پەتروپاۆلدا حالىقارالىق سۋرەت كورمەسى ءوتتى

پەتروپاۆل. 4 ناۋرىز. پەتروپاۆل قالاسىنداعى وبلىستىق بەينەلەۋ ونەرى مۇراجايىندا «قازاقستان مەن پولشا اراسىندا» اتتى حالىقارالىق كورمە ۇيىمداستىرىلدى. اتالعان شارا قازاقستان حالقى اسسامبلەياسى جىلىنا ارنالدى. بۇل تۋرالى سولتۇستىك قازاقستان وبلىستىق مادەنيەت باسقارماسىنىڭ ءباسپاسوز قىزمەتى حابارلادى. جەرگىلىكتى پولياكتاردىڭ «كوپەرنيك» مادەني ورتالىعىنىڭ ۇيىتقى بولۋىمەن وتكەن كورمە-بايقاۋعا قوس ەلدەن 273 ۇمىتكەر قاتىسۋعا نيەت بىلدىرگەن. جاس قىلقالام شەبەرلەرى ءوز تۋىندىلارىنا قازاقستان مەن پولشا اراسىنداعى دوستىقتى, ۇلتتىق ونەر مەن مادەنيەتتى, اسەم تابيعاتتى, سيرەك كەزدەسەتىن ءتۇز تاعىلارىن ارقاۋ ەتكەن. «بايقاۋ وتكەن جىلدىڭ جەلتوقسانىندا باستالعان بولاتىن. قازاق حالقىنىڭ تاريحي جادىگەرلەرىن, ۇلتتىق قۇندىلىقتارىن دارىپتەيتىن دۇنيەلەردى كەستەلى قاعازعا بەينەلەگەن وقۋشىلاردىڭ بىرقاتار شىعارمالارى كراكوۆ قالالىق كىتاپحاناسىنا قويىلدى», دەيدى «كوپەرنيك» پولياك مادەني ورتالىعى توراعاسىنىڭ ورىنباسارى ۆالەنتينا كورنەۆا. بايقاۋ قورىتىندىسىندا 2 گران-پري, 54 لاۋرەات يەلەرىنىڭ ەسىمدەرى بەلگىلى بولدى. گران-ءپريدىڭ ءبىرىن پەتروپاۆلدىق جاس تالانت ۋليانا بوريسوۆا جەڭىپ الدى. جۇلدەگەرلەردى پولشانىڭ قازاقستان رەسپۋبليكاسىنداعى ەلشىلىگىنىڭ ەكىنشى حاتشىسى يۋستىنا سكشيدلو تابىس ەتتى. سونداي-اق, كورمەگە ارنايى قاتىسۋعا كەلگەن پولشالىق جاس ونەرپازدار قالانىڭ كورىكتى جەرلەرىن تاماشالادى. ءومىر ەسقالي. دەرەك, سۋرەت: سولتۇستىك قازاقستان وبلىستىق مادەنيەت باسقارماسىنىڭ ءباسپاسوز قىزمەتى.