قوقىستان كوتتەدج تۇرعىزعان...

«قالاۋىن تاپسا, قار جانار» دەمەكشى, بەي-بەرەكەت شاشىلعان قالدىقتىڭ ءوزىن كادەگە جاراتۋدى ەندى-ەندى ۇيرەنە باستادىق. الپىستى القىمداعان ال­ما­تىلىق اعامىز وسىنداي ەڭ­بەككەشتىگىنىڭ ارقاسىندا باس اۋىرتقان باسپانا ماسەلەسىن عانا شەشىپ قويعان جوق, توڭىرەكتىڭ تازالىعىنا دا ءبىر كىسىدەي اتسالىستى. ءۇي سالۋعا قاجەتتى ماتەريال­دىڭ دەنىن قوقىس اراسىنان جيىستىرىپ, جەرتولەسىمەن قوسقاندا ءۇش قاباتتى كوتتەدج تۇرعىزدى دەپ حابارلايدى 31-ارنا تىلشىلەرى. وقاپ مۇقاجان ۇلى ەلدىڭ ۇيىنەن ەرەكشە باسپانا سالدى. ادەتتەگىدەي, كىرپىشتەن نە بولماسا اعاشتان ەمەس, بوس شىنى شولمەكتەردەن تۇرعىزدى. التى بالاسى بار اقساقالدىڭ نە جۇمى­سى, نە زەينەتاقىسى جوق كورىنەدى. قالتانى قاققان قىمباتشىلىق پەن تۇرمىس­تىڭ ناشارلىعى وسى قادامعا قاراي يتەرمەلەسە كەرەك. قىستا جىلى, جازدا سالقىن بۇل باسپاناعا 80 مىڭنان استام شىنى بوتەلكە جۇمسالىپتى. وقاپ اعا ءبىر جىل ۋاقىتىن سارپ ەتىپ جيناعان بوتەلكەلەردى كوشە-كوشەدەن, ءدۇ­كەندەر مەن كۇل-قوقىستاردىڭ ارا­سىنان تاۋىپ وتىرىپتى. ءبىر تيىن دا اقشا جۇم­ساماي سالعان ءزاۋ­لىم ءۇيى ادام دەنساۋلىعىنا ەش زيانسىز دەيدى. ەڭ باستىسى – قاۋىپسىز كورىنەدى. ءتىپتى, 9 باللدىق جەر سىلكىنىسى كە­زىندە دە بىلق ەتپەي شىداس بە­رەتىن­دىگىنە سەنىمدىلىك تانىتتى. «بالالاردان تەك قانا تسەمەنتكە عانا اقشا الدىم, ىشكەن-جەگەنىمنەن ارتىلعان اقشانى تسەمەنتكە جۇمسادىم, قالعانىنىڭ ءبارىن بوتەلكە توپىراق, اعاش ۇنتاعى, بوتەلكەمەن سالىپ شىقتىق», دەي­دى وقاپ مۇقاجان ۇلى. التى جىل بۇرىن باس­تالعان باسپاناسىنا بۇگىندە بالالارى مەن نەمەرەلەرى قونىستانعان. ءزاۋلىم ۇيدەن بولەك مونشا, كيىز ءۇي مەن قورانى دا شولمەكتەن سالعان. ءبىر عانا مونشانىڭ وزىنە 9 مىڭنان استام ءبو­تەلكە كەتكەن. ال ەسكى كۇي­تا­باقتاردى ساندىك ءۇشىن جابىستىرعانىن ايتادى. ەشكىمنىڭ كومەگىنسىز ءزاۋلىم باسپانا تۇرعىزعان اعامىز قازىر ءۇيدىڭ ىشكى بولمەلەرىنە كۇردەلى جوندەۋ جۇمىستارىن جۇرگىزىپ جاتىر. شىنىدان شاڭىراق كوتەر­گەن اقساقالدىڭ ەندىگى ارمانى – نەمەرەلەرى وينايتىن شاعىن ويىن الاڭىن سالىپ بەرۋ. «ەگەمەن-اقپارات».