ۇنەمنەن ۇتارىمىز مول

ەنەرگيا ۇنەمدەۋ زاڭىنىڭ باستى تەتىگى مەملەكەتتىك ەنەرگەتيكالىق ءتىزىلىمنىڭ قىزمەت ەتۋىنە بايلانىستى. 2016 جىلدىڭ شىلدەسىنە دەيىن 3000-نان استام كاسىپورىن ەنەرگيا اۋديتىنەن ءوتۋى قاجەت. ونىڭ قورىتىندىسى بويىنشا وسى كاسىپورىنداردىڭ ەنەرگيا ۇنەمدەۋ جوسپارلارى, جابدىقتاردى, تەحنيكالىق پروتسەستەردى, عيماراتتاردى جاڭعىرتۋعا باعىتتالاتىن بولادى. بۇل جونىندە پرەزيدەنت جانىنداعى ورتالىق كوممۋنيكاتسيالار قىزمەتىندە وتكەن ءباسپاسوز-ءماسليحاتىندا يدم يندۋستريالىق دامۋ جانە ونەركاسىپتىك قاۋىپسىزدىك كوميتەتىنىڭ توراعاسى امانياز ەرجانوۆ مالىمدەدى. مەملەكەت باسشىسى 11 اقپانداعى ۇكىمەتتىڭ كەڭەيتىلگەن وتىرىسىندا قازىرگى ۋاقىتتا ەلگە جاڭا جاعدايعا بەيىمدەلۋ كەرەك بولاتىنىن, ول ءۇشىن ەكونوميكالىق جانە زاڭنامالىق سيپاتتاعى جەدەل شارالار قاجەت ەكەندىگىن اتاپ ايتتى. ەنەرگيا تيىمدىلىگى ساياساتىن ىسكە اسىرۋ قازىرگى تاڭدا ونەركاسىپ, تۇرعىن ءۇي-كوممۋنالدىق شارۋاشىلىعى جانە كولىك سەكتورىن جاڭعىرتۋدىڭ باستى قۇرالدارىنىڭ ءبىرى بولىپ تابىلادى, دەگەن كوميتەت توراعاسى ەنەرگيا ۇنەمدەۋ جانە ەنەرگيا تيىمدىلىگىن ارتتىرۋدىڭ تابىستى ساياساتى ەلدىڭ ەنەرگەتيكالىق جانە ەكولوگيالىق قاۋىپسىزدىگىن قامتاماسىز ەتەتىندىگىنە نازار اۋداردى. سونداي-اق, ونىڭ ايتۋىنشا, ەنەرگيا تيىمدىلىگىن ارتتىرۋدى قامتاماسىز ەتۋ جاڭا يننوۆاتسيالىق تەحنولوگيالار مەن شەشىمدەردى ەنگىزۋدى ىنتالاندىرادى. ال ول ءوز كەزەگىندە عىلىمنىڭ دامۋى مەن تەحنولوگيالار ترانسفەرتىنىڭ ءوزارا بەلسەندى ىقپالداسۋىنا جاعداي جاسايدى. سونىمەن قاتار, امانياز قاسىم ۇلى اتاپ وتكەندەي, ەلباسى ەنەرگيا ۇنەمدەۋ سالاسىندا جالپى ىشكى ءونىمنىڭ ەنەرگيا سىيىمدىلىعىن 2015 جىلعا قاراي كەمىندە 10 پايىزعا جانە 2020 جىلعا قاراي كەمىندە 25 پايىزعا تومەندەتۋ مىندەتتەرىن قويعاندىعىن تىلگە تيەك ەتتى. بۇل تۇرعىدا اتالعان تاپسىرما بويىنشا جۇمىستار باستالىپ كەتكەندىگىن ايتا وتىرىپ, ۇكىمەت ءبىراز جۇيەلى شارالار قابىلداپ, ەنەرگيا ۇنەمدەۋدىڭ نەگىزگى مەحانيزمدەرى جاسالعاندىعىن باسا ايتتى. وسىلايشا, ەنەرگيا ۇنەمدەۋ مەملەكەتتىڭ ستراتەگيالىق ءجا­نە جاڭا يندۋستريالاندىرۋ ساياسا­تىنىڭ مىندەتتەرىنە جاتادى, دەدى ا.