ەكى دۇركىن الەم چەمپيونى ارمان وسپانوۆ: «ماقساتىم – تۋعان وتانىمنىڭ نامىسىن قورعاۋ»

سوچي. پلاتفورما S-70. الەم كۋبوگى جولىنداعى حالىقارالىق تۋرنير. ءمار­تەبەلى قوناقتار وتىراتىن لوجادا رەسەي پرەزيدەنتى ۆ.پۋتين, رەسەي پرەمەر-مينيس­ترى ۆ.مەدۆەدەۆپەن بىرگە قازاقستان رەسپۋبليكاسىنىڭ پرەزيدەنتى نۇرسۇلتان ءابىش ۇلى نازارباەۆ وتىر. فينال. شارشى الاڭعا ارمان وسپانوۆ شاقىرىلدى. جان الىپ, جان بەرگەن ايقاستىڭ ءبىر ساتىندە قارسىلاسى وڭتايعا كەلىپ قالدى. ارمان سول قولمەن تالماۋ تۇستان ۇراتىنداي ىڭعاي كورسەتكەن. قارسىلاسى قولىن توسەپ ۇلگەردى. الدامشى قيمىل كورسەتكەن ارمان سول قولمەن ەمەس, وڭ قولىمەن جا­عىنان وپىرا ۇردى. شاتقاياقتاپ بارىپ قۇلاعان قارسىلاسىنىڭ ۇستىنە ءتۇز تاعىسى سياقتى قونا كەتكەن قازاق جىگىتى تۇرعىزعان جوق. سويداۋىلداي قولدارىمەن باس, شىقشىتتى كوزدەپ سوققىعا كومىپ تاستادى. تورەشى ۇشىپ كەلىپ ورتاعا ءتۇستى. تەحني­كالىق نوكاۋت! رەفەري قولىن كوتەرىپ جاتقاندا كوزىنىڭ استىمەن ەلباسىنا ۇرلانىپ قاراعان. نۇرەكەڭ رازى بولىپ, نۇرلانىپ وتىر ەكەن. جەڭىمپازداردى ماراپاتتاعاندا ارمانعا كۋبوكتى ۆلاديمير پۋتين تاپسىردى. رەسەي پرەزيدەنتىنىڭ الدىندا كىشىلىك ساقتاپ, قول بەرمەك ەدى, پۋتين قاپسىرا قۇشاقتاپ كەۋدەسىنە باستى. «جارايسىڭ!» دەدى. اسكەري سامبودان ەكى دۇركىن الەم چەمپيونى, جاۋىنگەرلىك جەكپە-جەك, پانكراتيون, ەرەجەسىز جەكپە-جەكتەردەن حالىقارالىق ءتۋرنيردىڭ جەڭىمپازى, «الاش پرايدتىڭ» وعلانى ارمان وسپانوۆ كوپتەن بەرى ءبىر جاعىمسىز وقيعانىڭ ورتاسىندا قالدى. اۋەلى ءبىر تاۋەلسىز تەلەارنا «الەم چەمپيونى ارمان وسپانوۆتىڭ تۇرمىس جاعدايى ءماز ەمەس. قازاقستاننان كەتكەلى جاتىر. وتانىن اۋىستىرماقشى» دەپ ءسۇيىنشى سۇراعانداي لاق ەتكىزگەن. ودان ءارى قاراي ەلەكتروندى سايتتار, سارجاعال گازەتتەر نۋ قامىسقا ءورت قويعانداي اسىعىستىقپەن وسى حاباردى جارىسا جازىپ, الەۋمەتتىك جەلىدە تالقىعا سالىپ جىبەردى. بىرەۋ وتانىن «ساتقانى», جەڭىل اقشاعا قىزىققانى ءۇشىن وسپانوۆتى جەردەن الىپ جەرگە سالىپ كۇستانالادى, بىرەۋ «ونىسى دۇرىس, ەڭبەگىڭدى باعالاماعان ەلدە نە قىلاسىڭ, جولىڭ بولسىن» دەپ باتا بەرگەنسىدى. ارماندى