جارقىن جەڭىسىمەن قۇتتىقتادى

قازاقستان پرەزيدەنتى نۇرسۇلتان نازارباەۆتىڭ اتىنا مەملەكەت, ۇكىمەت باسشىلارىنان, حالىقارالىق ۇيىمداردىڭ جەتەكشىلەرىنەن سايلاۋداعى جەڭىسىنە بايلانىس­تى قۇتتىقتاۋلار ءالى دە كەلىپ جاتىر

وڭتۇستىك افريكا رەسپۋبليكاسىنىڭ پرەزيدەنتى دجەيكوب زۋ­ما­دان نۇرسۇلتان نازارباەۆتى قازاقستان رەسپۋبليكاسىنىڭ پرە­زي­دەنتى بولىپ سايلانۋىنا بايلانىستى قۇتتىقتاعان جەدەلحات كەلدى, دەپ حابارلادى قازاقستان پرەزيدەنتىنىڭ ءباسپاسوز قىزمەتى. د.زۋما وڭتۇستىك افريكا ۇكىمەتى مەن حالقىنىڭ اتىنان شىنايى قۇتتىقتاۋىن جولدادى. «ەلدەرىمىز بەن حالىقتارىمىزدىڭ اراسىنداعى ورنىققان قارىم-قاتىناستارعا قاناعاتتاناتىنىمدى ايتقىم كەلەدى. ءبىزدىڭ ۇزاق مەرزىمدى قارىم-قاتىناسىمىز ءسىزدىڭ بىلىكتى باسشىلىعىڭىزبەن بۇدان ءارى دامىپ, وركەندەي بەرەتىنىنە سەنىمدىمىن», – دەلىنگەن جەدەلحاتتا. ەلباسى نۇرسۇلتان نازارباەۆتىڭ اتىنا برازيليا فەدەراتيۆتىك رەس­پۋب­ليكاسىنىڭ پرەزيدەنتى ديلما رۋ­­سەفتەن قۇتتىقتاۋ جەدەلحاتى كەلدى, دەپ حابارلادى قازاقستان پرەزيدەنتىنىڭ باس­پاسوز قىزمەتى. د.رۋسەف قۇتتىقتاۋىن بۇكىل برازيليا حالقىنىڭ جانە جەكە ءوزىنىڭ اتىنان جولداعان. «ەكىجاقتى ىنتىماقتاستىعىمىزدى نىعايتۋ جانە قازاقستان مەن برازيليا ارا­سىنداعى ىنتىماقتاستىقتىڭ جاڭا ءمۇم­كىندىكتەرىن ىزدەستىرۋ ءۇشىن مەن سىزبەن جۇ­مىسىمىزدى جالعاستىرۋدى قالايتىنىمدى تاعى دا اتاپ وتكىم كەلەدى», – دەلىنگەن قۇتتىقتاۋدا. * * * ەلباسى نۇرسۇلتان نازارباەۆتىڭ اتىنا جاڭا زەلانديا پرەمەر-مي­نيسترى دجون كيدەن قۇتتىقتاۋ جەدەلحاتى كەلدى, دەپ حابارلادى پرەزيدەنتتىڭ باس­پاسوز قىزمەتى. د.كي قازاقستان مەن جاڭا زەلانديا الەمدىك قوعامداستىقتىڭ بەلسەندى مۇشەلەرى ەكەنىن اتاپ وتكەن. «ءبىزدىڭ كوپتەگەن سالاعا, سونىڭ ىشىندە يادرولىق قارۋسىزدانۋعا, جاڭعىرتىلاتىن ەنەرگياعا, سونداي-اق, كليماتتىق وزگەرىستەر ىقپالىنا قاتىستى ورتاق مۇددەلەرىمىز بار», – دەلىنگەن حاتتا. جاڭا زەلانديا پرەمەر-ءمينيسترى نۇر­سۇلتان نازارباەۆتىڭ پرەزيدەنتتىك لاۋا­زىمىنا, سونىمەن قاتار, قازاقستانعا بۇۇ قاۋىپ­سىزدىك كەڭەسىنىڭ 2017-2018 جىلدارداعى تۇ­راقتى ەمەس مۇشەلىگىنە سايلانۋىنا قاتىستى ناۋقانعا وراي تابىس تىلەدى. مەملەكەت باسشىسى نۇرسۇلتان نازارباەۆتىڭ اتىنا الەمنىڭ ءتۇرلى ەلدەرىنىڭ بەلدى ساياساتكەرلەرىنەن, حا­لىقارالىق ۇيىمدار باسشىلارىنان, كومپانيالار مەن ۇيىمداردىڭ, قو­عامدىق بىرلەستىكتەردىڭ جەتەك­شى­لەرىنەن, سونداي-اق, ەلىمىزدىڭ ازاماتتارى­نان قۇتتىقتاۋلار كەلىپ ءتۇستى, دەپ حابارلادى پرەزيدەنتتىڭ باسپا­سوز قىزمەتى. اتاپ ايتقاندا, سيريا اراب رەسپۋب­لي­كاسىنىڭ پرەزيدەنتى باشار ءال-اساد نۇرسۇلتان نازارباەۆتى پرەزيدەنتتىك ساي­لاۋداعى جەڭىسىمەن سيريا حالقىنىڭ جانە جەكە ءوزىنىڭ اتىنان قۇتتىقتادى. «قازاقستان حالقىنىڭ ءسىزدى پرەزيدەنت رەتىندە سايلاۋداعى تاڭداۋى – تۇراقتىلىق, دامۋ جانە تۇتاستىق باعدارىنىڭ جالعاسۋىنىڭ كورسەتكىشى, سونداي-اق بۇكىل ەلدىڭ سىزگە دەگەن سەنىمىنىڭ ايعاعى, بۇل حالىقتىڭ بىرلىگىن كورسەتەدى», – دەلىنگەن قۇتتىقتاۋدا. بۋتان كورولدىگىنىڭ پرەمەر-ءمينيسترى تشەرينگ توگبەي ەل حالقىنىڭ جانە جەكە ءوزىنىڭ اتىنان نۇرسۇلتان نازارباەۆتى قازاقستان پرەزيدەنتى لاۋازىمىنا قايتا سايلانۋىمەن قۇتتىقتادى. «ءسىزدىڭ جەڭىسىڭىز سوڭعى جيىرما جىلدا قويىلعان مىندەتتەرگە ۋاقىتىندا قول جەتكىزىلگەندىگىنىڭ ايعاعى, سونداي-اق حالىق تاراپىنان ءسىزدىڭ كوشباسشىلىعىڭىزعا دەگەن سەنىم مەن قولداۋدىڭ كورسەتكىشى», – دەلىنگەن قۇتتىقتاۋدا. ت.توگبەي نۇرسۇلتان نازارباەۆقا سار­قىل­ماس قۋات, ال قازاقستان حالقىنا بۇدان ءارى دامۋىنا جانە وركەندەۋىنە تىلەكتەستىك ءبىلدىردى. بۇۇ ازىق-ت ۇلىك جانە اۋىل شارۋاشىلىعى ۇيىمىنىڭ باس ديرەكتورى جوزە گراتسيانو دا سيلۆا ءوزى باسقاراتىن قۇرىلىم مەن جەكە ءوزىنىڭ اتىنان نۇرسۇلتان نازارباەۆتى مەملەكەتتىڭ جوعارى لاۋازىمىنا قايتا سايلانۋىمەن قۇتتىقتاپ, مىقتى دەنساۋلىق جانە ماڭىزدى قىزمەتىنە تابىس, ال قازاقستان حالقىنا باق-بەرەكە تىلەدى. «جىبەك جولىنىڭ بەيبىتشىلىك سىيلىعى» قورىنىڭ وكىلدەرى نۇرسۇلتان نازارباەۆتىڭ باسشىلىعىمەن قازاقستان الەۋمەتتىك-ەكونوميكالىق دامۋدا تابىسقا جەتكەنىن, سونىسىمەن بۇكىل الەم نازارىن اۋدارعانىن اتاپ وتكەن. «نۇرسۇلتان نازارباەۆ بۇكىل الەمدە مويىندالعان كورنەكتى مەملەكەت باسشىسى بولىپ تابىلادى. ونىڭ ازياداعى ءوزارا ءىس-قيمىل جانە سەنىم شارالارى جونىندەگى كەڭەستى جانە شانحاي ىنتىماقتاستىق ۇيىمىن قۇرۋ جونىندەگى باستامالارى ءتيىستى ەلدەر اراسىنداعى ديالوگ پەن كونسۋلتاتسيالارعا, ءوزارا سەنىمدى نىعايتۋعا, وڭىردەگى بەيبىتشىلىك پەن تۇراقتىلىقتى ساقتاۋعا قوسىلعان قوماقتى ۇلەس بولىپ سانالادى. قازاقستان نۇرسۇلتان نازارباەۆتىڭ باسشىلىعىمەن ەشقانداي كۇمانسىز بۇدان دا زور تابىستارعا جەتەتىنىنە سەنىمدىمىز», – دەپ جازادى اۆتورلار. اقش سولتۇستىك داكوتا شتاتىنىڭ گۋبەرناتورى د.