ماۋەلى بايتەرەكتەي جاپىراعى جايىلعان اۋلەتتىڭ باستاۋىندا تۇرعان كەڭەس وڭ-سولىن تانىعان جىگىت شاعىندا ەڭبەك جولىن تەمىرجول سالاسىندا باستاپتى. سىمداي تارتىلعان قوس رەلسپەن ءارلى-بەرلى جۇيتكىگەن پويىز قۇرامالارىنا قىزىعا قاراۋشى ەدى. باتىستان شىعىسقا, شىعىستان باتىسقا بەت العان تەپلوۆوز گۇرىلىنە قۇلاق تۇرەتىن. ءوزى دە تەپولوۆوز جۇرگىزسەم دەپ قيالعا بەرىلەتىن. جۇرەك تۇكپىرىنە ۇيالاعان سول قۇشتارلىق ونى تەمىرجول سالاسىمەن بىتە قايناستىرىپ جىبەردى. سونداي اۋلەتتىڭ ءبىرى – ايمۇرزاەۆتار.
ءوزى ۇناتقان, جۇرەگىمەن قالاعان سالاعا جۇمىسقا ورنالاسقان كەڭەس ايمۇرزاەۆ تەمىرجولدان ەشقايدا بەت بۇرمادى. ەڭبەك جولىن تەك وسى سالامەن عانا بايلانىستىردى. تاعىلىمدى ءتالىمىن ۇيرەتكەن الدىڭعى تولقىن اعالاردى قۇرمەتتەدى. وزىنەن كەيىنگى بۋىندى تەمىر جول سالاسىنىڭ قىر-سىرىنا باۋلىدى. ماڭداي تەرىن توگە ەڭبەك ەتىپ, وسى سالادان زەينەتكەرلىككە شىقتى. ايتقانداي, ومىرلىك سەرىگى ۇلبولسىنمەن جۇرەگى ۇندەسىپ, شاڭىراق كوتەردى. ول دا وسى سالادا ەڭبەك ەتتى. ەرلى-زايىپتى ايمۇرزاەۆتاردىڭ وتباسىندا ءدۇنيەگە كەلگەن 8 بالانىڭ بەسەۋى ءوز كاسىپتەرىن تەمىرجول سالاسىنان تاپتى. ارينە, كەڭەس پەن ۇلبولسىن بالالارىنا تەمىرجولشى بولىڭدار دەمەدى. بالارىنىڭ وزدەرى اتا-انا كاسىبىن جالعاستىرۋدى قالاپتى. ويتكەنى, بالالارى ءبىر-بىرىنە ۇدايى قۇرمەتپەن, سىيلاستىقپەن قارايتىن اتا-اناسىن ماقتانىش تۇتتى. ەڭبەك ادامى رەتىندە ۇجىمىندا ۇلكەن قۇرمەتكە بولەنگەنىنە قىزىعا قارادى.
– كەڭەس ەشقاشان ادالدىقتىڭ الا ءجىبىن اتتاعان جوق. ۇلكەندى سىيلاۋدى بىلەدى, وزىنەن كەيىنگىلەرگە قامقورلىعىن ايامادى. وسىنداي ادامگەرشىلىگى ءۇشىن ونى ءبارى قۇرمەتتەدى, –دەيدى «التىن القا» يەگەرى ۇلبولسىن ايمۇرزاەۆا. – ونى بالالارىمىز دا ۇلگى-ونەگە ەتتى.
ايمۇرزاەۆتاردىڭ تەمىرجول سالاسىنداعى ەڭبەك جولىن ابىرويلى جالعاستىرعان ۇرپاعىنىڭ ءبىرى – قىزى يرينا. «اكە-شەشەمىزدىڭ تەمىرجول سالاسىندا ەڭبەك ەتكەنىن كورە ءجۇرىپ, مەن دە ءومىرىمدى تەمىر جولمەن بايلانىستىرعىم كەلدى. راس, اكەم تەمىرجول كولىگىندە ايەلدەردىڭ جۇمىس جاساۋىنا ءۇزىلدى-كەسىلدى تىيىم سالىنادى دەۋشى ەدى. ءتىپتى, ينستيتۋتقا وقۋعا قۇجات تاپسىرعانىمدا دا سول ايتقانىن قايتالادى. بىراق, اتا-انانىڭ جولىن جالعاستىرۋدى ماقسات ەتتىم» دەيدى ول.
