پەتروپاۆل. 15 مامىر. مامليۋت اۋدانىنىڭ ورتالىعىنداعى جەڭىس ساياباعى باتىرلار ساياجولىمەن تولىقتى. بۇل تۋرالى اۋداندىق اكىمدىكتىڭ ماماندارى حابارلادى.
جەرگىلىكتى قازىنادان بولىنگەن قاراجاتقا ورتالىق ساياباققا كۇردەلى جاڭعىرتۋ جۇمىستارى جۇرگىزىلىپ, ايشىقتى باتىرلار ساياجولى بوي كوتەردى. ونداعى ءمارمار تاستارعا مامليۋتتىك كەڭەس وداعىنىڭ باتىرلارى مەن سوتسياليستىك ەڭبەك ەرلەرىنىڭ, ۇلى وتان سوعىسىنا قاتىسۋشىلاردىڭ – بارلىعى 8023 ادامنىڭ ەسىمدەرى قاشاپ جازىلدى.
اتالمىش شاراعا سوعىس ارداگەرلەرى مەن تىل ەڭبەككەرلەرى, قالا جۇرتشىلىعى, جاستار قاتىسىپ, اۋدان اكىمى ەربولات بەكشەنوۆ قۇتتىقتاۋ ءسوز سويلەدى. قان مايداننان ورالماعان بوزداقتاردى ەسكە الىپ, ەسكەرتكىشكە گۇل شوقتارى قويىلدى. اسپانعا 70 شار ۇشىرىلىپ, مايدان اندەرى شىرقالدى.
ءومىر ەسقالي.
دەرەك, سۋرەت: سولتۇستىك قازاقستان وبلىسى مامليۋت اۋدانىنىڭ اكىمدىگى.