دەلريمپل قازاقستانمەن ىنتىماقتاستىقتىڭ كوپتەگەن ورتاق باعىتتارى بار ەكەنىنە توقتالىپ, سونىڭ ىشىندە اۋىل شارۋاشىلىعى سالاسىن ايرىقشا اتاعان. د.دەلريمپل, سونداي-اق, نۇرسۇلتان نازارباەۆقا ىزگى تىلەگىن جولداي وتىرىپ, قازاقستان مەن سولتۇستىك داكوتا اراسىنداعى ساۋدا مۇمكىندىكتەرى ءارى قاراي دامي بەرەرىنەن ءۇمىتتى ەكەنىن بىلدىرگەن. اقش سەناتورى د.حوۆەن ءوزارا ىقپالداستىق قارقىنى ارتىپ كەلە جاتقانىنا نازار اۋدارعان. «ەلدەرىمىزدىڭ اراسىندا اۋىل شارۋا­شى­لىعى سالاسىنداعى ساۋدا قاتىناستارىنا دەمەۋ جاساۋ وتە ماڭىزدى, سوعان وراي ءسىزدىڭ قايتا سايلانۋىڭىزعا بايلانىستى مەن جەمىستى ىنتىماقتاستىق جۇمىستارىن بۇدان ءارى جال­عاس­تىرۋدى تاعاتسىزدانا كۇتەمىن», – دەلىنگەن حاتتا. ۇلىبريتانيا پارلامەنتى لوردتار پا­لا­تاسىنىڭ مۇشەسى م.دوببس نۇرسۇلتان نا­زارباەۆتىڭ پرەزيدەنتتىك سايلاۋداعى جەڭىسى بۇدان ءارى دە قازاقستان حالقىنىڭ باقۋاتتى ءومىرىن قامتاماسىز ەتىپ, ەلىمىزدىڭ وركەندەۋى مەن جاڭا جەتىستىكتەرىنىڭ ءداۋىرىن باستايتىنىنا دەگەن ءۇمىتىن بىلدىرگەن. «ءسىزدىڭ قايتا سايلانۋىڭىز ءسىزدىڭ ەل مەن بىرىككەن كورولدىك اراسىندا بەكي تۇسكەن دوستىقتى نىعايتۋعا سەپتىگىن تيگىزەتىنىنە سەنىمدىمىن», – دەپ جازادى اۆتور. رەسەي فەدەراتسياسى پرەزيدەنتىنىڭ حالىقارالىق مادەني ىنتىماقتاستىق جونىندەگى ارناۋلى وكىلى م.شۆىدكوي ءوز قۇتتىقتاۋىندا سايلاۋداعى ايقىن جەڭىس ەلدىڭ الەۋمەتتىك-ەكونوميكالىق ءال-اۋقاتىن نىعايتۋ جانە حالىقارالىق بەدەلىن ارتتىرۋ ىسىندەگى نۇرسۇلتان نازارباەۆتىڭ ەڭبەگىن قازاقستان حالقىنىڭ مويىنداۋىنىڭ جارقىن ايعاعى ەكەنىن اتاپ وتكەن. «ءومىردىڭ بارلىق سالاسىنداعى قازاق­ستاننىڭ تابىستارى داۋ تۋدىرمايدى. رەس­پۋبليكا حالىقارالىق گۋمانيتارلىق ىنتى­ماق­تاستىق سالاسىندا دا بارعان سايىن ماڭىزدى ءارى ايقىن ءرول اتقارۋدا, بۇل رەتتە ول ءتول ۇلتتىق داستۇرلەرىن دە ساقتاپ وتىر», – دەپ جازادى اۆتور. «چالىك حولدينگ» كومپانياسى ديرەكتورلار كەڭەسىنىڭ توراعاسى ا.چالىك نۇرسۇلتان نازارباەۆتىڭ پرەزيدەنتتىك سايلاۋداعى جەڭىسىنىڭ ەلدىڭ تىنىشتىعى مەن تۇراقتىلىعى ءۇشىن ماڭىزدىلىعىن اتاپ وتكەن. سونداي-اق, ا.چالىك نۇرسۇلتان نازار­باەۆ­تىڭ باسشىلىعىمەن قازاقستاننىڭ جان-جاقتى دامىپ كەلە جاتقانىنا, سونىڭ ارقاسىندا ورتالىق ازياداعى ەكونوميكاسى ەڭ ءىرى ەل بولىپ وتىرعانىنا نازار اۋدارىپتى. «فون روگگە قايىرىمدىلىق قورىنىڭ» نەگىزىن سالۋشى و.