ماگنيتۋداسى 7,1 بالعا جەتكەن بۇل ءزىلزالانىڭ ەپيتسەنترى ەۆەرەست تاۋىنا جاقىن ورنالاسقان نامچە-بازار ەلدى مەكەننىڭ جانىندا بولعان. ءۇندىستان مەتەورولوگتارىنىڭ دەرەگى بويىنشا, جەراستى سىلكىنىستەرى جەرگىلىكتى ۋاقىت بويىنشا 12.35-تە باستالىپ بىرنەشە مينۋتقا سوزىلعان. جەر سىلكىنىسىنىڭ ناعىز كىندىگى 10 شاقىرىم تەرەڭدىكتە ورىن العان.
ءساۋىر ايىنان بەرى كۇن سايىن ورىن الاتىن ءزىلزالادان زارەزاپ بولعان كاتماندۋ قالاسىنىڭ تۇرعىندارى قۇرىلىس عيماراتتارىنىڭ جانىنا جاقىنداماي, ۇنەمى اشىق اسپان استىندا تۇنەپ كەلەدى. سولاي بولا تۇرسا دا, جەرگىلىكتى بيلىكتىڭ مالىمدەۋىنشە, سوڭعى ءزىلزالادان ونداعان ادام قازا بولىپ, مىڭداعان تۇرعىندار زارداپ شەككەن. بۇدان بۇرىن «ديالوگ» اگەنتتىگى نەپالدا لاي كوشكىنى باستالۋىنا بايلانىستى جەر سىلكىنىسىنەن زارداپ شەككەندەردى ىزدەستىرۋ شارالارى توقتاتىلعانىن مالىمدەگەن بولاتىن. سوڭعى جەر سىلكىنىسىنە بايلانىستى قۇتقارۋ شارالارى قايتا جانداندىرىلدى. تەك ءبىر تاۋلىكتىڭ ىشىندە قۇتقارۋشىلار لانگتانگ ۇلتتىق پاركىندە ورنالاسقان دەرەۆنيادان 120 ادامنىڭ مۇردەسىن تاپقان. «الايدا, لانگتانگ ۇلتتىق پاركى ورنالاسقان ماڭايدا ءجيى-ءجيى لاي كوشكىندەرى ورىن الۋدا. سوندىقتان, قۇتقارۋشىلاردىڭ جۇمىسىن جالعاستىرۋىنا ەشبىر مۇمكىندىك بولماي تۇر. ولار قازىر جۇمىستارىن ۋاقىتشا توقتاتۋعا ءماجبۇر», دەپ حابارلادى جەرگىلىكتى بيلىك شەنەۋنىگى گاۋتاما ريمال رەيتەر اگەنتتىگىنە.
سوڭعى مالىمەتتەر بويىنشا, نەپالدا بولعان ءزىلزالا زارداپتارىنىڭ قۇرباندارى 8 مىڭنان اسىپ, 17576 ادام ءارتۇرلى جاراقاتتار العان.