ەرجانوۆ. وسىعان بايلانىس­تى قازىرگى تاڭدا قويىلعان ماق­ساتتارعا قول جەتكىزۋ ءۇشىن ماڭىزدى ءىس-شارالار ىسكە اسىرىلىپ جاتقاندىعىن جەتكىزگەن كوميتەت توراعاسى نورماتيۆتىك-قۇقىقتىق بازا قۇرۋدا ەنەرگيا ۇنەمدەۋ جانە ەنەرگيا تيىمدىلىگىن ارتتىرۋ تۋرالى زاڭنىڭ قابىلدانۋى ەنەرگيا تيىمدىلىگىن ارتتىرۋ ساياساتىن دامىتۋدا ماڭىزدى كەزەڭ بولىپ تابىلاتىندىعىنا توقتالدى. ونىڭ ايتۋىنشا, زاڭ شەڭبەرىندە ماڭىزدى نورماتيۆتىك-قۇقىقتىق اكتىلەرمەن نورماتيۆتىك-تەحنيكالىق قۇجاتتار قابىلدانۋدا. سونىڭ ىشىندە كولىك تەحنولوگيالارى, سونداي-اق, ۇيلەر, عيماراتتار مەن قۇرىلىس ماتەريالدارىنا ەنەرگيا ۇنەمدەۋ بويىنشا مىندەتتەر مەن تالاپتار قويىلعان. جانە مەملەكەتتىك ەنەرگيا ۇنەمدەۋ 2020 باعدارلاماسى اياسىندا وڭىرلىك جانە سالالىق ەنەرگيا ۇنەمدەۋ جوس­پارلارى ورىندالىپ جاتقاندىعىن ناقتىلاي وتىرىپ, ەنەرگيا ۇنەمدەۋ ساياساتىنىڭ باستى مىندەتتەرىنىڭ ءبىرى – ونى لايىقتى ناسيحاتتاۋدا جانە كادرلاردى دايىنداۋدا حالىقپەن تىعىز جۇمىس ىستەۋ بولىپ تابىلاتىندىعىن باسا ايتتى. كەلەسى كەزەكتە ءسوز العان تكش مەن ۇلتتىق قۇرىلىس پالاتاسى باسقارماسىنىڭ توراعاسى تولەۋتاي راقىمبەكوۆ ۇكىمەت تاراپىنان ەنەرگيا ۇنەمدەۋ 2020 باعدارلاماسى 2013 جىلى تامىزدا قابىلدانعاننان كەيىن, سول جىلدىڭ قاراشا ايىندا ينۆەستيتسيالار جانە دامۋ مينيسترلىگىمەن پالاتا اراسىندا مەموراندۋمعا قول قويىلعانىن, مەموراندۋمنىڭ باس­تى ماقساتى ەنەرگيا ۇنەمدەۋ جانە ەنەرگيا تيىمدىلىگىن ارتتىرۋ باعىتىنداعى مەملەكەتتىك ساياساتقا قوعامدىق قولداۋ كورسەتۋ ەكەنىن اتاپ كورسەتتى. ونىڭ ايتۋىنشا, اتالعان مەموراندۋمنىڭ ورىندالۋ اياسىندا ءبىراز شارالار ىسكە اسىرىلعان. قوعام اراسىندا ەنەرگيا ۇنەمدەۋ ساياساتىن ودان ءارى ناسيحاتتاۋ ماقساتىندا 2015 جىلى ناۋرىز ايىنان باستاپ «ەنەرگيا ءتيىمدى قازاقستان» رەسپۋبليكالىق اكتسياسى باستالاتىنىن حابارلادى. ەلميرا ماتىباەۆا, «ەگەمەن قازاقستان».