ورالدا ادام ولتىرگەن قىلمىسكەرگە ۇكىم شىقتى

ورال. 28 اقپان. باتىس قازاقستان وبلىستىق قىلمىستىق ىستەر جونىندەگى مامانداندىرىلعان اۋدان ارالىق سوتىندا ادام ولىمىنە اكەلىپ سوقتىرعان قىلمىستىق ءىس قارالدى. بۇل تۋرالى باتىس قازاقستان وبلىستىق سوتىنىڭ ءباسپاسوز قىزمەتى حابارلادى. اتالعان سوتتىڭ ۇكىمىمەن اۋىر قىلمىس جاساعان ش.جۇماعاليەۆ قر قىلمىستىق كودەكسىنىڭ 96-بابى 1-بولىمىمەن ايىپتى دەپ تانىلدى. سوعان سايكەس ايىپتىعا 10 جىل باس بوستاندىعىنان ايىرۋ جونىندە جازا بەلگىلەندى. ول ءوزىنىڭ جازاسىن قاتاڭ تارتىپتەگى كولونيادا وتەيدى. قاندى وقيعا تومەندەگىشە ءورىس العان. جوعارىدا اتالعان سوتتالۋشى ەڭ الدىمەن ءوزىنىڭ تانىسىمەن بىرگە اراق ىشەدى. قۋاتى جوعارى ىشىمدىكتىڭ ۋىتى بويلارىنا تاراي باستاعاننان كەيىن ەكەۋى ءوزارا قاتتى سوزگە كەلىپ قالادى. وسى كەزدە ءوزىنىڭ ءىس-قيمىلىنا ەسەپ بەرۋدەن قالعان ش.جۇماعاليەۆ ۇستەلدىڭ ۇستىندەگى اس ءۇي پىشاعىنا جارماسادى. كەلەسى ءبىر ساتتە وسى پىشاقپەن جابىرلەنۋشىنىڭ مويىن تۇسىنا اۋىر سوققى جاسايدى. تانىسى سول جەردە ەسىنەن تانىپ قالادى. ايتسە دە كوزى قارايعان باسبۇزار مۇنى دا مىسە تۇتپاي, جابىرلەنۋشىنىڭ تاماعى مەن كۇرەتامىرىن كەسىپ جىبەرەدى. اۋىر جاراقاتتان تانىسى سول جەردە ءولىپ كەتتى. تەمىر قۇسايىن. دەرەك: باتىس قازاقستان وبلىستىق سوتىنىڭ ءباسپاسوز قىزمەتى. سۋرەت: sud.gov.kz.