ءبىر كەزدەرى تەمىرجولدا تاعدىرى توعىسقان كەڭەس پەن ۇلبولسىن اتا-اجە اتانعان زەينەتكەرلەر بولعانمەن, وزدەرىنىڭ ەڭبەك جولى باستاۋ العان سالانىڭ قۇرمەتتى ارداگەرلەرى اتاندى. جالپى, ايمۇرزاەۆتار اۋلەتىندەگى تەمىرجولشىلار قاتارى 19 ادامعا جەتتى. اۋلەتتەگى 8 بالا مەن 9 نەمەرە تەمىرجولدىڭ بىلگىر ماماندارى اتاندى. ولاردىڭ ءبىرازى الماتىدا, كەيبىرى اتىراۋ قالاسى مەن مۇنايلى ءوڭىردىڭ ءار تۇكپىرىندە تۇرادى. الايدا, ولاردىڭ بارلىعى كاسىبي مەرەكە قارساڭىندا بالالىق بالداۋرەنى وتكەن قاراشاڭىراقتا باس قوسادى. ءسويتىپ, الدىمەن كەڭەس قاريا مەن ۇلبولسىن اجەنى كاسىبي مەرەكەمەن قۇتتىقتايدى.
– مەن باقىتتىمىن, اينالايىندار! جاپىراعىم جايىلسا ەكەن دەگەن ارمانىم ورىندالدى. ەڭبەك جولىمدى جالعاستىرعان سەندەر امان-ەسەن جۇرىڭدەر. وزدەرىڭ قالاعان ماماندىققا ادالدىقتان اينىماڭدار. وتىرىك ايتۋدان اۋلاق بولىڭدار. ادال ەڭبەك عانا ابىرويعا بولەيدى. باقۋاتتى تۇرمىسقا جەتكىزەدى. انالارىڭ ەكەۋمىز ادال ەڭبەك ەتتىك. مۇقتاج جاندارعا قولداۋىمىزدى كورسەتتىك. ءۇلكەندى قۇرمەتتەدىك, كىشىگە قولداۋ ءبىلدىردىك. مىنە, سونىڭ ارقاسىندا ءبۇگىنگى باقىتتى كۇنىمىزگە جەتتىك, – دەپ ارداگەر تەمىرجولشى كەڭەس قاريا ۇرپاعىنىڭ ورتاسىندا مەرەيلەنىپ وتىرادى.
ايمۇرزاەۆتار اۋلەتىنىڭ قۇرمانعازى اۋدانىنداعى قاراشاڭىراعىندا بالا كۇلكىسى تىيىلعان ەمەس. نەمەرەلەرىنىڭ بال قىلىعىن قىزىقتاۋدان شارشامايتىن ارداگەر تەمىرجولشىلاردىڭ داستارقانى دا ۇدايى جايۋلى تۇرادى. ويتكەنى, كەڭەس قاريا مەن ۇلبولسىن اجەنىڭ شەجىرەلى ەڭبەك جولىنان, تالىمىنەن ۇلگى العىسى كەلەتىن جاس تەمىرجولشىلار بۇل اۋلەتكە ءجيى كەلەدى. ولارعا ارداگەر تەمىرجولشىلار ونەگەلى ومىرلەرىنەن سىر شەرتىپ, اقىل-كەڭەسىن بەرۋدەن ەش جالىققان ەمەس.
ايتقانداي, بيىل ايمۇرزاەۆتار اۋلەتى «مەرەيلى وتباسى» ۇلتتىق كونكۋرسىنىڭ وبلىستىق كەزەڭىندە ءبىرىنشى جۇلدەگە يە بولدى. ەندى ولار ماقات اۋدانىندا تۇراتىن قاناتباەۆتار اۋلەتىمەن بىرگە رەسپۋبليكالىق كونكۋرسقا قاتىسۋعا ءازىرلەنۋدە.
جولداسبەك شوپەعۇل,
«ەگەمەن قازاقستان».
اتىراۋ وبلىسى.
