پارلامەنت ءماجىلىسىنىڭ ەكولوگيا ماسەلەلەرى جانە تابيعات پايدالانۋ كوميتەتى, استاناداعى ەقىۇ باعدارلامالار كەڭسەسىنىڭ قولداۋىمەن, ەلىمىزدىڭ ەنەرگەتيكا مينيسترلىگى جانە «جاسىل اكادەميا» عىلىمي-ءبىلىم بەرۋ ورتالىعىمەن بىرلەسە وتىرىپ, «جاسىل» ەكونوميكاعا ءوتۋ كەزىندەگى زاڭناما اياسىن جەتىلدىرۋ: قالدىقتاردى باسقارۋ مەن شىعارىندىلاردى رەتتەۋ» تاقىرىبىندا دوڭگەلەك ۇستەل ۇيىمداستىردى.
وتىرىسقا توراعالىق ەتكەن الەكساندر ميليۋتين: «ەلباسى نۇرسۇلتان نازارباەۆ وسى شاقىرىلىمداعى پارلامەنتتىڭ ەكىنشى سەسسياسىن اشۋ كەزىندە «جاسىل ەكونوميكاعا» ءوتۋ, جاڭارتىلاتىن ەنەرگەتيكاعا نەگىزدەلگەن ەكولوگيالىق تازا تەحنولوگيالارعا قۇقىقتىق نەگىزدەمە جاساۋ زاڭ شىعارۋ جۇمىسىنىڭ ماڭىزدى ولشەمدەرىنىڭ ءبىرى ەكەنىن اتاپ وتكەن بولاتىن», – دەي كەلىپ, ءوزى باسشىلىق ەتىپ وتىرعان كوميتەتتىڭ پارنيكتىك گازداردىڭ شىعارىندىلارىن قىسقارتۋ جانە ولاردى باقىلاۋ جولىندا كەشەندى جۇمىستار اتقارىپ كەلە جاتقانىن العا تارتتى. 2013 جىلدىڭ قاڭتار ايىنان باستاپ قازاقستاندا زاڭدى تۇردە پارنيكتىك گازدار شىعارىندىلارىن ساۋدالاۋ مەن كۆوتالاۋ جۇيەسى ەنگىزىلدى.
قازىرگى ۋاقىتتا ءبىر بولىگىندە پارنيكتىك گازدار قالدىقتارىن رەتتەۋگە قاتىستى وزگەرىستەردى كوزدەيتىن «قازاقستان رەسپۋبليكاسىنىڭ كەيبىر زاڭنامالىق اكتىلەرىنە ەكولوگيا ماسەلەلەرى بويىنشا وزگەرىستەر مەن تولىقتىرۋلار ەنگىزۋ تۋرالى», سونداي-اق, «جاسىل ەكونوميكا» ماسەلەلەرى بويىنشا وزگەرىستەرگە قاتىستى زاڭ جوبالارى كوميتەت قاراۋىنا بەرىلدى. وسى قۇجاتتاردى قابىلداۋ قازاقستاننىڭ «جاسىل» ەكونوميكاعا كوشۋىنىڭ تاعى ءبىر كەزەڭى بولارى ءسوزسىز.
وسى جولدا شەشۋدى قاجەت ەتەتىن وزەكتى ماسەلەلەرگە نازار اۋدارعان ا.ميليۋتين پروبلەمالىق جايتتاردى دا اتاپ ءوتتى.
ودان ءارى ەنەرگەتيكا ءمينيسترى ۆلاديمير شكولنيك پەن استانا قالاسىنداعى ەقىۇ كەڭسەسىنىڭ باسشىسى ناتاليا زارۋدنا جانە «جاسىل اكادەميا» عبو ديرەكتورى باقىت ەسەكينا ءسوز ءسويلەپ, جوعارى ەكونوميكا مەكتەبىنىڭ قورشاعان ورتا جانە تابيعي رەسۋرستار ەكونوميكاسى ورتالىعىنىڭ ديرەكتورى گەورگي سافونوۆ, بۇۇدب جوباسىنىڭ مەنەدجەرى, ISWA قالدىقتار بويىنشا حالىقارالىق قاۋىمداستىعىنىڭ ءمۇشەسى نينا گور بايانداما جاسادى.
تالقىلاۋ قورىتىندىسى بويىنشا ەلىمىزدە قالدىقتاردى باسقارۋ مەن پارنيكتىك گازدار شىعارىندىلارىن رەتتەۋ سالاسىنداعى زاڭنامانى جەتىلدىرۋ جونىندە ۇسىنىمدار ازىرلەندى. اتاپ ايتقاندا, 2020 جىلعا قاراي شىعارىندىلاردى ازايتۋ بويىنشا ءىس-قيمىلدار جوسپارىن ازىرلەۋ ۇسىنىلدى, دەپ حابارلادى ءماجىلىستىڭ ءباسپاسوز قىزمەتى.
