• 03 ناۋرىز, 2015

اقپاراتتار اعىنى

222 رەت

كورسەتىلدى

2 مين

وقۋ ءۇشىن

Egemen Qazaqstan

*ەلىمىزدە اۋىل شارۋاشىلىعىنا باعىتتالعان سۋبسيديا 68 پايىزعا وسكەن. پارلامەنت سەناتىنىڭ دەپۋتاتى قۋانىش ايتاحانوۆتىڭ ايتۋىنشا, بىلتىر اۋىل شارۋاشىلىعى ونىمدەرىنىڭ جالپى كولەمى 2,5 ترلن. تەڭگەنى قۇراعان. بۇل – وتكەن جىلعى دەڭگەيدەن 0,8 پايىزعا ارتىق. *ۇوس ارداگەرلەرى ەلىمىزدىڭ ەڭ ۇزدىك كلينيكالارىندا ەمدەلەدى. دەنساۋلىق ساقتاۋ جانە الەۋمەتتىك دامۋ مينيسترلىگىنىڭ ءمالىمەتىنشە, بيىل ۇوس-تىڭ بارلىق ارداگەرلەرى مەن قاتىسۋشىلارىنا مەديتسينالىق جانە وڭالتۋ كومەكتەرى ۇلتتىق عىلىمي ورتالىقتاردا, عىلىمي-زەرتتەۋ ينستيتۋتتارىندا, ۆەدومستۆوعا قاراستى ۇيىمداردا كورسەتىلمەك. *استانادا 5 ملرد. تەڭگەدەن استام سومانىڭ مۇلكى زاڭداستىرىلدى. ايتا كەتەيىك, قالاداعى ءاربىر اۋدان اكىمدىكتەرىنىڭ جانىنان قۇجات قابىلداۋ بولىمدەرى قۇرىلعان. وسى كۇنگە دەيىن ولارعا 10 مىڭنان استام ءوتىنىش كەلىپ تۇسكەن. ال كوميسسيالار جىلجىمايتىن م ۇلىكتى زاڭداستىرۋ بويىنشا نىسانداردىڭ جالپى قۇنى 16 ملرد. 195 ملن. تەڭگە بولاتىن 1 474 ءوتىنىشتى تىركەۋگە العان. *تالدىقورعاندا 195 جاس وتباسىنا پاتەر كىلتى تاپسىرىلدى. كىلت تابىستاۋ راسىمىنە الماتى وبلىسىنىڭ اكىمى اماندىق باتالوۆ قاتىستى. قۇرىلىسى 2012 جىلدىڭ قاراشاسىندا مەملەكەتتىك باعدارلاما اياسىندا باستالعان تۇرعىن ۇيدەگى 195 پاتەردىڭ 66-سى – ءبىر بولمەلى, 106-سى – ەكى بولمەلى, 23-ءى ءۇش بولمەلى پاتەر. *شىمكەنتتەگى «Oxy Textile» ءجىپ ءيىرۋ فابريكاسىنىڭ جۇمىسى جانداندى. وڭتۇستىك قازاقستان وبلىستىق اكىمدىگىنىڭ ءباسپاسوز قىزمەتى حابارلاعانداي, «وڭتۇستىك» ارنايى ەكونوميكالىق ايماعىندا» ورنالاسقان كاسىپورىندا بۇگىندە 90-نان استام ادام جۇمىس ىستەيدى. ءوندىرىس تولىق قۋاتتىلىققا شىققاندا, 270 ادامدى جۇمىسپەن قامتۋ جوسپارلانۋدا. فابريكا شيكىزاتتى Baiterek Venture Fund اق تاراپىنان بولىنگەن 907,5 ملن. تەڭگەگە الىپ وتىر. *باتىس قازاقستاندا سۋ تاسقىنىنىڭ الدىن الۋعا 200 ملن.-داي تەڭگە ءبولىندى. وبلىستىق توتەنشە جاعدايلار دەپارتامەنتى باستىعىنىڭ ورىنباسارى ومار بەرجانوۆتىڭ سوزىنە قاراعاندا, جىل باسىنان بەرى قالا مەن اۋداندارداعى سۋ كوزدەرى باقىلاۋعا الىنىپ, زەرتتەلگەن. قازىرگى تاڭدا ەلدى مەكەندەردە قار شىعارۋ, ارىق تازارتۋ جۇمىستارى جۇرگىزىلۋدە. *اقتوبەدە كوپبالالى انالار ماراپاتتالدى. پرەزيدەنت جارلىعىنا سايكەس اقتوبە قالاسى بويىنشا 8 كوپبالالى انا «التىن القا» جانە «كۇمىس القا» يەگەرى اتاندى. قازىرگى تاڭدا اقتوبە قالاسىندا بارلىعى 5 971 كوپبالالى انا تۇرادى. حابارلار ۇكىمەت, وبلىستىق اكىمدىكتەر سايتتارى, «قازاقپارات» اگەنتتىگى مەن «24kz» تەلەارناسىنىڭ دەرەكتەرى بويىنشا دايىندالدى.