قۇجات بويىنشا قارجى مينيسترى باقىت سۇلتانوۆ پەن ەسەپ كوميتەتىنىڭ مۇشەسى جانسەيىت سارسەنقۇلوۆ بايانداما جاسادى.
رەسپۋبليكالىق بيۋدجەتكە 2014 جىلدا 5 988,5 ملرد.تەڭگە, ياعني جوسپارلانعاننىڭ 99,4%-ى تۇسكەن. نەگىزگى بولىك نەمەسە تۇسىمدەردىڭ جالپى كولەمىندە 98,7% كىرىستەرگە تۋرا كەلدى, ول 5 908,8 ملرد. تەڭگەنى قۇرادى (جوسپاردىڭ 99,3%-ى), ونىڭ ىشىندە سالىقتىق تۇسىمدەر 3 666,1 ملرد. تەڭگە نەمەسە 98,2%, سالىقتىق ەمەس تۇسىمدەر – 131,7 ملرد.تەڭگە نەمەسە 110,4%, نەگىزگى كاپيتالدى ساتۋدان تۇسەتىن ءتۇسىمدەر – 7,7 ملرد.تەڭگە نەمەسە 99,1% جانە ترانسفەرتتەر 2 103,3 ملرد.تەڭگە نەمەسە 100,5% قۇرادى.
ۇلتتىق قوردىڭ اكتيۆتەرى 2014 جىلى 5 459,6 ملرد.تەڭگەگە تولىقتىرىلدى جانە 2015 جىلعى 1 قاڭتاردا 16 522,1 ملرد. تەڭگەنى قۇرادى, ونىڭ ىشىندە ينۆەستيتسيالىق كىرىس 1 955,0 ملرد. تەڭگە سوماسىندا بولدى. نەگىزگى ۇلەستى (63,5 %) مۇناي سەكتورىنان تۇسەتىن تىكەلەي سالىقتار قۇرادى.
2014 جىلعى رەسپۋبليكالىق بيۋدجەتتىڭ شىعىستارى 99,3% نەمەسە 7 069,7 ملرد. تەڭگە سوماسىندا اتقارىلدى. 2013 جىلمەن سالىستىرعاندا شىعىستار 1 079,2 ملرد. تەڭگەگە وسكەن.
شىعىستار سالاسىندا بيۋدجەت ساياساتىنىڭ باسىمدىعى الەۋمەتتىك مىندەتتەمەلەردى ءبىرىنشى كەزەكتە قارجىلاندىرۋ بولدى. 2014 جىلعا ارنالعان رەسپۋبليكالىق بيۋدجەتتە كوزدەلگەن زەينەتاقىلاردى, الەۋمەتتىك جاردەماقىلار مەن بيۋدجەتتىك سالا قىزمەتكەرلەرىنە جالاقى تولەۋ ۋاقتىلى جانە تولىق كولەمدە جۇزەگە اسىرىلدى.
الەۋمەتتىك سالاعا ارنالعان شىعىستار 2 680,2 ملرد.تەڭگەنى قۇرادى. 2014 جىلى ولاردىڭ كولەمى ىشكى جالپى ونىمگە شاققاندا 6,9%-عا جەتتى, ول تۇراقتى الەۋمەتتىك كليماتتىڭ ساقتالۋىنا ىقپال ەتەدى.
بۇل رەتتە, 2014 جىلى ءبىلىم بەرۋگە – 466,3 ملرد. تەڭگە, دەنساۋلىق ساقتاۋعا – 645,3 ملرد. تەڭگە, الەۋمەتتىك كومەككە – 1 462,3 ملرد. تەڭگە, مادەنيەتكە, سپورتقا, تۋريزم مەن اقپاراتتىق كەڭىستىككە 106,3 ملرد. تەڭگە جۇمسالدى.
الەۋمەتتىك شىعىستارمەن قاتار, بيۋدجەت شىعىندارىنىڭ جوعارى دەڭگەيى ينفراقۇرىلىمدىق جانە يندۋستريالىق جوبالارعا, اۋىل شارۋاشىلىعىن دامىتۋعا بايلانىستى بولىپ وتىر. ماسەلەن, تۇرعىن ءۇي-كوممۋنالدىق شارۋاشىلىعىنا – 316,5 ملرد.تەڭگە, وتىن-ەنەرگەتيكا كەشەنى مەن جەر قويناۋىن پايدالانۋعا – 95,0 ملرد.تەڭگە, اۋىل, سۋ, ورمان, بالىق شارۋاشىلىعىنا جانە قورشاعان ورتانى قورعاۋعا – 233,8 ملرد.تەڭگە, ونەركاسىپ, ساۋلەت, قالا قۇرىلىسى جانە قۇرىلىس قىزمەتىنە – 22,3 ملرد.تەڭگە, كولىك جانە كوممۋنيكاتسياعا 493,6 ملرد.تەڭگە جۇمسالدى.
رەسپۋبليكالىق بيۋدجەت تاپشىلىعى 1 081,2 ملرد.تەڭگەنى قۇرادى.
بايانداماشىلارعا ءماجىلىس دەپۋتاتتارى ن.سابيليانوۆ, ز.باليەۆا, ە.نيكيتينسكايا, ر.حالمۇرادوۆ, ش.مىرزاحمەتوۆ, گ.ءيسىمباەۆا, س.رومانوۆسكايا جانە ءا.بيمەندينا سۇراق قويدى. ال زاڭ جوباسى بويىنشا جۇمىس توبانىڭ جەتەكشىسى قۇتتىقوجا ىدىرىسوۆ وتىرىستى قورىتىپ, الدا بولاتىن جۇمىس توبى وتىرىسىنىڭ ۋاقىتىن حابارلادى.
