۋتسيامەن جانە قازاقستان رەسپۋبليكاسىنداعى سايلاۋ تۋرالى» كونستيتۋتسيالىق زاڭ قوياتىن تالاپتاردى ورتالىق سايلاۋ كوميسسياسى ءوزىن-ءوزى ۇسىنۋ تۋرالى ارىز بەرىلگەن ساتتەن بەس كۇن ىشىندە بەكىتەدى», - دەلىنگەن ءباسپاسوز پاراعىندا. ەسكە سالا كەتەيىك, 26 اقپان كۇنى ورتالىق سايلاۋ كوميسسياسى بەكىتكەن كۇنتىزبەلىك جوسپارعا سايكەس قازاقستان پرەزيدەنتىنىڭ كەزەكتەن تىس سايلاۋىنا ۇمىتكەرلەردى ۇسىنۋ باستالعان بولاتىن. سايلاۋ 2015 جىلعى 26 ساۋىرگە بەلگىلەنىپ وتىر. ساكەن مايلىباي.