يگالس-روگگە نۇرسۇلتان نازارباەۆتى قازاقستان پرەزيدەنتى لاۋازىمىنا سايلانۋىمەن قۇتتىقتاپ, ەلىمىزدىڭ ءارى قاراي دامۋىن قامتاماسىز ەتۋگە باعىتتالعان جولىن جالعاستىرۋىنا تىلەكتەستىك بىلدىرگەن. بىرقاتار قوعامدىق قورلاردىڭ باسشىلارى, الماتىنىڭ جاس بەلسەندىلەرى, سونداي-اق, قازاقستاننىڭ مادەنيەت قايراتكەرلەرى ءوز حاتتارىندا قالا جاستارى اتىنان نۇرسۇلتان نازارباەۆتى وتكەن پرەزيدەنتتىك سايلاۋداعى جەڭىسىمەن قۇتتىقتادى. «قازاقستان حالقىنا «نۇرلى جول» اتتى جولداۋىڭىزدا ءسىز بارلىق سالانى قامتيتىن, سونداي-اق, ەلدىڭ ۇدايى دامۋىن قامتاماسىز ەتەتىن جاڭعىرتۋ جولىن كورسەتەتىن اۋقىمدى وزگەرىستەردى اتاپ بەردىڭىز. سوعان قاراپ, ءبىز الدىمىزدا تۇرعان بارلىق مىندەتتەردىڭ قانشالىقتى اۋىرلىعىن سەزىنەمىز. كەز كەلگەن قازاقستاندىق «ماڭگىلىك ەلدىڭ» ازاماتى بولۋعا لايىق دەپ سەنەمىز, – دەلىنگەن حاتتا. «مەنىڭ بالالىق شاعىمنىڭ اسپانى» فيلمىندە بوزبالا نۇرسۇلتان ءرولىن ويناعان ە.الپيەۆ مەملەكەت باسشىسىن قازاقستاننىڭ دامۋىنا قوسقان ۇلەسى ءۇشىن العىس ايتىپ, پرەزيدەنتكە مىقتى دەنساۋلىق, ال ەلىمىزگە بەيبىتشىلىك پەن تىنىشتىق تىلەيدى. نۇرسۇلتان نازارباەۆتىڭ پرەزيدەنت ساي­­لاۋ­ىنداعى جەڭىسىنە بايلانىستى قۇت­تىقتاۋلارىن, سونداي-اق, الماتى وبلىسى قارا­كەمەر اۋىلىنان ۇلى وتان سوعىسىنىڭ ارداگەرى ك.قوساقوۆ, ورال قالاسى­نان ارداگەر مۇعالىمدەر كەڭەسىنىڭ توراعاسى س.يمانعاليەۆا, قاراعاندى وبلىسى تەمىر­تاۋ قالاسىنان ۆ.حومياكوۆا, قىزىلوردا قالاسى­نىڭ تۇرعىندارى ح.قۇنانقاراەۆ پەن س.شىمىر­قۇلوۆ, جامبىل وبلىسى سارىكەمەر اۋىلىنان ءو.ابدىرەيىموۆ, جامبىل وبلىسى ۇلگىلى اۋىلىنان ە.سەرىكباي ۇلى جانە مويىنقۇم اۋىلى مەكتەبىنىڭ وقۋشىسى ا.ءمۇسلىموۆا, وڭتۇستىك قازاقستان وبلىسى جاڭا تۇرمىس اۋىلىنداعى م.عابدۋللين اتىنداعى №53 مەكتەپتىڭ 7-سىنىپ وقۋشىسى ءا.ۇلقوجاەۆا, قاراعاندى وبلىسى ساران قالاسىنداعى №17 مەكتەپتىڭ 6-سىنىپ وقۋشىسى ءۇ.سەرىكباەۆا, الماتى وبلىسى سارقاند قالاسىنداعى ن.وستروۆسكي اتىنداعى مەكتەپ-ليتسەيدىڭ 4-سىنىپ وقۋشىسى ت.ونەرباەۆا جولدادى. ولەڭ جولدارى ارقىلى ورنەكتەلگەن وزگەشە تىلەك-لەبىز الماتى قالاسىنىڭ تۇرعى­نى گ.وتەعاليەۆادان جانە الماتى وبلىسى ۇزىناعاش اۋىلىنداعى س.بەردىقۇلوۆ اتىن­داعى مەكتەپتىڭ 11-سىنىپ وقۋشىسى ز.ىسقا­قو­ۆادان كەلىپ ءتۇستى. سوڭعى اپتالاردا كەلگەن حات-حابارلارمەن مۇ­قيات تانىسىپ شىققان مەملەكەت باسشىسى بارلىق حاتتار مەن جەدەلحاتتاردىڭ اۆتورلارىنا قۇتتىقتاۋلارى ءۇشىن شىنايى العىسىن بىلدىرەدى.