اورتالىق ستەنوز – ەگدە جاستا ءجيى كەزدەسەتىن ءارى ومىرگە قاۋىپتى دەرتتىڭ ءبىرى. بۇل اۋرۋ ۋاقىتىندا ەمدەلمەسە, جۇرەك جەتكىلىكسىزدىگىنە اكەلىپ, ناۋقاستىڭ ءومىرىن قىسقارتادى. 90 جاستان اسقان ادامعا ءداستۇرلى اشىق وپەراتسيا جاساۋ وتە قاۋىپتى. وسىنى ەسكەرگەن دارىگەرلەر ناۋقاسقا ەڭ قاۋىپسىز ءارى ءتيىمدى ءادىستى – از ءينۆازيۆتى TAVI تەحنولوگياسىن تاڭدادى.
بۇل ءادىس كەزىندە جاڭا قاقپاقشا سان ارتەرياسى ارقىلى ەنگىزىلگەن جۇقا كاتەتەردىڭ كومەگىمەن جۇرەككە جەتكىزىلەدى. ياعني كەۋدە سۇيەگى كەسىلمەيدى, جاساندى قان اينالىمى اپپاراتى قولدانىلمايدى. مۇنداي ءتاسىل, اسىرەسە, جاسى ۇلكەن ناۋقاسقا اسا ماڭىزدى.
دارىگەرلەر TAVI ءادىسىنىڭ نەگىزگى ارتىقشىلىعىن اتاپ ءوتتى. بىرىنشىدەن, ول اعزاعا تۇسەتىن جۇكتەمەنىڭ از بولۋىنا, تەز قالپىنا كەلۋىنە, اۋرۋحانادا جاتۋ مەرزىمىنىڭ قىسقارۋىنا, سونداي-اق وپەراتسيالىق تاۋەكەلى جوعارى ناۋقاستىڭ دەرتىنەن ايىعۋىنا مۇمكىندىك بەرەدى. انگيوحيرۋرگ ارمان سادىقوۆ: «ناۋقاستىڭ جاسى – ۇلكەن قاۋىپ فاكتورى. سوعان قاراماستان, قازىرگى مەديتسينانىڭ مۇمكىندىكتەرى وسىنداي كۇردەلى جاعدايدا دا ءتيىمدى كومەك كورسەتۋگە جول اشىپ وتىر. TAVI – اۋىر وپەراتسياسىز ءومىر سۇرۋگە بەرىلگەن مۇمكىندىك», دەيدى.
باسقارۋشى كومپانيانىڭ باس ديرەكتورى جۇماعالي يسمايلوۆ پاتسيەنتتىڭ جاسىنا قاراماي, بارلىعىنا ساپالى ءارى قاۋىپسىز مەديتسينالىق كومەك قولجەتىمدى ەكەنىن تىلگە تيەك ەتە كەلىپ, 2023 جىلى 97 جاستاعى قارياعا, ودان كەيىن 103 جاستاعى كەيۋاناعا ءساتتى وپەراتسيا جاسالعانىن ايرىقشا اتاپ ءوتتى.
«جۇزگە تاياعان انامىزعا وسىنداي وپەراتسيا جاساۋ مۇمكىندىگى بارىن بىلمەگەن ەدىك. دارىگەرلەرگە كاسىبيلىگى مەن جاناشىرلىعىنا, اسىل انامىزدىڭ ءومىرىن ۇزارتقانىنا شىن جۇرەكتەن العىس ايتامىز», دەگەن كەيۋانانىڭ تۋىستارى دا دارىگەرلەرگە ريزاشىلىعىن ءبىلدىردى.
بۇگىندە TAVI – جۇرەك قاقپاقشاسى اۋرۋلارىن ەمدەۋدەگى ەڭ زاماناۋي ءارى ءتيىمدى ادىستەردىڭ ءبىرى. ەگدە جاستاعى ناۋقاستاردىڭ ءومىر ساپاسىن جاقسارتۋعا جاردەمدەسەتىن مەديتسيناداعى تىڭ ءتاسىل.
الماتى وبلىسى