تاۋىپ الدىق. قايىن اتاسى, سارىاعاش اۋداندىق ارداگەرلەر كەڭەسىنىڭ توراعاسى مۇستافا سۇلەيمەنوۆ – ەل ءسوزىن ۇستا­عان كوشەلى كىسى. «ارمانمەن سويلەستىم, مىناۋ جالا عوي» دەپ كۇيىنگەن. ارمان ايتتى. الماتىدا سامبودان وتەتىن الەم كۋبوگى جارىسىنا دايىندالىپ جاتقاندا جاتتىعۋعا وبلىستاعى تاۋەلسىز ارنانىڭ جاس ءتىلشىسى سۇحبات الۋعا كەلىپتى. انانى, مىنانى سۇرادى, سوڭىندا ۇيگە بارىپ وتباسى جاعدايىندا حابار جاساعىسى كەلگەندىگىن ايتتى. مەن ءوزىم جەكە ءومىرىمدى قازبالاپ سۇراعانىن قالامايمىن, بىراق قىز بالا بولعاننان كەيىن كەلىسىمىمدى بەردىم. اۋەلدە ءبارى دۇرىس بولدى. تىلشىلەردىڭ ءار جارىستا قويىپ جۇرگەن ساۋالدارىن قويدى. جاۋاپ بەردىم. وتباسىمىزدىڭ جاعدايىن سۇرادى. جاسپىز, جەكە ءۇيىمىز جوق, ءپا­تەر جالداپ تۇراتىنىمىز راس. سام­­بو وليمپيادا باعدار­لا­ما­­­سىنا كىرمەگەندىكتەن, ايلىق جالا­قىمىزدىڭ باسقا تارتسا اياق­قا, اياققا تارتسا باسقا جەتپەي جاتا­تىندىعى راس. ونى دا سۇراپ ءبىلدى. بىراق, ءتىلشىنىڭ وندا نەگە بوكسقا اۋىسپادىڭىز, وندا اقشا كوپ قوي دەگەن ساۋالى ويعا قالدىرعان. سپورتتى بىلمەيتىندەردىڭ, كۇرەس پەن بوكستىڭ اراسى اسپان مەن جەردەي ەكەنىن تۇسىنبەيتىن جاننىڭ ساۋاتسىز سۇراعى تاڭ قالدىرعانىمەن, جاۋاپ بەردىم. الداعى جوسپارلارىمدى سۇرادى. شەتەلدەردە گەننادي گولوۆ­كين سياقتى قازاقستان بايراعىن كوتەرىپ تۋعان وتانىمنىڭ نامىسىن قورعاۋ ماقساتىم ەكەندىگىن ايتتىم. بار بولعانى وسى. جاس ءتىلشى ارمان وسپانوۆ تاعدىرىنا رازى ەمەس, جاعدايى ناشار, سوندىقتان شاقىرتۋ العان مەملەكەتتەردىڭ ءبىرىنىڭ اتىنان الەمدىك دودالارعا تۇسەتىندىگىن اتتانداپ ايتىپ جىبەرىپتى. الەۋمەتتىك جەلىلەر گۋ ەتە قالدى. تاڭ قالعانىم, ەشقايسىسى مەنىمەن سويلەسپەسە دە, كورمەسە دە بىرىنەن ءبىرى اسىرىپ ويبايلاپ جاتىر. دوستارىم, تانىستارىم «مۇنىڭ نە؟» دەيدى. مۇندايدا نە ايتاسىڭ؟ الگى جاس ءتىلشىنى تاۋىپ الدىم. جىلاپ-ەڭىرەپ كەشىرىم سۇرادى. تۇسىنبەي قالعانىن ايتتى. تە­رىستەمە بەردى. بىراق, تۇتانعان ءورت­تى ءسوندىرۋ قيىن ەكەن. قاتتى نامىستاندىم. الماتىدا جاۋىن­گەرلىك سامبودان وتكەن الەم كۋبوگىندا بەس قارسىلاسىمدى دا ايقىن باسىمدىلىقپەن جەڭىپ, قا­زاقستاننىڭ ءانۇرانىن وينات­قانىمدا, قازاق بايراعىن جامىلىپ تۇرعانىمدا دا مەنى وتانىمدا ۋاقىتشا جۇرگەندەي سەزىنگەن جاندار بولدى. اڭداۋسىز ايتىلعان ءسوز ارىما كۇيە جاقتى. اعا, باس-پايداسى ءۇشىن وتانىم­دى  اۋىس­تىراتىن قۋىسكەۋدە مەن ەمەسپىن. جاقسى اكە-شەشەنىڭ تالىمىندە بولدىم, ءوز ۇلتىمدى, ەلباسىمدى جاقسى كورەتىن پاتريوت ازاماتتاردىڭ ءبىرىمىن. نەگە مەن وتانىمنان كەتۋىم كەرەك؟! ەكى دۇركىن الەم چەمپيونى وسىلاي دەپ تاۋسىلعان. سپورتتىق ءومىربايانىنا كەلسەك وڭتۇستىك قازاقستان وبلىسى, تولە بي اۋدانىنان ۇشقان تاستۇلەكتىڭ جەڭىستەرى كوڭىل مارقايتادى. تولە بي اۋدانىندا جانپەيىس جاباەۆ اتتى ۇستاز باپكەر بار. «نۇرجان سەرى» ستاديونىندا قازاقشا كۇرەس, سامبو, دزيۋدو كۇرەس تۇرلەرىنەن جۇزدەگەن ايتۋلى بالۋان دايىنداعان باپكەر. كىشكەنتاي كوگەنكوزدەردى جيناپ الىپ, ۇلى سپورتشىلار تۋرالى ايتقاندا ەندى كۇرەس كىلەمىنە تۇسكەن وقۋشى ارمان وسپانوۆ ارمانداپ وتىرار ەكەن. «شىركىن-اي, مەنىڭ دە باعىم جانىپ, تىم بولماسا قازاقستاننىڭ چەمپيو­نى اتانسام عوي» دەپ. سول ارمان وسپانوۆ – باياعى قاجىمۇقان اتاسى جاپون سا­راكيكيمەن ءولىم مەن ءومىر ايقاسىنا تۇسكەن دجيۋ-دجيتسۋ كۇرەسىنەن ەكى دۇركىن ازيا چەمپيونى, جاۋ­ىنگەرلىك جەكپە-جەك سامبودان ەكى دۇركىن الەم چەمپيونى. «الاش پرايد KZ» جاۋىنگەرلىك كلۋبىنىڭ بەلدى مۇشەسى « ۇلى مايدان –  ۆەليكايا بيتۆا» تۋرنيرىندە توپ جاردى, رەسەيدىڭ سوچي قالاسىندا قازاقستان, رەسەي پرەزيدەنتتەرى قاتىسقان «پلاتفورما S-70» تۋر­نيرىندە بەس جەكپە-جەك وتكىزىپ, فينالدىق ايقاستا رەسەيلىك الەكسەي پولپۋدنيكوۆتى نوكاۋتقا جىبەرىپ, ۆلاديمير ءپۋتيننىڭ قولىنان كۋ­بوكتى الدى. تالاي الەم چەمپيونى باستاعان مىقتىلاردان باسىم ءتۇسىپ, جەڭىمپاز اتاندى. «نۇر وتان» پارتياسى اياسىندا «سۇڭقار» جوباسىمەن تاربيەسى قيىن بالالاردى توپتاپ, ۇلكەن سپورتقا باۋلىپ ءجۇر. سويتكەن, باتىر جىگىت جازىقسىز جالادان جالپى كۇيزەلىپ ءجۇر. جاسىما دەدىم. تۋعان وتانىن بايلىققا ساتاتىن پەندە ول ەمەس. ول سولاي ايتتى. ءبىز جەتكىزدىك. جەڭىستى جورىقتارى كوپ بولعاي. باقتيار تايجان, «ەگەمەن قازاقستان». شىمكەنت.