الماقتىڭ دا سالماعى بار

حالقىمىزدىڭ سالت-ءداستۇرى مەن ءومىر ءسۇرۋ داعدىسىندا اكەلىك قامقورلىق ءبىر اۋىز تىركەس بار. بۇل شىن مانىسىندە وتە ءماندى ءسوز. ويتكەنى, اكەلىك قام­قور­لىق­قا بولەنگەن اۋلەتتەر مەن وتبا­سىلاردىڭ ءجاي-كۇيى تومەن بولمايدى. ايتسە دە, قولداۋ مەن قامقورلىق كورسەتۋدىڭ مۇنداي ءتۇرى وتباسىلىق دەڭگەيدەن اسا المايدى. ەندەشە, ءبىز وسى تىركەستى مەملەكەتتىك قامقورلىق ۇعىمىمەن الماستىرشاق شە؟ تالاس جوق. ونىڭ اۋقىمى وتە كەڭ. ءمانى مەن ماعىناسى دا وتە جوعارى, ءارى تيگىزەر شاپاعاتى دا ەلدىك سيپات الادى. بۇل ارادا ەڭ باستى ايتايىن دەگەنىم, بىزدەر وتاندىق كاسىپكەرلەر قاۋىمى ەلىمىز تاۋەلسىزدىك العان كەزەڭدەگى سوڭعى ون جىلدىڭ ءىشىن­دە مەملەكەتتىڭ قامقورلىعىنا بولەنىپ كەلەمىز. ءتىپتى, سيمۆول­دىق تۇردە العاندا ءبىزدى ەلباسى نۇرسۇلتان نازارباەۆتىڭ ءوزى تىكەلەي قاناتىنىڭ استىنا الدى دەسەك ارتىق ايتقاندىق بولمايدى. سونىڭ ارقاسىندا ەلىمىزدەگى بيزنەس وكىلدەرى ءوز وندىرىستەرىن قۇرىپ, باسەكەگە توتەپ بەرە الاتىنداي تاۋارلار ءوندىرۋ ءۇشىن ۇلكەن مۇمكىندىكتەر الدى. مەملەكەتتىك ورگاندار تاراپىنان كاسىپكەرلىك نىسانداردى تەكسەرۋگە شەكتەۋلەر قويىپ, بىرنەشە رەت وعان موراتوريلەر جاريالانۋى دا بىزگە جاسالعان مەملەكەتتىك قامقورلىق, ەلباسىنىڭ تىكەلەي قولداۋى دەپ ءتۇسىنۋىمىز كەرەك. بۇل جونىندە ءوزىنىڭ قازاقستان حالقىنا ارناعان ۇندەۋىندە ن.ءا.نازارباەۆ وتاندىق وندىرۋشىلەرگە قولداۋ كورسەتىپ, بيزنەس ءۇشىن قولايلى جاعدايلار جاسادىق دەگەن ەكەن. اشىعى دا, اقيقاتى دا وسى. بۇعان ءبىز – وتاندىق بيزنەس وكىلدەرى ريزاشىلىقپەن قول قويا الامىز. الماقتىڭ دا سالماعى بار دەگەندەي ەندىگى كەزەكتە بىزگە, ياعني ەل كاسىپكەرلەرى مەن بيزنەسمەندەرىنە وسى قامقورلىق پەن قولداۋعا ىسپەن جاۋاپ بەرەتىن كەز كەلدى دەپ ەسەپتەيمىن. ويتكەنى, ەلىمىز دۇنيە­جۇزىلىك ساۋدا ۇيىمىنا مۇشە بولىپ كىرگەن جاعدايدا مەملەكەت باسشىسى اتاپ كورسەتكەندەي باسەكە ودان ءارى كۇشەيەدى. مەنىڭ ويىمشا, بۇعان توتەپ بەرۋدىڭ ءبىر عانا جولى بار. بۇل – ساپاسى جوعارى, باعاسى يكەمدى قازاقستاندىق تاۋارلار وندىرۋگە قول جەتكىزە ءبىلۋ. شىنتۋايتىنا كەلگەندە, بۇل – قولدان كەلەتىن ءىس. تەك باسەكەگە ساي بولۋ ءۇشىن بىزگە ەرىك-جىگەر تۇتاستىعى, ىرگەلى ىزدەنىستەر, بيىك مىندەتتەر مەن جوعارى تالاپتار ۇدەسىنەن شىعۋعا سەپتىگى تيەتىندەي ماقساتكەرلىك قاسيەتتەر قاجەت. مۇنىڭ سىرتىندا ءوندىرىس تەحنولوگياسىن ۇدايى جەتىلدىرۋ, باسەكەگە توتەپ بەرە الاتىن تاۋارلار وندىرۋگە قاجەتتى قوندىرعىلار مەن قۇرال-جابدىقتار كەشەنى دەگەن ماسەلە بار. رەسپۋبليكادا مەملە­كەت باسشىسىنىڭ قولداۋىمەن جاسال­عان كوپتەگەن باعدارلامالار جانە وندا كورسەتىلگەن نەسيەلىك جەڭىلدىك­تەر بۇل ماسەلەنىڭ شەشىمى تابى­لىپ جاتقانىن كورسەتەدى. وتاندىق وندىرىسشىلەردىڭ قامقورشىسى نۇرسۇلتان ءابىش­ ۇلى ۇندەۋىندە دسۇ بەرەتىن ارتىقشىلىقتاردى پايدالانا بىلەتىنىمىزدى دالەلدەۋ قاجەت ەكەنىن ايتا كەلىپ, بۇل قازاقستاننىڭ قولىنان كەلەدى دەپ ءتۇيىن جاسادى. ناعىز ورنىقتى دا سەنىمدى ءتۇيىن وسىنداي-اق بولار. كەڭەس ابساتيروۆ, باتىس قازاقستان وبلىسى كاسىپكەرلەر پالاتاسىنىڭ ديرەكتورى. ورال.